هل ممكن يطلع سلاحف نينجا فمصر ؟!

هل ممكن يطلع سلاحف نينجا فمصر ؟! … معلش .. عارف إن السؤال هزلي و عبثي جداً .. و ناس ممكن تشوف السؤال فيه إستخفاف بضحايا البلطجة و ضحايا الحوادث و التحرشات اللي أخبارهم بتطلّع بقالهم فترة .. بس برضو .. معلش .. كل الناس بتتكلّم جد .. أكيد بوست هزلي و عبثي زي اللي باكتبه دلوقتي مش هو اللي حيسفّه أو يتفّه من حجم معاناة الضحايا .. و الناس المٌتعاطفين معاهم . .. ف تعالي نسأل مرّة تانية .. و بلاش نحدد الموضوع ب مصر إطلاقاً عشان ماحدش ياخد الكلام علي صدره .. الموضوع اللي حاتكلم فيه عاااااااااام علي البشرية كلها أساساً .. و هو : هل ممكن يطلع سلاحف نينجا ؟! .. باتمان ؟! سوبرمان ؟! أو حتّي الرجل العنّاب أو العرقسوس ؟! … سنة 2010 تقريباً .. في سياتل في أمريكا .. طلع لهم ( سوبر هيرو ) 😅 .. واحد لابس بدلة أسود ف أصفر زي اللي في الصورة دي .. و قناع .. و بيقول إنه إسمه ( فينيكس جونز = جونز العنقاء يعني 😅 ) .. . و بدأ فعلاً يجري في الشوارع بالليل .. يدوّر عالمناطق الخطر .. و العيال الشمال .. و يمنع الجرايم ( التثبيت و التحرّش و البلطجة ) .. و إنضرب عليه نار .. و طلع إن البدلة بتاعته واقية ضد الرصاص .. بعد كده شرح إن بدلته دي كلّفته عشرتلاف دولار .. . أيامها أنا كنت متابع الموضوع جداً .. خصووووووووصاً إن الفترة دي في مصر (2010 ) كانت فترة سااااااااانحة جداً .. إن حد يشم خبر .. و يقول إشمعني أنا .. و يطلع لابس بدلة سوبر هيرو هو كمان .. . و كان في رهانات و نقاشات مٌحتدمة .. هل الباشمهندس ده حيكمّل و ينجح و الموضوع ينتشر .. و نبتدي بقي عصر السوبر هيروز .. ولّا الموضوع حيتكلفت سريعاً و ينطفي قبل حتي من يطلّع دٌخّان . . أنا كنت من الفريق التاني .. اللي كان بيراهن إن الموضوع ده مستحيل يكمّل .. و طلعت صح . … رهاني أيامها ماكنش مبني علي تخمين أو تشاؤم … إطلاقاً .. و لكن كان مبني علي قواعد رئيسية و أساسية في تكوين الطبيعة البشرية . . فأحد ليالي 2011 .. فينيكس جونز نزل من بيتهم ( قلعته بقي ) يحارب الجريمة زي أى سوبر هيرو شايف شغله .. لقي شوية شباب بيتخانقوا و شكل الموضوع حيبقي فيه إصابات خطر .. راح داخل فوسطهم .. و فتح عليهم ال ( Pepper spray - رشّاش الفلفل ) بتاعه … كان عنيف الواد ده 🤣 . . المهم .. بعد ما مجموعة الشباب دول صوّتوا و عينيهم حرقتهم .. فجأة لقاهم كلهم بيشتموه هو .. اللي كان بيضرب بقي بيشتم فينيكس جونز .. و اللي كان بينضرب هو كمان بقي بيشتم فينيكس جونز .. و إتضّح إنهم كانوا شوية صُحاب فبعض .. و الليلة سخنت منهم شوية .. و نزلوا ضرب فبعض .. زي أى صٌحاب عادي خالص . . بعد الليلة دي .. حصل التسلسل الطبييييييييييعي جداً .. المشهووووووووور جداً .. الأصيييييييييييييل جداً جداً جداً في أى تجمّع بشري .. . و هو إن الناس إنقسمت … و إختلفت .. و صوت الهبل و العبط و الغباء هو دايماً بيكون الأعلي .. و هو اللي كسب . … ناس كتير طلعت قالت ( مين مرجعية الواد ده ؟! .. مين اللي مشغّله ؟! .. مين اللي مستفيد منه ؟! ) .. إزاي نضمن إنه بكرة مايرشش علينا إحنا فلفل ؟! إزاي نحاسبه لو أخطأ ؟! .. ناس تانيين طلعوا قالوا : ده إبن حلال و أنقذ بنات من تحرّش .. و شباب من تثبيت .. و قطط من علي شجر .. .. و ناس تانيين طلعوا لبسوا هٌمّا كمان لبس أبطال خارقين محزّق .. و نزلوا يرازوا في البشر في الشوارع .. و يقولوا إشمعني هو ؟! .. إحنا كمان سوبر هيروز . .. و أصبح أى ظهور ليه بعد كده .. حدث شعبي و فقرة تسلية .. و أصبح الناس بتمثّل و تفتعل مشاكل .. عشان بس تستنّاه يظهر .. و يفلّموا عليه .. أو يستفيدوا منه .. أو يعملوا أى حوار . . و خلال سنة الموضوع كان إنتهي .. و الواد إتكشف هو مين .. و نفسيته باظت يا حسرة .. و ماشي بالعلاج خلاص .. … طيب .. ليه كل ده حصل ؟!
