متخيل ( أكوا عرب بالطيارة ) .. أغنية هزلية كمان 1400 سنة ك ( إحنا غرابا عك عك )

… بقالي يومين شايف الدوشة اللي حاصلة علي ( PUBG ) . و موضوع المود الجديد اللي فيه بي( يتوسل - يتعبد ) اللاعب قدام ( طوطم - صنم ) عشان يمن عليه ال ( طوطم - صنم ) ده بهدايا و حاجات جوة اللعبة . … إنطباعي الأول عن الموضوع بمجرد ما سمعته .. لسة ماتغيرش بعد يومين من التفكير فيه .. ألا و هو :

• هو يعني إيه ( عبادة ) ؟!
• هو IQ الكفار زمان اللي كانوا بيعبدوا الأصنام .. و تسلسل أفكارهم كان إيه ؟! … … أحد أكتر الحاجات اللي ساعدتني إني أفهم ( إسلامي ) و (عقيدتي ) بشكل أفضل بكتير .. هو إني من فترة طويلة .. غيرت رؤيتي و نظرتي لل ( كفار ) و ال ( مشركين ) . من الصورة الهزلية اللي كنا بنشوفها في الأفلام المصرية القديمة .. و قصص الأطفال .. لصورة قد تكون أوقع بكتير .. .. و هما إنهم كانوا ناس ( قمة في الذكاء و الدهاء و التعقيد الفكري و الوعي ) . ناس كانوا ( أباطرة عصرهم في الإقتصاد و التجارة و السياسة ) . ناس كانوا ( وصلوا من الرقي الفكري .. ما يتطلب إن دعوتهم لجدال أو مناقشة .. يرقي عن الإعجاز البصري .. و يكون إعجاز عقلي ) . … يعني : لو إنت عايز تبهر طفل و تقنعه … إعمل قدامه خدعة سحرية بصرية أو سمعية .. حينبهر و تجذب إنتباهه و تقدر تخليه يعمل اللي إنت عايزه . .. لكن لو عايز تجادل إنسان عاقل واعي جداً … مهما وريته إعجازات بصرية أو سمعية .. حيفكر فيها ك ( خدعة ) … و قبل ما ينبهر بيك و بقدرتك الإعجازية .. حيفكر فكل الطرق اللي إنت ( بتخدعه ) بيها .. و يحاول يفند و يعلل اللي حصل قدامه . … … و ده هنا يخليني أرجع أفكر في ال ( مشركين و الكفار ) . دول ناس تاريخياً مش بعيدين جداً عنا .. 1400 سنة مش بعيد أوي .. لو فكرت فيها بالنسبة للوجود البشري علي الأرض ( حضارة سبعتلاف سنة ولامؤاخذة يعني ) . و بالتالي .. البشر عاشوا تقريباً 5000 سنة مثلاً علي الأرض علي الأقل .. ( لو بنحسب من أول حضارة السبحتلاف سنة ) . و زرعوا .. و بنوا .. و تزوجوا .. و تاجروا .. و حاربوا بعض .. و عملوا تحالفات و إمبراطوريات .. قبل ما يكون في دعوة للإسلام . … فبالتالي .. صعب جداً إننا نتصور العرب في الوقت اللي الرسول صلي الله عليه و سلم جه فيه .. إنهم ناس همج و بيمشوا عرايا في الليالي زيهم زي القرود مثلاً .. . بالعكس .. قريش دول كانوا مركز التجارة العالمي بين تلات قارات .. و كان في قوافل تجارية رايحة جاية .. فيها من التبادلات الثقافية و الحضارية .. ما يكفي إننا نقدر نعتبر قريش في الوقت ده شبه ( نيويورك ) أو (دبي ) مثلاً دلوقتي .. .. اللي هو عايز تحقق أحلامك في الدنيا .. روح إفتح محل هناك .. حتلاقي