ماشترتش ليه في الأراضي .. أيام ما كانت الأراضي برخص

سؤالي مش حتشتري ولا لا ... سؤالي هو .. بعد ما تشتري .. حتعمل إيه ؟

AR 6 د

ماشترتش ليه في الأراضي .. أيام ما كانت الأراضي برخص التراب ؟! .. السؤال الهزلي العبثي الجميل ده , بيكون جزء من أى نقاش بين جيلين مختلفين , و مش حادخل إطلاقاً فتفاصيله .. بس حاسأل .. طيب .. تعالي نرجع بالزمن لسنة 1923 .. 100 سنة بس لورا يعني .. متخيل سعر أى قطعة أرض حيكون قد إيه تقريباً ؟ .. سؤالي مش حتشتري ولا لا … سؤالي هو .. بعد ما تشتري .. حتعمل إيه ؟ … لو نزلت تاخد جولة في أروقة المحاكم و المصالح الحكومية , أراهنك إنك حتلاقي عدد ضخم من قضايا النزاع علي الأراضي بالذات . نزاع بين ملاك و عرب . نزاع بين ملاك و دولة أو أوقاف . نزاع بين ملاك و واضعين يد . نزاع بين ملاك و ملاك تانيين .. لأن اللي باع لهم ماحددش حدود صح .. أو نصب علي حد فيهم . … الناس اللي في الخناقات دي كتير منهم بيعيش و يموت علي أمل إن النزاع بتاعه يتحل .. و ياخد حقه .. و يبيع .. و يبقي من أصحاب الملايين .. وأحياناً المليارات . و كتير جداً منهم للأسف بيموت هو و أولاده .. و مابيشوفش حلمه ده بيتحقق . … مع إنه عمل الصح ( فوجهة نظره ) زمان .. و إشتري أيام ما كانت الأراضي برخص التراب ! . مش كده ؟! .. … فوجهة نظري … ده ماكنش الصح إطلاقاً … إطلاااااااااقاً … ده كان المناسب ليهم فوجهة نظرهم زمان .. لأن ماكنش عندهم الكتير من الحلول الأخري . … … لكن لو شخصياً رجعت في الزمن لسنة 1923 .. مش حاشتري .. و لكن حابني .. و ححاول أفضل أبني لحد آخر لحظة فعمري .. و كل ما كان البناء اللي بابنيه مبذول فيه جهد أكبر , كل ما حتلاقي إنه أسهل إنك تحميه .. خليني أشرح : … لو كنت سنة 1923 ( بنيت ) ورشة صغيرة علي قطعة أرض صغيرة .. و قضيت شوية وقت في ممارسة مهنتك أو حرفتك جوة الورشة دي . و بعدين بدأت تفكر بنفس المنطق .. و قررت إنك ( تبني ) وسائل إنتاج بتعتمد علي حرفتك .. و ( تبني ) شبكة من العلاقات .. ( تبني ) بيها في الآخر خط إنتاج لسلعة أو منتج معين .

متخيل صعوبة إن حد ييجي و يحاول يشيلك من الدايرة دي ؟ .. .. طيب .. متخيل إنك بعد ما ( تبني ) اللي فات ده .. بعون الله أصبح معاك شوية فلوس و موارد كويسة .. و لكن وقتك و مجهودك محدودين .. فتبدأ ( تبني ) أجيال جديدة و تعلمهم و تديلهم فلوس و موارد .. مقابل إنهم يشغلوا لك ( البناء ) اللي إنت بنيته و كبرته . .. و هكذا و هكذا .. … أنا عارف إن الكلام اللي كاتبه نظري ده يبدو ساهل جداً في التخيل بتاعه .. و إن الواقع بيكون أشد قسوة و صعوبة و مليان بتجارب فشل كتير جداً جداً ..

لكن رهاني هو علي ( النسبة ) .. كام واحد حاول يشتري لمجرد ال ( تسقيع ) .. و خسر لأنه ماستغلش اللي إشتراه . و كام واحد إشتري .. و حاول ( يبني ) .. و فشل و خسر ؟

و البناء هنا ماقصدش بيه إطلاقاً ( مباني سكن ) .. ولا مجرد ( مطعم زيادة وسط شارع مليان مطاعم ) أو حاجة تعملها عشان تهدي ضميرك و تسكنه و تقول ( ما أنا بنيت ) . لا .. البناء اللي أقصده هنا ( بناء فعال يحل مشكلة ) .. يعني لو ربنا مديلك موارد و قدرة شرائية .. دي مسئولية تخليك تفكر .. طيب .. أنا ممكن أبني إيه أحل بيه مشكلة ( و فنفس الوقت يكون مربح بالنسبة لك طبعاً ) .. مش مجرد عمل خيري . … … متأكد إن عند النقطة دي ( لو إنت من الخمس أو ستة أفراد اللي بيكملوا قراية بوستاتي لحد الآخر يعني 😅 ) بدأت تفكر في حاجات زي :

الأدوات اللي كانت متاحة لأجدادنا , مش هي إطلاقاً الأدوات اللي باقول لك تستخدمها دلوقتي ..

