الكيف ... بيذل

الكيف … بيذل .. ( ليه باكره الماركتنج .. بالرغم من إنه جزء كبير من شغلي ) ..

1- في الفيلم الرائع ” الكيف ” .. (جميل راتب )بيجبر (يحيي الفخراني ) إنه يتعاطي مخدرات بالقهر .. لحد ما يوصل ( يحيي الفخراني )لمرحلة الإدمان .. و يبدأ يطلب المخدرات دي .. حتي لو بالذل . … … 2- إبنك الصغير .. من سن السنتين مثلاً ل 5 سنين .. جرب إنك تقدم له ( شوكولاتة , حلويات مسكرة , أى حاجة فيها سكر كتير من أى نوع ) .. أول مرة .. حتلاقيه بيجربها علي إستحياء و خوف … بعد كده .. غالباً حتندم علي اليوم اللي عودته علي الحاجات دي فيها .. و حيبطل يستطعم بأى نوع من الفواكه أو الأكل التاني … و حيفضل يطلبها بإدمان … و يذلك . … … 3- عمري ما فرق معايا أنواع اليخوت ( جمع يخت ) .. و لما باتخيل رحلة بحرية جميلة .. مابيفرقش معايا كتير نوع الشيء اللي حاركبه .. يخت أو مركب أو حتي قارب صغنن مثلاً .. و لكني متأكد .. بنسبة مليون في المية .. إني بمجرد ما حاعمل شوية ريسيرش .. و شوية ريسيرش أكتر كمان .. و أعرف عن أنواع اليخوت المختلفة .. و إمكانياتها .. و قدراتها .. قلبي و عقلي حيتعلقوا بنوع معين منهم .. و حيملي عليا كل أفكاري .. و أبدأ ماشوفش أى شيء تاني في الحياة .. غير إني عايز أقتني اليخت ده . و أفقد طعم كل شيء تاني غيره .. ممكن أخدع نفسي و أقول لنفسي إني ( إشتغلت كتير عشان أحقق هدفي و أقتني اليخت ده ) .. و لكن جزء جوايا حيفضل متأكد .. إني ممكن أكون ذليت نفسي كتير و فحت نفسي شغل علي حساب حاجات تانية كتير أهم ” من وجهة نظري ” .. عشان أوصل ل ( كيفي ) . … … 4- أنا مدمن مسلسلات أنيمي من زماااااان .. الطويلة دي اللي بتوصل 200 و 300 حلقة .. و خلال حياتي .. كتير قضيت أسابيع طويلة مابعملش حاجة غير إني باتفرج علي مسلسل .. بس .. يعني أصحي و أتفرج علي المسلسل حلقة بعد حلقة .. و أنام .. و هكذا .. ماقومش من قدام الشاشة غير عشان أدخل الحمام .. و أصلي .. و آكل قدام المسلسل .. عملت ده كتير … جداً .. .. مسلسلات كتير من النوعية دي .. أول 10 حلقات فيهم .. كانوا بيبقوا الملل بعينه أحياناً .. اللي هو باعصر علي نفسي لمونة عشان أتفرج عليهم .. لكن بعد ما باخلص أو كام حلقة .. بابقي إتعلقت بالمسلسل .. و الأبطال .. و الأحداث .. و أوصل إني بابقي مش عايز أعمل اى شيء تاني في الحياة .. غير إني أتفرج علي الحلقة اللي بعدها … و اللي بعدها .. و هكذا .. و نفس الموضوع بالنسبة لل( فيديو جيمز ) .. … الموضوع ده ساعدني جداً أفهم المبدأ بتاع ( الكيف بيذل ) .. … … 5- من بداية وعينا .. بنبدأ نلاقي نفسنا عندنا القدرة علي الإختيار ..

