علي مدار ال3 أيام اللي فاتوا .. إستمتعت أشد إستمتاع

علي مدار ال3 أيام اللي فاتوا .. إستمتعت أشد إستمتاع بالسلسلة دي .. الموضوع عندي إبتدي بإني قررت فعلاً أتعلم ال( فيولين = كمان ) .. مش بهدف الإحتراف مثلاً أو المنافسة بأى شكل أكيد .. و لكن بهدف إني أقدر أفهم .. ليه موسيقي الكمان بتشدني جداً و أكتر نوع من أنواع الموسيقي باستمتع بيه .. و بهدف إني نفسي أسمع حاجات معينة بطريقة معينة .. و ما حك جلدك مثل ظفرك . (و مانكرش إن في حتة تنطيط صغيرة داخلة في الموضوع أكيد 😎😉 😆) . .. و بعدين لقيت نفسي باسأل أسئلة كتيييييير كنت مأجل إني أسألها بقالي فترة طوييييييلة أوي .. من أيام أول مرة كان في حاجة إسمها ( حصة موسيقي ) في المدرسة مابناخدش فيها أى شيء إطلاقاً .. و أوضة موسيقي ممنوع إننا نقرب منها .. و دايماً إبن أو بنت المدير هو اللي بيعزف في الطابور ( أو الشخص اللي كان دايماً بيبقي بيعرف يعزف أساساً قبل ما ييجي المدرسة ! ) . .. دايماً كنت بأؤجل إني أبدأ أسأل … ليه ؟! هي الموسيقي إبتدت منين ؟! مين فكر فإن الموسيقي تتكتب أساساً ؟! فكر فده إزاي ؟! .. ليه ؟! مين اللي إخترع الآلات دي كلها ؟! ليه باستمتع بموسيقي معينة .. في حين إن أنواع تانية مش باطيقها إطلاقاً ؟! أنا باكره أي موسيقي لأم كلثوم … ليه ؟! … أسئلة كتييير جداً .. … و كعادتي فأى شيء .. لما باحب إني فعلاً أتعلمه بجد .. بابدأه من الأول .. من البدااااااااية خالص . .. كنت مفكر إني حاتعب عشان ألاقي المعلومات اللي عايزها بترتيب و وضوح .. و كنت واخد نفس عميق من فترة علي أساس إني أغطس غطس محترم في اليوتيوب عشان أجمع المعلومات دي .. و إذا بي ألاقي السلسلة الخرافية دي .. ست حلقات جمعوا تاريخ الموسيقي ( الغربي علي الأقل ) .. من البداية لحد يومنا الحالي .. … بالتأكيد دي مش كل المعلومات اللي كنت بادور عليها .. و بالتأكيد مش حاقف لحد هنا .. و لكن السلسلة دي وفرت عليا كتير .. جداً ..