الحياة بسرعة تحميل 30 كيلو في الثانية

الحياة بسرعة تحميل 30 كيلو في الثانية .

علي مدار اليومين اللي فاتوا .. كان خط النت الأساسي عندي ( لأني حالياً شغال علي 4 مختلفين ) متوقف . بسبب عجيب من عند ( we ) كالمعتاد .. لأني كنت باعلي الخطة بتاعتي من سوبر 140 جيجا .. ل ميجا 250 جيجا .. .. و بعدين حصل مشكلة في ” السيستم ” .. أدي إن العملية دي ماتمش .. و توقف خطي .. لمدة 48 ساعة ( علي سرعة 25 كيلو في الثانية ) .. لحد ما بفضل الله رجع إمبارح .. علي السرعة اللي كنت طلبتها . … حدث مش مختلف أو غير معتاد حالياً فوسط الأزمة الحالية .. و لكنه خلاني أفتكر شوية حاجات كنت نسيتها من زمااااااااااااااان .. من أيام 2008 .. … خليني أشرح . … أول مرة خالص دخلت النت فبيتي .. كان سنة 2008 .. و كنت مشترك أنا و صديق ليا في الوقت ده .. علي سرعة نت 250 كيلو .. بحيث تكون سرعة الداونلود فأعلي حالة ليها 32 كيلو في الثانية . و لما نشتغل إحنا الإتنين فنفس الوقت .. كان الطبيعي هو سرعة 15 كيلو في الثانية لكل واحد فينا . كنا بندفع في الشهر أيامها 95 جنيه 😄 .. … أيامها .. كان عشان أعمل داونلود لفيلم بإمتداد avi .. حجمه في المعتاد حوالي 700 ميجا .. كنت بانتظر بالظبط لمدة 8 ساعات في المعدل .. لو مش باعمل أى حاجة تانية علي النت . يعني كانت قدرة التحميل بتاعتي = فيلم في الليلة . يعني كان لازم أسيب الجهاز يحمل طول الليل .. بدون ما يطفي . … نتيجة لأن ده ماكنش طبيعي إنه يستمر بين فردين .. إختلفنا أنا و صديقي ( و لسة هو مخنوق مني بسبب الموضوع ده لحد النهاردة بالمناسبة 🤣 و عامل ليا بلوك ) .. و فضينا الشراكة دي بعد شهر واحد أو إتنين بالكتير علي ما أتذكر .. و أصبحت منفرد بالسرعة الخارقة دي لوحدي .. 30 كيلو في الثانية . … لازم هنا أوضح إننا كنا 3 أخوات ( أنا و أخويا و أختي ) … ف ( وحدي ) هنا معناها اللي أقدر أستولي عليه منهم هما الإتنين . … … و لكن بحكم الكثير و الكثير من المعارك ( و الإدعاءات إني كطالب فكلية هندسة محتاج تواصل بالتكنولوجيا أكتر ) .. فعلاً إستوليت علي معظم الوقت علي جهاز الكمبيوتر و سرعة الإنترنت لوحدي . … و أصبحت وجهاً لوجه .. أمام عالم ضخم من المحتوي بكل أنواعه : ( مسلسلات , أفلام , ألعاب , كتب , أغاني , … ) .. و لكن بيني و بين العالم ده .. بوابة تستوعب فقط 30 كيلو في الثانية .. … في حين إن قدرتي علي إلتهام المحتوي ده .. و نهمي له .. كانت ضخمة جداً بالمقارنة .. يعني الفيلم اللي بينزل في 8 ساعات .. أنا باتفرج عليه في ساعة و نص بالكتير . … فبالتالي .. كان دايماً في عملية تسبق بدايتي لتحميل أى فيلم .. ألا و هي عملية البحث المضني عن ( جودته , قصته , جدواه , … ) .. لأن 8 ساعات تحميل ليه .. معناها إني أوقف عمل أى حاجة تانية أونلاين في الوقت ده . … … الأيام دي فعلاً .. كانت سعادتي و إحساسي بالراحة و الأمان .. بتنبع من إني أكون عارف مثلاً إن في مسلسل 20 حلقة مثلاً موجود و لسة ماشفتش منه حلقة