كل ما أشوف قدرة الناس علي الجدال في الباطل و

كل ما أشوف قدرة الناس علي الجدال في الباطل و العبط و الغلط بالكبر و العند : …

• تحرش مين يا جدع .. دي شوية حريم مش لاقية رجالة تلمها .
• إيه اللي وداها هناك ؟ , إيه اللي لبسها كده ؟ .. هي الغلطانة و اللي عايزة كدة .
• الست تحب الراجل اللي يشكمها .. مخلوقين من ضلع أعوج يا جدع .
• مافيش ست تمشي كلامها عليا .. الراجل كلمته من دماغه .
• و غيرهم … …
• ألبس كمامة ليه ؟ .. الرب واحد و العمر واحد يا جدع .
• ألبس كمامة ليه ؟ .. هو إنت منهم ؟ .. من اللي بيخافوا ؟ .. إسترجل و إشرب بيريل يا جدع .
• ألبس كمامة ليه ؟ .. إنت بتصدق في الكلام ده يا جدع .. كورونا ده كدبة كبيرة و لعبة مخابرات ماتدخلش عليا .. كبر دماغك .
• ألبس كمامة ليه ؟ .. كورونا ده مايأذيش اللي زيينا .. إحنا معدتنا متربية عالفول .. تهضم الزلط
• ألبس كمامة ليه ؟ .. يا عم إحنا بلد مذكورة في القرآن و ربنا حامينا .. سيبها علي الله .
• و غيرهم … …
• أنا ماحدش يقدر عليا .
• أنا دماغي توزن بلد .. و دي طريقتي و ده أسلوبي و شفت من الدنيا كل اللي ممكن تعلمه ليا خلاص .
• كلام الكتب و الكراريس ده عشان المدارس .. إنما إحنا الحياة علمتنا .
• إنت عارف إنت بتكلم مين ؟
• و غيرهم . … …
• أنا باشرب السجاير بمزاجي مش عشان مدمنها و أقدر أبطل وقت ما أحب .
• أنا باحرق همومي في السيجارة .
• أنا جدي عاش لحد 90 سنة و كان بيشرب 10 علب سجاير في اليوم .
• و غيرهم . … …
• المصلحة عايزة تفتيح الدماغ .. المثالية دي مابتأكلش عيش .
• اصرف ما في الجيب يأتيك ما في الغيب .
• ما كله بيعمل كده .. هي جات عليا أنا .
• ملعون الجنيه اللي ماينزهش صاحبه .
• الحرامية بس هما اللي بيكسبوا .. عايز تكسب لازم تبقي زيهم .
• و غيرهم . … … … و غيرهم .. … كل ما بافتكر : ..
• طب إيه الحكمة من الألم و الحروب و المشاكل اللي في الأرض .. ربنا خلق ده كمان ؟
• طب أنا كان نفسي فكذا و كذا و كذا .. و صليت و قرأت قرآن .. و ماحصلش .. يبقي إيه الإثبات إن الصلاة و قراءة القرآن مؤثرة ؟!
• أنا باحب غير و متسامح و باعمل خير .. ليه لازم يبقي في مسميات بقي .. كفاية كده .. و خلي الدين بعيد .
• الأديان هي أساس كل المشاكل البشرية من بداية التاريخ .. و دليلي فده المسلسل التاريخ ” جيم أوف ثرونز 🤣🤣”.
• أنا متدين و كل حاجة .. بس باطبق اللي أنا فاهمه بس .. فأنا مش فاهم يعني ليه لازم أصلي خمس مرات في اليوم … أنا باصلي لما باحس إني محتاج نفسياً إني أصلي .

• العبارة السابقة دي والله العظيم نصاً من أحد حواراتي زمان مع شخص ذو مركز و مقام إعلامي معروف نسبياً * .

• أنا ماكنتش موجود أيام الرسول صلي الله عليه و سلم .. فبالتالي أنا مش حاصدق في اللي ماشفتوش .
• و غيرهم … كتيييييييييييير جداً جداً . … … … … قدرة الإنسان إنه يخدع نفسه بنفسه … و يصدق أوهام كتير جواه .. غير محدودة فقوتها و تأثيرها .. و ده فكل الجوانب .. مهما إعتنقت المنهج العلمي فتفكيرك المبني علي إنك ماتصدق غير بكل ما تم إثباته علمياً عن طريق التجربة و الرياضة و المعادلات . مش حتقدر تتخلص من بشريتك .. من رغباتك و مشاعرك و مخاوفك و غرائزك … من كل حاجة جواك بتلون قراراتك بشكل غير منطقي معظم الوقت . … و بكل ما فينا من ( عند و كبر و أنانية و خوف و نقص ) .. بنبدأ نبني أصنام صلبة صلدة جوة عقولنا من .. من أفكارنا .. … و مهما كتير حوالينا حاولوا إنهم يوضحوا لنا إنهم هما كمان عندهم ( أصنامهم ) الداخلية الخاصة بيهم .. بنتخانق معاهم .. و نحاول نشدهم لأصنامنا و افكارنا … و هما يشدونا لأصنامهم و أفكارهم . … … إحنا محدودين جداً .. محدودين فقدرتنا علي تخيل حاجات معينة خارج إطار مفاهيمنا .. خارج إطار محدوديتنا .. مانقدرش نتخيل ما ليس له نهاية .. مانقدرش نتخيل ما ليس له بداية .. مانقدرش نتخيل ما ليس له وقت .. و سبحان الله الرحيم .. إنه خلق لنا في الكون .. عدد لا حصر له من الآيات .. اللي تثبت لنا بلا مجال للشك أو الجدل .. محدوديتنا دي .. .. إختار مثلاً أكبر عدد ممكن تتخيله .. ماتقدرش .. إختار أبعد مكان في الكون ممكن تتخيله .. ماتقدرش .. إختار أكبر إستقلالية ممكن تتخيلها عن ضعفك .. بطل تعتمد علي الأكسجين مثلاً .. ماتقدرش .. حاول تضمن إنك تمتلك من الأكسجين ما يكفي إنك ماتقلقش إنه ينتهي بالنسبة لك .. ماتقدرش .. لأن رئتيك نفسهم إنت مش متحكم فيهم .. فحركتهم .. فطبيعتهم .. … دمك نفسه .. إنت غير متحكم فيه .. … … و سبحان الله العلي العظيم .. فيروس زي كورونا .. يثبت لك إنك لا تمتلك رئتيك أو دمك .. و لا تضمن إنك تفضل عايش .. … … و مع ذلك .. .. بنتجاهل الآيات دي كلها .. و نقول بنفس الصوت الأحمق العنيد الغبي المكابر المتخلف .. ” أنا .. دماغي .. و .. عقلي .. قال لي .. كذا و كذا و كذا ” . … … … و الله أعلم .