زباين من كل حتة . … … هل من العقل بقي .. تصور إن الناس دول ( قريش يعني ) .. كانوا بيعبدوا الأصنام .. بدون عقل أو سبب أو داعي .. بقوة ( تحضرهم و ثقافاتهم ) دي ؟! … … إطلاقاً .. … بل إني أكاد أدعي .. إن لو في حد من نخبة كفار قريش ( ال20 الجامدين مثلاً ) .. حد من القادة بتوعهم … سافر في الزمن .. و حضر وقتنا الحالي .. أكاد أدعي إنه حيقدر يقنع أمم كتير جداً من اللي عايشين دلوقتي بعبادة ( هُبل و باقي الأصنام اللي كانت موجودة زمان ) . و إنه حيقدر يكون من أباطرة التجارة و الإقتصاد و السياسة الحاليين عالمياً برضو .. و إن ممكن جداً تلاقي جامعات مختلفة بتدرس كورسات و كورسات في عبادة ( هُبل و باقي الأصنام ) . … و إن من أتباع ( هُبل و باقي الأصنام ) .. حتلاقي كتير من الناس اللي ( يعجبك أموالهم و أولادهم ) = يعني موضة أخر حاجة .. و إنفلونسرز .. و سكس باكس .. و شياكة و فلل و مراسى و هاسييندا و دبي و ما شابه … … … … يا جدع الناس بتوع قريش دول كانوا من القوة الإقتصادية و السياسية إنهم كان براحتهم يعينوا مين ملك و مين رئيس من غير ما حد يعارضهم . زي لما عرضوا حاجات كتير علي رسول الله صلي الله عليه و سلم منها ” إن كنت تريد ملكا ملكناك علينا ” . … متخيل هنا قوة ناس معينين .. فواحد من أهم مراكز التجارة في العالم .. بيعرضوا منصب خطير زي ده .. ضمن صفقة حاجات تانية أساساً .. متخيل قوة الناس دي ؟! … … … طب الناس دي .. لما كانت بالقوة العقلية و المادية و الوعي و كل الحاجات الحلوة دي … عملوا التصرف اللي إحنا شايفينه دلوقتي ( هزء ) .. و بنضحك عليه (اللي هو عبادة الأصنام يعني ) .. ليه ؟! كان طريقة تفكيرهم إيه ؟! … … الصراحة إن إجابة السؤال ده .. محتاجة بوستات و بوستات مختلفة .. بل بحث كتير و متعمق في طبائع البشر .. ده مش وقته … و لكني حابب إني أسيبك مع شوية أفكار بسيطة يعني ولا مؤاخذة . … … 1- كتير مننا ماسك فإيده ( موبايل ) .. عايش بيه .. قطعة من المعدن و البلاستيك .. معدن و بلاستيك بنرميهم فأى مكان لعدم أهميتهم أحياناً زي قزايز المية و الخردة .. بإهمال .. بالظبط زي ما ( العجوة ) .. كانت مادة فقمة البساطة و التداول فشبه الجزيرة العربية .. و كانت الحاجة اللي بينضرب بيها المثل فتوافرها و ال ( Abundance ) بتاعها : ” اتقوا النار ولو بشق تمرة ” . و سبحان الله دلوقتي إحنا بنفكر إزاي نقلل الإستخدام العالمي للبلاستيك برضه .. المهم .. ..
• كتير مننا بيقدس موبايله .. تقديس حرفي ..
• بنولي له وجهنا .. و إهتمامنا ..
• بنفتحه كل دقيقة و كل ساعة و إحنا علي أمل رسالة مختلفة منه .. منحة جديدة من ال ( دوبامين ) .. من ال ( إهتمام ) .. من ال ( معني لحياتنا ) .
