الواد اللي في الصورة ده إسمه : مايكل كاربونارو .

الواد اللي في الصورة ده إسمه : مايكل كاربونارو . و البرنامج اللي في الصورة ده إسمه : the carbonaro effect , من أكتر الحاجات اللي بتضحكني من أول مرة إكتشتفه فيها من 3 سنين تقريباً . *** لينك لمشهد من البرنامج في أول كومنت ****

مقدم البرنامج ( مايكل ) أستاذ و برنس و رئيس قسم في خفة اليد . حاوي كما ينبغي للكلمة أن تكون . لكن عبقريته فوجهة نظري مش خفة إيده , و لكن لغته و حواره .

أثناء أى حلقة من حلقات البرنامج , و بعد ما بيقدم للزبون حاجة تعارض المنطق و المفهوم و الطبيعي ( زي شنطة فحجم قبضة الإيد مثلاً .. و بيطلع منها قارب و فرخة حية 😂 .. و أكتر ) .. الحوار اللي بيدور بينه و بين الزبون اللي بتعتلي وجهه كل علامات الدهشة و الإنبهار .

الزبون بيسأله سؤال بسيط جداً ( إزاي ؟! ) .. و مايكل بيرد بكل بساطة و تلقائية : دي تكنولوجيا الضغط الجديدة ” عارفها إنت ؟ ” , ” بيسموها ” ضغط هايبرمائي .. ” فاهم إنت ؟ ” .. عن طريق إنهم بيعزلوا الجزيئات اللي بتاخد مساحة زيادة و بيرتبوها فوق بعض بنفس طريقة الأوريجامي … عشان ماتاخدش مساحة زيادة و نقدر نوفر الحجم .

و الزبون بكل بساطة بيرد عليه أثناء الحوار ده بـ : أيوا .. تمام تمام .. فعلاً .. صح … واو . … ببساطة اللي عمله مايكل هنا بكل براعة هو : توه الزبون في التفاصيل ..

و دي حاجة أنا شخصياً ( و باعترف بده ) أتقنتها من زمااااان , و نادراً لما حد بيوقفني أو ياخد باله .. لما باحب أتوهه بيها 🙈.

كل اللي إنت بتحتاج تعمله عشان ” تتوه ” الزبون اللي قدامك هو : إملي عقله بسرعة بكمية كبيرة من التفاصيل .. مع تكرار كلمات و جمل مفتاحية زي : فاهم إنت ؟ زي ما إنت عارف . خدت بالك من الحتة دي ؟ زي ما علمونا زمان .

وظيفة الكلمات و الجمل المفتاحية دي هي إنك ( بتوهم ) الزبون إنه فهم فعلاً , و لأن أغلبية البشر دايماً عايزين يبانوا أذكي و أعلم مما هما عليه .. فبتكون إجابته علي معظم الأسئلة دي هي إنه يهز رقبته بالإيجاب .. و يقول آه . … و بعد ما بيمشي مايكل بعد ما كلفت الزبون , و حرفياً خلاه يلف حوالين نفسه .. و وراه شيء مستحيل منطقياً و علمياً .. بيفضل الزبون فاتح بقه مش فاهم , و مش عارف هو حصل فيه إيه . … … السبب إني كتبت عن البرنامج ده دلوقتي .. هو إن ناس كتير دلوقتي بقوا زباين .. و علي مدار الكام سنة اللي جايين .. الزباين حيزيدوا جداً جداً .. لأن كمية ال ” تفاصيل ” اللي ممكن تتوه أى حد .. بتزيد بشكل فظيع .

و كل اللي إنت محتاجه لو إنت عندك شوية ذكاء و خبث .. و عايز تكلفت حد و تتوهه .. هو شوية معلومات بسيطة و كلمات مفتاحية بسيطة .. و شكرا ً.

يعني حتكلم الزبون و تقول له : بس يا عم , أنا من ساعة ما حطيت الكام ألف اللي كنت محوشهم في المحفظة الكريبتو الجديدة دي , و أنا كل مستخدم جديد للويب3 من اللي بابعت لهم ” إيفايت ” بيبعت ليا ” توكين ” .. التوكين بتاعه بيعمل ” أتاتش ” .. و بيـ ” ستاك ” علي ال ” ماتريكس ” بتاعت ال ” بلاتفورم ” , أول ما بـ ” ديكريبت ” الـ ” هاش ” بتاعه … هو بيـ ” شفّت ” “بالانس ” علي قد وقت ال ” برووف ” . 🤣🤣🤣

… الكام كلمة اللي فاتوا دول .. و كل كلمة أنا حاططها بين علامتين ” .., كفيلين إنهم يخلوا عقل أغلب الناس اللي مش متمكنة في التكنولوجيا بشكل حقيقي .. و لكن سمعوا شوية مصطلحات زي دي قبل كده .. إنهم يقولوا آمين . … و إنت مش حتعرض أو تبيع الخدعة بتاعتك .. إطلاقاً .. إنت ببساطة حتقول الكلمتين دول .. و حتستني الزبون هو اللي يطلب منك إنك ” تستثمر ” له القرشين اللي هو محوشهم . .. حتاخد القرشين بتوعه .. و بتوع الزبون التاني .. و بتوع الزبون التالت .. و تشغل أقدم طريقة نصب عرفها البشر ( من دقنه و إفتل له … أو في رواية أخري .. bonzi scheme ) .. أو في رواية أخري أجنبية : the bernie madoff scheme .

… …

الطريقة اللي تحمي نفسك بيها إنت و اللي يهموك من إن حد ( يتوهك ) بالشكل ده .. هو :

إعقلها ببساطة .

أمي ربنا يحميها و يحفظها و يبارك فيها .. علمتنا الكلمة دي ( إعقلها ) و الأسلوب ده من بداية طفولتنا . …

بمجرد ما يكون عندك شوية منطق بنتعلمهم و إحنا أطفال .. تقدر تفهم إن :

• مافيش مكسب مجاني .
• أى مكسب من غير مجهود , معناه إني بيتنصب عليا .
• قالوا الجمل طلع النخلة … طيب .. آدي الجمل و آدي النخلة .

خوف الإنسان من إنه يخسر الفرص ( fear of missing out ) + الطمع .. أسهل طريقة تلبس بيها العمة و تكون زبون .

رجاء .. رجااااااااااااااااء .. ماتخليش حد يكلفتك فتفاصيل مالهاش معني .. و إتأكد إن لحد ما تقوم القيامة إن شاء الله .. أسس الحياة واحدة .. الأدوات بتختلف .. ماتركزش في الأدوات … و ركز في الأساسيات ..

و الله أعلم .