عامل دماغ أفلام ؟

عامل دماغ أفلام ؟ … ليه 60 سنة ؟ .. أو 70 سنة ؟ … أو حتي 40 سنة مثلاً ؟ ليه حياتنا طوييييييييلة أوي كدة ؟ ليه إختبارنا ك ( بشر ) .. مش مجرد سؤال واحد سريع كده .. نجاوبه و شكراً .. خلاص .. موت و يوم قيامة و حساب و جنة أو نار .. ليه عدد لا نهائي له من الأسئلة .. من الإختبارات .. من الفتن .. من الإمتحانات .. من الإبتلاءات .. علي مدار عمرنا كله .. من لحظة بلوغنا و رشدنا … لحد لحظة موتنا .. ليه ؟! … ليه حياتنا معتمدة علي الأكل ؟ .. و 100% من كل أكلنا .. معتمد علي الزراعة .. ( إما زرع .. او حيوانات بتعيش علي الزرع ده ) . و الزراعة بتاخد وقت .. طويل .. أوي .. .. إيه الحكمة في كدة ؟! . … في الأفلام اللي بتحكي قصص أبطال و قصص حماسية و كدة .. بتيجي اللحظة اللي في نص الفيلم دي .. البطل بيكتشف إنه يقدر يبقي بطل .. لو إتمرن و تعب و عرق و … فتبدأ الأغنية الحماسية بتاعت الفيلم تشتغل … و الموسيقي تعلي … و لقطات مونتاج سريعة تبدأ تتعرض .. لقطة البطل بينزل يلعب 4 عدات ضغط .. و لقطة البطل بيعمل 3 عدات عقلة … و بيعرق .. و لقطة البطل بيجري أوي لمدة 4 ثواني .. و بعدين يقف ينهج . .أوي .. و هوب .. الدقيقتين بتوع الأغنية المتمنتجة يخلصوا .. و فمشهد تشويقي جميل … بيطلع البطل و هو عامل سكس باكس .. و عضلات متقسمة .. و بيكون غالباً كمان خلص ماجستير أو دكتوراة في الدقيقتين دول .. و كتب رواية و بني بدلة أيرون مان و عمل حاجات كتير أوي .. و بيقف قدام الشرير بتاع الفيلم … و يفش***ه .. إحم .. أقصد يفش غله فيه .. … بنقفل الفيلم .. و كلنا حماس و طاقة .. و الموسيقي التصويرية بتاعت الفيلم و الأغنية الحماسية الجامدة شغالة فودننا … و نبدأ … في 40 ثانية بنرتب المكتب بسرعة .. و فدقيقة بنعمل النسكافيه عشان نعلي المزاج أثناء ما حنتحول و نبقي البطل .. و في ال20 ثانية اللي فاضلين .. بنبدأ نفتح تابات في كروم عشان نعمل سيرش علي التمارين اللي حتطلعلنا العضلات .. و بعدين .. الدقيقتين يخلصوا .. و الأغنية تخلص .. و نبدأ نبص علي نفسنا في المراية .. و نكتشف إن معندناش سكس باكس لسة .. و إن العضلات لسة ماظهرتش .. و إني لسة ماعملتش ماجستير و دكتوراة !! .. و أيأس و أتخنق .. و أقرر إني مانفعش أبقي بطل … أنا حاولت .. فعلاً حاولت .. لمدة دقيقتين كاملين .. عملت زي ما البطل عمل في الفيلم … و حاولت .. و بعد خمس دقايق تانيين … أكون نسيت .. و بدأت أسكرول في الفيس أو في إنستاجرام … اتفرج علي كليبات سريعة من ناس بتهزر و تضحك و عايشة حياتها هما كمان .. كل كليب مدته دقيقة .. أو أقل … … حلوة الحياة دي .. حياة الدقيقة أو أقل دي … سهلة .. … و بعدين يحصل حدث مهم .. حاجة كبيرة .. و أسمع ناس بتتخانق و بتضرب و بتنضرب … و ألاقي نفسي بابص لنفسي في المراية مرة تانية … بتسألني .. حتعمل إيه ؟ في اللي بيحصل ده … إنت فين ؟ حتضرب مع اللي بيضرب .. ولا تنضرب مع اللي بينضرب .. و لا تزعق مع اللي بيزعقوا .. ولا حتعمل إيه .. .. أشد جسمي أوي و أكشر و أبان متأثر كده قدام نفسي .. و أقرر .. أنا بكل طاقتي حاخد أكشن .. بكل قوتي حازعق .. بكل قدراتي حساعد .. و … ألاقي إن قدراتي و قوتي و طاقتي … عبارة عن حاصل حياة .. مدتها دقيقتين .. أو أقل … … عضلاتي إتدربت لمدة دقيقتين .. او أقل .. قدراتي العقلية و العلمية .. إتطورت .. لمدة دقيقتين .. او أقل .. و يادوب .. الدقيقتين دول يكفوا إني أعمل حاجة واحدة .. أكتب بوست .. أو حتي لو أنا باكتب ببطء .. أدور علي بوست حلو عن الموضوع .. و أعمل له شير … بسرعة .. قبل ما الدقيقتين يخلصوا .. و ألاقي نفسي باسكرول مرة تانية في الفيس و الإنستاجرام . … … الميزة الوحيدة اللي بتميز البشر عن الحيوانات .. و ما أسفلنا في هرم المخلوقات علي الأرض .. هي العقل … الوعي .. الوعي ده أحد تفسيراته هي … قدرتنا علي التفكير في الزمن .. إني أفتكر اللي حصل إمبارح .. و أول إمبارح .. و السنة اللي فاتت .. و إني أقدر أتخيل اللي يحصل بكرة .. و بعده … و السنة اللي جاية … … و بناءاً علي ذاكرتي عن اللي حصل في الماضي .. و تخيلي عن اللي بيحصل في المستقبل … أقدر أبني خطط .. و إستراتيجيات .. و أفكار … و أحاول ألتزم بيها .. و أعدلها بالتدريج .. لحد ما أحاول أوصل لهدفي اللي حددته في المستقبل . … لكن .. لو أصبحت مجرد كائن بياكل و يشرب و ينام .. و بابذل مجهودي و طاقتي اليومية بالكامل عشان أقدر أوفر التلات حاجات دول بس .. أكلي و شربي و نومي .. و توقفت عن تذكر اللي حصل في الماضي .. و التفكير فيه .. و توقفت عن تخيل المستقبل .. و إزاي ممكن أشكله و أكونه .. و توقفت بالكامل عن محاولتي إني ألتزم بخططي و إستراتيجياتي … و أصبحت عايش مجرد نبات .. مش حيوان حتي .. كل يوم باستني آكل من الأكل اللي بيتحط قريب مني .. و أشرب .. و أنام .. فهل أستحق العقل اللي إتخلق جوايا ؟! … … أى ماتش شطرنج .. ماحدش بيفوز فيه بحركة واحدة بس .. أبداً .. لازم خطط .. و إستراتيجيات .. و إلتزام ممل مؤلم متعب … لمدة طويلة .. و تضحيات .. و دراسة .. أحياناً بتكون لمدة شهور .. قبل الماتش نفسه ما يبتدي .. … رجاء .. إدرك .. إنك بشر .. مش حيوان أو نبات .. حياتك مش فيلم لمدة ساعتين .. او أغنية لمدة دقيقتين .. حياتك ربنا خلقها سنين طويلة … لحكمة … إنك تستغلها بالكامل ( قدر إستطاعتك ) .. تبني .. بالظبط زي الزراعة اللي حياتك معتمدة عليها .. خطوات تكرارية مؤلمة متعبة لازم تتعمل يومياً … بصبر … و عزم .. حتزهق .. حتيأس .. حتتعب .. كل ده طبيعي .. بس كل ده عشان عند مرحلة معينة .. يبقي جزعك قوي .. و جذرك في الأرض ثابت .. … زعلان و متضايق من اللي بيحصل .. حلو .. ده جميل … ذاكر بقي .. إتدرب .. إدرس .. إبني .. يومياً .. كل دقيقة و ثانية تقدر عليها .. حاول إنك كمان 5 سنين علي الأقل مثلاً … لما تحب تاخد أكشن .. مايكونش كل اللي في قدرتك هو مجرد ( بوست ) .. … و الله أعلم .