• كتير مننا بيقدم له القرابين بشكل مستمر .. من الفلوس و الصور و الداتا و ( تعبنا مجهودنا ) . … 2- كتير مننا عالمه بيدور حوالين صنمه ( أقصد موبايله ) .. لدرجة إن فكرة الجلوس صامتاً شوية .. و التأمل .. و التدبر .. و التفكر .. بتعتبر دلوقتي نشاط من أصعب الأنشطة اللي ممكن تعملها .. و بنسأل .. (إزاي ؟! ) .. إزاي ( نفكر ) ؟!!! دي حاجة صعبة أوي .. … 3- كتير مننا عنده أكتر من صنم ( أقصد موبايل ) .. بأحجام مختلفة .. صنم 6 بوصة … صنم آيفون .. صنم (لابتوب ) .. صنم 50 بوصة ( تيليفزيون ) . … 4- كتير مننا بيقعد هو و أهله و عشيرته يتعبدوا و يسمعوا و ينصتوا لصنم واحد ( شاشة واحدة ) . و يقتنع باللي بيمليه عليهم .. و يسمع لهم .. حتي لو كان ضد عقله .. حتي لو كان ضد المنطق .. بس طالما سمع ال( صنم = تيليفزيون ) بيقول شمال .. يبقي شمال .. و لمين يبقي لمين . … 5- كتير مننا بيضيع مواعيد و صلوات و تفاصيل و حاجات كتير … فسبيل تقضية وقت أطول مع أصنامه ( أجهزته ) ..
  … 6- كتير مننا أطفالهم شايفينهم عايشين بالمنظر ده .. و لو جيت كلمت طفل عنده 8 سنين مثلاً دلوقتي إنه مش المفروض يقضي وقت طويل قدام صنم ( موبايل ) .. طبيعي يرد عليك .: هذا ما وجدت عليه آبائي و أجدادي . … 7- كتير مننا بيشكي لصنمه .. و يناجيه .. يسر إليه بأسراره .. يصاحبه .. و يحبه .. و … … 8- كتير مننا لما صنمه دلوقتي حرفياً بيطلب منه القيام بأفعال جسدية معينة .. بيعملها بدون تفكير ( كمسابقات الرقص و ما شابه ) .. فرقت بقي إن أحد حركات الرقص دي لسة ماوصلش إنك تلزق جبهتك بالأرض لمدة معينة من الزمن ؟!!! يعني لما يكون المسابقة إنك تحرك رجلك لمين .. و تحرك رجلك شمال : Left Foot Up, Right Foot Slide .. علي رأي drake . إيه اللي حيفرق لما تيجي الأغنية الجاية بي : stick your forehead to the ground , and your palms and your knees . … 9- كتير مننا عارف و مدرك كويس إن الأصنام دي ( الموبايلات ) .. مش آلهة … إحنا مش عبطة أو مجانين أكيد .. هي مجرد تواجد مادي .. لكيانات قوية جداً .. متحكمة جداً .. زي : فيسبوك إنستاجرام يوتيوب تيك توك واتس آب … بالظبط زي ما كان مشركين و كفار ( قريش) .. مش عبطة ولا مجانين .. مين العبيط اللي حيعبد صنم عجوة ؟!! .. صنم العجوة ده مجرد تواجد مادي .. لكيانات قوية جداً .. متحكمة جداً .. زي : هوبال دوت كوم منات دوت كوم عزة دوت كوم مسر دوت كوم يغوث دوت كوم … 10- جرب دلوقتي كده تروح علي شوية شباب قاعدين علي القهوة .. و كل واحد فيهم ماسك ( صنمه = موبايله ) .. و تدعوهم لل ( تفكر في الله ) و ( عبادته ) و … و غالباً حتلاقيهم باصين لك بشك إنك ( ههههههههههه ) .. ( قَالُوا يَا صَالِحُ قَدْ كُنتَ فِينَا مَرْجُوًّا قَبْلَ هَٰذَا ۖ أَتَنْهَانَا أَن نَّعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِّمَّا تَدْعُونَا إِلَيْهِ مُرِيبٍ ) سورة هود (62) … ======================= البوست طول زيادة عن اللزوم .. بس حابب أسأل سؤال أخير .. ( هي إيه العبادة فوجهة نظرك ؟! ) 🙂 … و الله أعلم .