- و طبعاً إنت صح لما تبقي عايش حياتك و إنت مرعوب من القرارات اللي ممكن تاخدها البنت دي خارج إطار تحكمك و سيطرتك ... و تفضل عايش بقلق ... من فضيحة .. أو من ثورتها عليك فأى وقت .
طبعاً إنت صح لما تكتب كومنت و تضحك إزاي بنت تضايق و تهرب من بيتها عشان والدها ضربها بخشبة !
طبعاً إنت صح لما تستغرب إزاي في جيل مش قابل الضرب و الإهانة كأسلوب تربية .. و إن أجيال كتير كانت بتستغرب لو نامت في يوم من غير علقة ! .
طبعاً إنت صح لما تنصح صاحبك إنه يضرب ( مراته , أخته , بنته ) ضرب مبرح و يكسر العضم … و يهين .
طبعاً إنت صح لما إنت كمان تروح بيتك .. و تلاقي إن ضرب ( مراتك , أختك , بنتك ) هو الحل الأمثل عشان تثبت مكانك و قيمتك و قوامتك .
…
و طبعاً إنت صح لما البنت دي تكبر .. و قدرتك علي تخويفها , قمعها , كسرها , إحباطها , رعبها … تقل .
و طبعاً إنت صح لما تبقي عايش حياتك و إنت مرعوب من القرارات اللي ممكن تاخدها البنت دي خارج إطار تحكمك و سيطرتك … و تفضل عايش بقلق … من فضيحة .. أو من ثورتها عليك فأى وقت .
و طبعاً إنت صح لما تشوف فعينيها إحتقار ليك طول الوقت … و يكون ردك علي الإحتقار اللي إنت شايفه فعينيها ليك ده .. هو إنك تكون حيوان أكتر .. تزعق بصوت أعلي … تضرب .
…
أكيد إنت صح .. لأن زميلك عالقهوة و هو بيشيش جنبك و كرشه مدلدل .. قالك إنت صح .
أكيد إنت صح .. لأن زميلك في الشغل اللي إنت و هو مقهورين فيه .. و خايفين من مديركم و مرعوبين من شوية ورق … قال لك .. إنكوا صح .
أكيد إنت صح .. لأنك دورت بملقاط و إبرة .. في جبال الشرع و العقيدة .. لحد ما لقيت أى آية أو حديث .. و خدت منه جزء صغير .. و سبت بقيته .. عشان تبرر لنفسك إنك صح .
…
أيوا إنت صح .. عشان شفت أبوك بيعمل فأختك و أمك .. اللي إنت بتعمله دلوقتي فبنتك و زوجتك .
أيوا إنت صح .. عشان قليل الحيلة .. قليل العلم .. قليل الذوق .. قليل الفكر .. قليل … ناقص … و ماعندكش غير الهمجية عشان تتعامل بيها .
…
إنت صح بكل تأكيد … لأنك غبت عنهم و هما أطفال .. و كنت بتجري ورا الفلوس ( المهمة جداً ) .. و سبت تربيتهم علي إنسانة ( كان بيتم قهرها هي كمان و هي صغيرة … و كمان و هي كبيرة ) .
إنت صح بكل تأكيد … لأنك غبت عنهم و هما أطفال … و سبت تربيتهم للتيليفزيون بكل ما فيه من قيم و حكم مهرجانات .
إنت صح بكل تأكيد … لأنك حاسبتهم بالدرجات .. حتي لو كانت بالغش .. و ماسألتهمش فلحظة .. عن علمهم .. مش درجاتهم .
…
إنت صح جداً … لأنك كنت بتدور علي أسرع طريقة تريح بيها نافوخك ( و تنيم بيها ضميرك ) .. و تزعق عشان هما يسكتوا .
إنت صح جداً .. لأنك كنت مفكر سكوتهم معناه إنهم مش محتاجين يتكلموا … مش إنهم خايفين يتكلموا … و كارهين يتكلموا … معاك .
إنت صح جداً … لما قعدت تشوف المصايب اللي بتحصل حواليك … و عاقبتهم بيها .. بدون ما تسألهم عن وجهة نظرهم .. و فكرهم .. و عقلهم .
…
إنت صح جداً … لما تلعن و تسب في اللي حواليك
اللي حواليك اللي هما ( إبن المقهورة , أخو المقهورة , زوج المقهورة ) ..
إنت صح جداً … لما بتتناسي إنك إنت ( أبو المقهورة دي .. أو أخوها ) .
إنت صح جداً … لما تفضل تشتكي من كل حاجة حواليك … و تنسي إنك راعي و مسئول عن رعيته .
…
إنت عملت الصح … لما ماعتذرتش ( إنت راجل .. تعتذر إزاي ؟! ) .
إنت عملت الصح … لما نشفت دماغك ( إنت إتقل .. هي اللي لازم تطلب رضاك ) .
إنت عملت الصح … لما بررت لنفسك .. و لما زهقت .. جبت لها هدية بفلوس رخيصة .. عشان توهم نفسك إنك كده بتعتذر .
إنت عملت الصح … لما وهمت نفسك إنها كده خلاص نست .. و سامحت .
…
…
…
إنت صح … لما تلغي أى مسئولية من عليك ..
إنت صح … لما توهم نفسك إن القوة .. هي إنك تستقوي علي الضعيف ( جداً ) ..
…
…
برافو عليك … هدأت بقي .. و خلاص عرفت إنك صح ..
بطل زعيق بقي لو سمحت …
.
.
و الله أعلم .