إزاي أميز بين ( الخرافة , النصب , اللُقطة ,

إزاي أميز بين ( الخرافة , النصب , اللُقطة , الحظ , المضمون ) … فوجهة نظري .

1- ** الخرافة : إني أنا و عشرة غيري نحكيلك قصة .. و كل واحد مننا يجود فيها و يحط فيها التاتش بتاعته و نعلي علي بعض .. و لما تسأل أى حد فينا هو جاب القصة منين .. يقولك ( قالولي .. او كل الناس عارفين .. أو سمعت ) . .. ** النصب : إني بعد ما أحكيلك الخرافة .. مش حاسيبك تمشي فأمان الله .. و حافضل وراك عشان أطلع منك بأى فلوس أو مصلحة . .. ** اللُقطة : إنك تكون فاهم و عارف عن تفاصيل الحاجة اللي أنا باحكيهالك أكتر مني أساساً .. بس بتاخدني علي قد عقلي .. و تبقي عارف أنا ممكن أنصب عليك إزاي .. بس إنت درست و فهمت كتير قبل كده .. و تقدر إنت اللي تطلع مني بمعلومة أو تفصيلة أنا شخصياً مش فاهم قيمتها . .. ** الحظ : إنك تبقي دايماً بتحاول تساعد غيرك .. حتي لو غيرك بيحاول يإذيك .. و مابتحسبش إطلاقاً ليك كام .. و شايف إن الدنيا بتاعتك مافيش فيها حد غيرك عشان تركز عليه و تحاسبه و تقلق بيه .. و مش بتبص علي حد حواليك إطلاااقاً و لا تركز مع مين حواليك وصل لأيه … و لما آجي أحكليك خرافة .. أو أنصب عليك .. غالباً كل اللي عقلك حيبقي بيفكر فيه هو حتاكل إيه كمان شوية .. و حتقضي ساعة العصاري بتبص علي السحاب تحت أنهي شجرة . .. ** المضمون : إنك فاهم كويس جداً إن كل فعل في الدنيا .. ليه رد فعل .. مساوي له في المقدار و مضاد له في الإتجاه . و عارف كويس جداً إنت تقدر تتحكم فإيه .. و مركز عليه .. و عارف كويس جداً .. إنت ماتقدرش تتحكم فإيه .. و عارف حدوده . و بتحط خطتك بناءاً علي وعي كامل باللي إنت عايزه .. و اللي حتضطر تضحي بيه .. و لما باجي أحكليك خرافة .. أو أحاول أنصب عليك .. ممكن ماتدينيش فرصة إني أكمل كلام أساساً .. و تقوم عشان وقتك محسوب بالثانية و أغلي من إنك تغامر مع نصاب أو خرافة . … … 2- ** معتنق الخرافة : كل مصادر معلوماته في الحياة هي ( مسلسلات التيليفزيون و الأفلام و قعدات العيلة و الصحاب و القهوة ) . و أسهل حد تنصب عليه بإنك تقول له ( تعالي ورايا و حاكسبك مكسب كبير من الهوا ) . و دايماً بيصدق أى نصب . .. ** النصاب : معتنق خرافة إتنصب عليه كتير قبل كده .. لحد ما قرر يجرب حظه و ينصب هو كمان .. و بينجح مرة و يفشل عشرة . .. صياد اللُقط : أذكي من إنه يتنصب عليه , و لكنه أكسل من إنه يشتغل في المضمون , و إتعلم بما فيه الكفاية إنه يعرف أنهي مكان اللي بيبقي فيه صياد و يقعد فيه.. و أنهي مكان اللي بيبقي فيه فريسة و بيبعد عنه .. … المحظوط : مش فارق معاه أى حاجة فأى شيء .. و لا فارق معاه إنك تسميه ( محظوط , راضي , قنوع , … ) .. و بنسبة 100% دايماً بيكون بار بأهله و أبوه و أمه داعيين له … و تحس إنه لو لعبت معاه هو و مجموعة تانية لعبة زي ( الشايب ) مثلاً .. إنه أى حكم حتحكموه عليه .. حيطلع حاجة حلوة ليه تفرحه و تسعده . … اللي بيلعب في المضمون : بيذاكر أكتر ما بيتنفس , مابيجازفش .. و لكن بيخاطر مخاطرات محسوبة .. و معظم كلامه أو معلوماته ليها مصادر .. و المصادر دي ليها مصادر .. و مرجعية .. و منهج . و بيحتقر معتنق الخرافة .. و النصاب .. و صياد اللُقط .. و بيدور إزاي يعمل خطة محكمة عشان يكون محظوط . … … 3- ** معتنقي الخرافة : للأسف أغلب البشر .. و دول أسهل ناس ممكن تنصب عليهم .. و دايماً حتلاقي منهم كتييييير جداً . .. ** النصاب . نسبة أقل من معتنقي الخرافة .. بس برضه كتير .. و أى معتنق خرافة تحت أول شوية ضغط حيحس بيهم .. للأسف أول ما حيفكر حيفكر إنه ينصب . .. ** صياد اللُقط . قليلين … جداً .. و بيبقي مولودين بنسبة ذكاء و وعي معينة و نادرة جداً … و اللي منهم كسله بيغلبه .. بيتحول لنصاب محترف للأسف .. و اللي منهم بيغلب كسله .. بيبقي من أنجح اللي بيلعبوا في المضمون . … ** المحظوط . أى إنسان فوجهة نظري ممكن يقدر يبقي محظوظ .. لو قدر إنه يطنش كل الدوشة اللي حواليه فعلاً و يركز عقله و قلبه في إتجاه واحد لا غير … و مابيتغيرش . الناس دي .. هي اللي الدنيا بتأتيها و هي راغمة . بس الناس دي .. أقل فئة . … ** اللعيبة في المضمون . قليلين .. بس أكتر شوية من المحظوظين .. و بيقضوا حياتهم بحث عن المضمون .. منهم اللي بيوصل و بيبقي محظوظ … و لما ده بيحصل .. بيبقي حظه ضخم .. جداً .. و منهم اللي بيموت و هو بيدور .. … … و الله أعلم .

هاشتاج : خد_غرزة_و إسبق_حلمك_بخطوة_ و كعبله. 🤣🤣🤣🤣🤣