زمان , سنة 1923 .. كانت الأراضي برخص التراب . دلوقتي , سنة 1923 .. مساحات الإنترنت برخص التراب .

أراهنك إن كمان 100 سنة ( ربنا يدينا و يديك طولة العمر بقي ) إن مساحات الإنترنت دي حتكون بأسعار فلكية , و أحفادك حيسألوك ( إنت ماشتريتش ليه ؟! ) .

بس زي ما كتير من اللي إشتروا أراضي سنة 1923 .. مش قادرين ياخدوا حقوقهم دلوقتي .. كتير من اللي بيشتروا ( assets ) بس حالياً , بدأوا يحسوا بمدي صعوبة حمايتهم لل( assets ) دي بمجرد ما بيواجهوا أى هجوم من حد أقوي منهم .

لكن اللي بيبني دلوقتي , و بيبني فعلاً .. مش مجرد بيعمل صفحة فيس ولا قناة يوتيوب أو تيكتوك و يقعد جنبها … لا .. اللي بيبني دلوقتي فعلاً .. و بيشتغل علي بناءه .. و بيحاول يتعلم كل يوم جديد عشان يحسن أياً كان اللي هو بينتجه ( حلول أو كونتنت ) . هو ده اللي بدأ فعلاً بيكسب صح . … … لو كنت إشتريت أرض سنة 1923 و حبيت تبني فيها أى شيء , كنت حتلاقي أدوات بتسهل عليك الموضوع .. و تخليك تحمد ربنا إنك عايش فعصر فيه طرق ممهدة , و قطر يجيب لك البضاعة لحد عندك .. مش زي الناس سنة 1823 … كنت بتحتاج أيامها تركب الناقة بتاعتك فوسط قوافل بتعدي من بلاد و بلاد عشان تجيب نفس مقدار البضاعة ده .

.. دلوقتي , إنت معاك أدوات ماكنش يحلم بيها أى ( بنّاء ) سنة 1923 . أكاد أراهن إن 90% من الأفكار اللي فعقلك ممكن تنفذها من غير ما تكتب سطر كود واحد .

و حالياً .. حتي لو إنت محتاج تكتب ( كود ) , الموضوع أصبح أسهل ما يكون . و لو محتاج تصمم ( جرافيكس ) .. أصبحت مش محتاج غير وصلة إنترنت و شوية وقت صغننين .

… web3 حيكون أحد المواضيع اللي حتبقي mainstream قريب .. يعني فجأة كده حتلاقي كل البرامج الإعلامية بدأت تتكلم عنه .. حتلاقي صحابك اللي مالهومش في التكنولوجيا بدأوا يتكلموا عنه ..

حتلاقي فجأة نفسك بتسأل .. هو أنا مابنيتش في web2 ليه ؟! .

أنا ممكن أتكلم عن تفاصيل التقنيات دي فبوست منفصل أو في فيديو لايف .. و لكن لحد ما تمسك فاس بإيدك .. و تحاول تكسر شوية صخر بنفسك .. و تحاول ترصهم عشان تبني جدار .. و بعدين يقعوا قدامك و تفهم إنك محتاج تتعلم إزاي تبني صح .. مهما قعدت أشرح لك مبادئ الهندسة المعمارية .. مش حيغنيك عن إنك تحاول في الأول بنفسك .

… رجاء .. فكر .. ده أصبح أكتر مجهود إنت محتاج تعمله دلوقتي .. إنك تفكر .. تتخيل .. و أصبح في ألف آداة و آداة .. وظيفتهم يسهلوا لك تنفيذ أفكارك دي .. بس فكر و إتخيل إنت ..

و عرفني لو محتاج مساعدة .. فعلاً عايز أسمع أفكار .

*** دي صورة العتبة الخضرا سنة 1923 *** the image is : Ataba Khadra Square in Cairo Photo By Max H. Rudmann 1923 link in first comment