https://korionx.sarahah.com/
( تعمل إيه لو كنت شغال في الحكومة اللبنانية دلوقتي ؟ .. أو أى حكومة تانية ؟ ) .
ماعندناش شغل … يبقي نشتغل بقي . ( تعمل إيه لو كنت شغال في الحكومة اللبنانية دلوقتي ؟ .. أو أى حكومة تانية ؟ ) .
سنة 2014 لما كنت لسة مخلص جيش طازة و بدأت أقدم علي وظائف فمجالي فشركات مخلتفة .. بالرغم من إن ال( cv ) بتاعتي في الوقت ده ماكنتش سيئة إطلاقاً.. و لكني كنت حاسس إني محتاج أبقي مميز أكتر عشان حد يشوفني وسط اللي متقدمين دول كلهم . … طرأت فدماغي فكرة بسيطة للغاية .. و لكنها فرقت معايا كتير أوي .. اوي .. و لحد النهاردة .. .. الفكرة كانت : أنا أقدر أساعد الشركة اللي باقدم علي شغل فيها .. إزاي ؟! .. السؤال ده خلاني أغير منظوري في التفكير في الوظيفة و التوظيف أساساً .. و بدل ما كنت بافكر ( يا تري أنهي شركة ممكن تقبل بيا و تشغلني فإيه ؟! ) .. بقيت بافكر ( يا تري أنا أقدر أفيد الشركة اللي باقدم فيها إزاي ؟! ) . .. فبقيت قبل كل معظم الإنترفيوهات اللي باروحها .. أقضي وقت محترم أعمل ريسيرش محترم جداً عن الشركة .. و مجالاتها .. و مكانها في السوق .. و منافسينها .. و مستقبل المجال اللي الشركة ده فيه أساساً .. و هكذا .. … و لما ماكنتش بالاقي أى نقطة ضعف أقدر أفتي إني ممكن أفيد فيها .. كنت بافكر في السؤال الأهم : .. ( نقط الضعف ممكن تظهر في المستقبل فين ؟ .. و أعمل إيه عشان أأمن النقط دي ؟ ) . … … فترة التقديم علي وظائف دي ماستمرتش كتير .. لأني كنت بدأت أنشغل بالكامل بالشغل الخاص بيا .. … و لكن طريقة التفكير دي .. إكتشفت إنها هي اللي بتميز طرق إدارة شركات و كيانات كتير ناجحة .. عن شركات و كيانات تانية بتختفي بين يوم و ليلة .. … … مثلاً .. الإدارة الأمريكية بتاعت أوباما قبل ما تمشي .. كان فيها ملفات كتير و أقسام كتير عن : ( السيناريوهات المحتملة الوقوع لحوادث معينة ) .. و كيفية التعامل معها . .. موظفين بياخدوا مرتبات .. و مكن شغال .. و فواتير بتندفع .. فقط علي الجزئية دي .. جزئية : ( إيه المصايب اللي ممكن تحصل .. و نستعد لها إزاي ) .. .. و الأقسام دي بتحط حاجة إسمها ( بروتوكول = playbook ) .. بحيث إن في اللحظة اللي تحصل في المصيبة .. مايلفوش و يدوروا حوالين بعض مش عارفين يتعاملوا إزاي .. لا .. ده بيكون ناس كتير قبل كدة قعدت و تعبت نفسها عشان تتخيل كل السيناريوهات المحتملة للمصيبة .. و حطت سيناريوهات للتعامل معاها. … … عمك ترامب بقي لما مسك .. بص و شاف شوية ناس كتير قاعدين مالهومش تأثير مباشر علي اللي بيحصل في العالم دلوقتي .. و لكنه بياخدوا مرتبات عشان يتخيلوا السيناريوهات دي و كيفيات التعامل معاها .. و بعقلية بياع البطاطا اللي بيدور علي إنه يبيع النهاردة .. و بكرة يبقي يحلها ألف حلال .. ترامب قرر إنه يفصل كل اللي كانوا شغالين في الأقسام دي .. و يقفل مكاتبهم .. و يرمي مجهود السنين اللي كانوا شغالين عليه .. … … من ضمن السيناريوهات المحتملة اللي كان تم عمل بروتوكولات كتير للتعامل معاها كان : ( نعمل إيه لو إنتشر وباء زي بتاع كورونا ده ) .. .. و طبعاً بعند و غباء بياع البطاطا المحنك … ترامب فضل مأجل التعامل بالبروتوكولات المتجهزة دي .. لحد ما أمريكا كانت ركبت الزوحليقة خلاص .. و الناس كانت حرفياً بتشرشحله . … … … علي مدار حياتي العملية لحد دلوقتي .. شفت شركات و كيانات و أفراد كتير .. عاشقين للأجازة .. بيستنوا الشغل يخلص .. عشان .. يفضوا دماغهم بالكامل و يقضوها في الساحل أو شرم . .. و لو مافيش شغل لعملاء معاهم … هما حاطين دماغهم فتلاجة .. و بيصرفوا من ودائع البنك الخاصة بيهم أو إستثماراتهم السلبية ( كيانات متأجرة أو مشاركات مع أفراد تانيين يعني ) . … … الشركات و الكيانات و الأفراد دي .. هي اللي بتختفي بمجرد ما يتفاجئوا بسيناريو مصيبة حصل لهم .. و يضطروا يقضوا وقت طويل علي ما يتأقلموا علي التصرف مع المصيبة . … … و الحكومات كمان .. … … أنا قاعد باقرأ تفاصيل اللي حصل في لبنان من أول ما إتعلن عنه علي CNN .. و فعلاً بادعي ليهم ربنا يخفف عنهم البلاء ده .. بس ماقدرش مافكرش في ( ماذا لو كنت مكان المسئول هناك ؟! ) .. و ( ماذا لو أنا مسئول عن كيان كبير مشابه ؟! ) … ماعتقدش إني أبداً حاكون ( فاضي ) .. او أكون ( خلصت شغل ) .. … … جزء كبير خاص بشغلي .. بيحصل لما بنكون مخلصين شغل … و مقفلين طلبات العملاء .. عبارة عن إني باقعد باصص في الركن البعيد الهادي في السقف .. و أفكر .. و أتخيل .. أتخيل أكبر عدد ممكن من السيناريوهات الممكنة .. و الغير ممكنة .. و أتخيل كيفية التعامل معاهم … و أحط بروتوكولات إفتراضية .. و أعمل سيرش و ريسيرش علي البروتوكولات .. و خطوط زمنية إفتراضية لها .. … … أعتقد والله أعلم إن الوظيفة دي .. و الدور ده .. هو أهم دور لأي كيان عايز يكون مستمر و مايختفيش بين يوم و ليلة .. … … و نصيحتي للي بيقرا البوست ده .. أياً كان حجمه .. فرد أو لسة حتي طالب في المدرسة … أو مدير أو رئيس لشركة مهما كان حجمها .. .. إتأكد رجاء إنك جزء كبير من مواردك .. بتصرفه عشان تفكر في المصايب اللي ممكن تحصل .. و تحصل ليه ؟ و لما تحصل .. تتعامل معاها إزاي ؟ .. .. و بعد ما تخلص تفكير في مصيبة ما .. فكر في اللي بعدها .. .. و هكذا .. .. و الله أعلم .