علي الهارد . ( أيام ما كنا بنفك الهارد بالكامل .. و نضرب مشوار لأصحابنا عشان ننقل منهم أفلام و مسلسلات و لعب ) . .. و بدأت عملية التنسيق بيني و بين أصدقائنا في تقسيم الحاجات اللي يتعمل ليها داونلود . .. يعني لو مسلسل أنيمي 200 حلقة .. كان كل فرد من أربع أفراد بيتولي تحميل 50 حلقة .. و نتجمع في الآخر و نااخدهم من بعض . … … و كانت فكرة إن فأي لحظة ال ( داونلود ) بأى نوع من أنواعه ( دايركت , تورنت , … ) مش شغال .. بتعني بشكل مباشر إني أحس إن في فلوس بتترمي علي الأرض .. و وقت ثمين بيضيع . و لو فيوم مثلاً نزلت .. و رجعت لقيت إن الجهاز مطفي .. كنت فعلاً بابدأ سلسلة من التحقيقات عشان أعرف مين طفي الجهاز و ليه ؟! و كنا بنظبط أجهزتنا إنها تقيد أو توصلها الكهربا ( من البايوس ) .. عشان لو الكهربا قطعت و إحنا مش موجودين . .. و كل برامج التحميل تشتغل إنها تفتح أول حاجة في ال ( start up ) بتاع الجهاز .. بحيث إنها تشتغل أوتوماتيك . … و كان وقت الإنتظار .. أثناء ما حاجة تخلص تحميل مثلاً و أنا منتظرها عشان أتفرج عليها .. من أكتر الأوقات ال( productive ) بالنسبة ليا أيامها .. … … أيامها .. كانت سرعة النقل بين هارداتنا أساساً = 1 ميجا في الثانية تقريباً .. و كنا بنسرح بخيالنا و نقول يا سلااااااااااااام .. يا سلام لو فيوم من الأيام تبقي سرعة تحميل الأفلام و المسلسلات = 1 ميجا في الثانية .. ياااااااااااااااااااااااه . … … … … النهاردة من كام ساعة كده .. كنت بدأت أعمل عملية تنضيف دورية و ( backup ) و تنسيق للابات و الداتا بتاعتي .. و ضحكت بحنين .. لما إفتكرت أيام ما إحتفلت أول مرة بإني إقتنيت هارد 80 جيجا .. زيادة علي الهارد ال80 جيجا اللي كان موجود في الجهاز من الأساس سنة 2008 . .. و بعدين جمعت شوية فولدرات مختلفة منسق فيها أفلام عندي .. عشان أتفاجئ إنه مساحته تتعدي ال600 جيجا .. و إني قاعد بامسح فأفلام و مسلسلات مش عشان أفضي مساحة في هارد معين .. و لكن عشان أفضي مساحة قدام عيني و ( مش عايز دوشة كتير يعني ) … و إن أساساً داتا كتير من الداتا دي أنا باشوفها أسهل علي ( netflix ) . … و بعدين ضحكت بحنين لما إفتكرت فيلم معين قديم حبيت أشوفه ( kung fu hustle ) .. فعملت له داونلود ف 10 دقايق نسخة 1080p أثناء ما أنا باعمل حاجات تانية عالنت أساساً .. … … … … و بعدين قعدت أفكر .. دلوقتي .. بعد ما أصبحت مابفكرش أو أقلق بموضوع سرعة الداونلود ده خلاص .. و بعد ما موبايلي بقي فيه مساحة أكبر من مساحة هارداتي مجتمعة سنة 2012 ( 512 جيجا ) .. .. و كل ما أملك من حاجات كانت تعتبر أقصي من أحلامي سنة 2008 .. هل هي دي الحاجات اللي فعلاً لو رجع بيا الزمن سنة 2008 .. حابقي عايزها معايا ؟ … هل هي دي الحاجات اللي فعلاً شايف إن المفروض إسلام بتاع 2008 يبقي بيحلم بيها ؟ .. متعلق بيها ؟ .. شايف إنها سر السعادة و النجاح ؟ . … … الحقيقة لا .. … الحقيقة هي إن بعد ما أصبحت كل الحاجات دي متاحة بالمنظر ده ..