الساعة 5,07 فجراً دلوقتي , و نمت ساعة بالعدد ,

الساعة 5,07 فجراً دلوقتي , و نمت ساعة بالعدد , و صحيت فايق دماغي فجأة صحي فيها شوية حاجات في بروجكت شغال عليه بقالي مدة محترمة .. فقررت إن النوم مهم و كل حاجة بس أنا أخاف أنسي اللي فدماغي .. و حاقوم أعمله دلوقتي . المهم .. أثناء ما باعمله , سرحت شوية صغننة كالمعتاد .. و شفت كام فيديو تيكتوك .. فإتكرر ليا كام فيديو عن تريند اليومين دول . أوبنهايمر . … 1- أنا لسة ماشفتش الفيلم , و ماعتقدش إني حادخله فمصر بسبب قفلتي من السينيما من آخر مرة دخلتها فمصر . 2- أنا قرأت أكتر من كتاب عن أوبنهايمر و تفاصيل الموضوع ده علي مدار السنين , فاللي هو حاسس كإن الناس بتتكلم عن مسلسل أنا شفته و عيدته 5 أو 6 مرات قبل كده . 3- أنا فعلاً مابحبش ( كيليان ميرفي ) , شفته فباتمان و قفلني , و شفته في بيكي بلايندرز و ماطقتوش .. بل ماكملتش السيزون الأخير أساساً .. و مش بينزل ليا من زور . … … و لكن النقطة اللي بتخليني أكتب البوست دلوقتي هي : ملعون أبو الوعي الضحل اللي يخليك تشوف العينين الزرق و الشعر الأصفر بس إنهم البشر اللي يستحقوا التعاطف . .. أنا كتبت زماااااااااان .. إني أول مرة شفت فيلم تايتانيك فيها .. كنت متنرفز و مش فاهم متنرفز ليه .. لحد ما فضلت أفكر في اللي شفته .. لقيت إني كنت متنرفز إن التركيز كله كان علي ( عيّل طري عينيه زرقا و شعره أصفر … و بت ولامؤاخذة شمال ) .. و المفروض إني أهتم بيهم و أزعل عليهم … و أتجاهل كل العشرات التانيين اللي إتخزوقوا في السفينة !! . .. و نهيت البوست ده أيامها بتساؤل : هل كان الفيلم حينجح نفس النجاح ده .. لو بدلنا بس ليوناردو ديكابريو بحد زي : ( داني تريهو - danny trejo ) دور عليه لو ماتعرفش مين ده .. و بدل كيت ويسنليت .. كنا جبنا أى ممثلة كويسة بس مش مزة و مش حلوة شكلاً .

نفس السكريبت و الإخراج و التصوير و لقطة الرسم إياها و لقطة العربية و كل الهري ده … بس بدل الممثلين الأساسيين بناس حقيقية شوية .. هل كان الفيلم حينجح ؟! ولا كان حيتشاف إنه كوميدي ؟ .. أو رعب ؟! . … … و النقطة التانية هي : humanizing the white guy = يعني إجبارك علي التعاطف مع الشخص الأبيض .

أكيد هتلر كان بيدخل الحمام برضو لما يبقي مزنوق , و يشرب لما يعطش .. و كان رسام , و كان ممكن جداً يكون بيحبب القطط و بيأكلهم و يشربهم . و أكيد كان عنده عقد و هو صغير سببت إنه يطلع يحلق شنبه بالشكل ده .

لكن التصوير الكاريكاتوري ليه الدائم بيخليك مستحيل دلوقتي تتعاطف معاه , و لما تشوفه تفتكر علاء مرسي في فيلم الحرب العالمية التالتة . … … لو ماتعرفش مين ( رودي جولياني = rudy guiliani ) ,فده يعتبر مسخرة ال 7 سنين اللي فاتوا في الحياة السياسية الأمريكية . إكتب إسمه بس علي جوجل و شوف النتايج اللي حتظهر .. .. رودي جولياني ده كان محافظ نيويورك أيام تفجيرات 11 سبتمبر .. و تم الإحتفاء بيه و عمل أفلام خرافية بتمجد في إمكانياته .. و كان بيعتبر هو فتي أحلام كل نساء أمريكا فوق الأربعين سنة أيامها .. .. و لكن لما أصبح هو أحد الداعمين بشدة لترامب , و بغض النظر إنهم كلهم من الأساس ملعوب في أساساتهم .. تم تحويله لمسخرة و بهلوان الإعلام الامريكي حرفياً .. و يكفي ذكر إسمه كمادة للكوميديا و السخرية دلوقتي . … … عدسة الكاميرا ممكن تطلع الفسيخ شربات و الشربات فسيخ … حرفياً . … … أنا باشجع اللعبة الحلوة , و باشجع السينيما الحلوة بكل تأكيد .. و باصقف لما سبايدر مان ينط و يضرب الشرير الوحش .. بس بابقي عارف إني باتفرج علي خيال للخيال .. .. لكن رجاء .. و كمان مرة رجاااااااااء .. ماتخدوش مشاعركم و إنفعالاتكم من شاشة سينيما أو تيليفزيون .. أو موبايل . التفكير المنطقي تقدر تتخيله زي أى عضلة في جسمك .. لو ماستخدمتوش كل فترة .. حيضمر .. و يموت .. و تبقي ماشي من غيره . مشاعرك سهل جداً التلاعب بيها ..

و كل ما تلاقي نفسك بدأت تتشحتف قدام تايتانيك أو حاجة شبهه .. رجاء بدل الممثلين فدماغك .. و شوف إنفعالاتك حتتغير إزاي .