• معايا شوية وقت .. يا تري أختار أصرفهم في إيه ؟
• معايا شوية مجهود .. يا تري أختار أصرفهم في إيه ؟
• معايا شوية فلوس .. يا تري أختار أصرفهم في إيه ؟ … … 6- للأسف .. كتير بنخطئ و نفهم ( حريتنا ) غلط .. إنها قدرتنا علي إختيار اللي علي ( مزاجنا ) .. و ( كيفنا ) .. .. و إن طالما أنا الوقت بتاعي ( و فأجازة مثلاً ) .. ماحدش ليه يسألني باعمل إيه .. و أقضي وقتي في اللي علي ( كيفي ) . … و إن طالما الفلوس جبتها من شغلي .. ماحدش ليه يسألني باعمل إيه بيها .. و أصرفها في اللي علي ( كيفي ) . … … 7- و بننسي .. بننسي إن ( كيفنا ) ده .. ممكن جداً مايكونش من الأساس (إختيارنا) .. و يكون شيء تم إجبارنا عليه .. بالظبط زي ما ( البهظ بيه - جميل راتب ) .. أجبر ( يحيي الفخراني ) علي المخدرات . … … 8- حملة الدعايا اللي إتعملت علي ( موبايل سامسونج نوت 10 برو ) من سنة كانت خرافية .. للدرجة اللي خلتني أفكر كتير جداً أبدل موبايلي الحالي ( سامسونج نوت 9 -512 جيجا ) بيه . و لأن شغلي ليه علاقة كبيرة بسوق الموبايلات و إمكانياتها .. ماكنش ينفع أحمي نفسي من إني أتعرض لإجبار ال(بهظ بيه - الدعايا بتاعت الموبايل ) .. و كنت كل شوية أسأل نفسي … أنا فعلاً محتاج الإمكانيات بتاعت الموبايل الجديد ؟ .. و ها هي حملات الدعايا علي ( سامسونج نوت 20 ) شغالة علي أشدها حالياً .. و لسة حاتزيد خلال الأسبوعين التلاتة القادمين 😭 … … 9- قرارات كتير صغيرة بناخدها فحياتنا ( و بنصرف فيها مجهود أو وقت أو فلوس ) .. بدون ما نفكر فيها لمدة كافية .. و مابندققش أوي علي ( إحنا قررنا كده ليه ) .. فلما بنوصل عند مرحلة إننا محتاجين ناخد قرار كبير .. قرار يتطلب إنك تصرف مجهود كبير شوية ( شغل مثلاً ) .. أو وقت كتير شوية ( دراسة ما أو شغل ما برضو ) .. أو فلوس و وقت و مجهود ( زواج , دراسة .. أو شغل برضو ) .. .. بنلاقي نفسنا ( في حيرة من أمرنا ) .. و نبدأ نصلي إستخارة كتير مثلاً .. و بعدين نعمل سيرش علي ( إزاي أعرف نتيجة صلاة الإستخارة ؟ 🤣) .. و ندور علي حد ياخد لنا القرار بدالنا .. .. أو بناخد القرار بشكل عشوائي .. كأننا بنرمي عملة مثلاً .. و لو طلعت ملك حناخد القرار .. و لو طلعت كتابة .. مش حناخد القرار .. … … 10- في حين إن في بوصلة داخلية ربنا خلقها جوانا و خصنا إحنا بيها ( البشر فقط ) … بوصلة مش موجودة فأى كائن حي تاني .. بحيث إنك حتي لو مش عارف توجه عقلك و قراراتك فين … فحتخليك تعرف تهرب ب( عقلك و قرارات ) من الإتجاه المضاد .. الإتجاه المضاد اللي هو : ( النفس ) .. و أمراضها .. … … 11- ليه عايز تشتري الهدوم الغالية الماركة العالية ؟ عشان تمشي في الشارع متفاخر .. متكبر .. و تحس إنك مميز و أعلي من اللي حواليك .. فتكون النتيجة إنك تتذل أكتر عشان تجيب تمنه من الفلوس .. و تتذل بالكيف لما تشتريه .. و تبقي خايف عليه و يقيد حريتك إنك تقعد علي رصيف مثلاً .. او تجري بيه براحتك . … … 12- ليه غضبان و تعيس و متضايق و مخنوق معظم الوقت ؟ بنسبة كبيرة لأن : (البهظ بيه = الدعايا و الإعلانات يعني ) أجبرك علي إنك تتمني حاجات كتير جداً .. إنت أساساً ماكنش عندك معلومات عنها .. فعمر ما قلبك أو عقلك كان حيطلبها .. ( سلع إستهلاكية كتير .. رحلات لأماكن سياحية معينة .. رفاهيات كتير … و هكذا ) .. .. عالمنا الحالي مليان بالكتير و الكتير من ( البهظ بيه = الماركتيرز ) .. المحترفين إنهم يخلوك تتمني و تطلب حاجات معينة .. … و تبقي متضايق .. و ذليل قدام نفسك .. إنك مش قادر تحصل علي الحاجات دي .. أو تذل نفسك فشغل أو حياة معينة … عشان تحصل علي ال ( كيف ) ده . … … 13- ال ( كراش ) اللي بتكراش عليه من ( الفريندز علي الفيسبوك ) .. أو إنستاجرام .. أو الممثلات .. أو أياً كان .. هل كنت حتكراش علي حد إنت أساساً عمرك ما شفته ؟! يعني لو ماكنتش عملت (فولو) للشخصية الفلانية ( البهظة بيه ) .. اللي كل شوية بتنزل صورها بنكهات و أوضاع و أشكال مختلفة … بحيث إنك تكتشفها .. و بعدين تتعود عليها .. و بعدين تدمنها .. و تبقي بتصرف كل يوم جزء من وقتك و مجهودك فإنك تتفرج علي صورها و فيديوهاتها الجديدة .. و عند مرحلة معينة … تذل نفسك قدام نفسك و قدام اللي حواليك .. كل ما تحس بإنك غير قادر علي الحصول عليها .. و تفضل دايماً حاسس بنوع من أنواع العجز و إنك قليل .. لأنك متأكد إنك غير قادر علي الوصول لل (كيف ) ده .. .. و لو كان عندك الموارد إنك توصل لل(كيف ) ده .. و تضحكها 😅😉 .. فإنت برضو بعد فترة حتعتادها .. و تلاقي نفسك متابع ( بهظة بيه ) تانية .. و تذل نفسك عشانها .. و هكذا . … … 14- عيد مغنطة بوصلتك .. و إتأكد .. إنها بتشاور علي الإتجاه اللي إنت بتقرره .. مش الإتجاه اللي ( البهظ بيه - أياً كان مين أو إيه ) .. أجبرك إنك تتعاطاه .. … … 15- بالمناسبة .. بمجرد ما بتعمل كده .. حتلاقي إنك عندك ثروة و وفرة من ( الوقت و المجهود و الفلوس ) .. و إنك بتقدر تستثمر بحرية كاملة .. و بشكل مستقل عن ( أمراضك النفسية اللي بيستهدفها البهظ بيه ) .. .. و حتلاقي إنك بالرغم من إنك تقدر تشتري أغلي أنواع الحلويات … إلا إنك طعم الفواكه الطبيعية أصبح مسكر جداً بالنسبة لك .. و كافي جداً .. .. و حتي لو كل فترة طويلة .. كلت قطعة جاتوه مثلاً .. أو جربت نوع حلويات معين .. و حسيت إن ( البهظ بيه ) صحي جواك .. و عايزك تاكل قطعة حلويات تانية … حتبقي قادر تتعرف عليه من بدري .. من قبل ما يقدر يجبرك علي تعاطي كم كافي من المخدرات .. .. و حتهرب منه .. و تجبر نفسك علي التخلص من الكمية الضعيفة من المخدرات دي .. … … قبل ما تتذل .. … … و الله أعلم .