أو بمصطلحات و لغّة الرجّل العنّاب الرصينة : ( فين البلف ؟! .. إنت لسّة ماحطتش إيدك عالبلف .. صح ؟! ) 🤣 … كل ده حصل .. لأن : في قاعدة معروفة .. إن النتيجة الطبيعية لأى تجمّع بشري بدون قيادة ( توجّه واحد ) هي : سيطرة الشر و الطغيان . دي قاعدة أساسية .. زي إن الذرّة ماتتزنش بعدد ناقص أو زيادة من الإليتكرونات مثلاً .. . نفس الشيء .. أى تجمّع بشري بدون قيادة ( توجه واحد ) .. بيحصل فيه شرارة ( إن إنسان واحد يتصرّف بشكل يفهمه إنسان آخر غلط ) .. ف يحصل تفاعل متسلسل ( Chain reaction ) .. بيؤدي في النهاية دايماً لهلاك المٌجتمع ده نتيجة سيطرة الشر و الطغيان عليه . . و فوسط مجتمع في الحالة دي .. فكرة ال ( مٌنجي الوحيد - Sole savior ) .. بتكون فكرة فاشلة للغاية .. لأن المٌجتمع ده .. عند مرحلة معينة .. أغلبيته ( بضحاياه و ضٌعفاءه ) .. حيضحّوا بالمٌنجي ده .. و يٌهلكوه .. في سبيل مصلحتهم المباشرة و السريعة . … أحد أشهر الأعمال القصصية اللي ناقشت القاعدة دي .. و إتنحتت في عشرتاشر مسلسل و قصة و فيلم .. هي ( Lord of the flies = ملك الذٌباب ) .. تقدر تعمل عنها سيرش لو مش فاهم أو مش مقتنع بالكلام ده . … فبالتالي .. الطريقة اللي المٌجتمع يقدر ينجو و يستمّر بيها .. هي دايماً طريقة من إتنين علي مدار التاريخ البشري .. إما رضوخ لأى قوة سائدة مٌسيطرة ذات إتجاه واحد . أو .. إعتناق دين فيه مبدأ ال ( مسئولية الفردية ) وااااااااااااااااااضح و مٌطبّق بشكّل كامل . … و دول هٌمّا الطريقتين اللي سايدين في العالم حالياً لو مش واخد بالك .. . القوة السائدة المٌسيطرة ذات الإتجاه الواحد .. اللي هي الشيوعية ( روسيا , الصين , كوريا الشمالية , … ) . . و الدين اللي فيه مبدأ ال( مسئولية الفردية ) مٌطبّق بشكل كامل .. هو دين الرأسمالية ( أمريكا , أوروبا , … ) . . و قبل ما تتعصّب أو تشك إنك قرأت غلط .. لا .. إنت قرأت صح .. الرأسمالية .. دين و ديانة و مٌعتقد .. زي باقي الأديان و المٌعتقدات اللي إعتنقها البشر علي مدار التاريخ .. .. في الرأسمالية .. إنت بتعبد الفلوس .. عبادة كاملة .. و بتحقق مبدأ الفردية بشكل كامل .. إنت مسئول تماماً عن تكوين و حماية نفسك مادياً .. و قيمتك بالكامل بتتحدد من ( إنت بتجيب فلوس قد إيه ) . … الرأسمالية مش هي الدين الوحيد اللي بيٌرسي مبدأ ( المسئولية الفردية ) .. . في أديان تانية كتير .. . ك مٌسلم .. أنا مؤمن إنهم كلهم غلط .. و ناقصين .. و مؤمن تماماً بفضل الله إن الإسلام هو دين الحق .. و باعبد الله رب الفلوس .. مش الفلوس .. . و أقدر أؤكّد من خلال فهمي و إيماني .. إن الإسلام بيحقق الإتزان الكامل بين ( حياة المٌجتمع تحت سيطرة و قيادة واحدة ) .. و بين ( المسئولية الفردية للإنسان الواحد ) . … في الآية 24 في سورة المائدة : بيقول قوم سيدنا موسي له .. ( فاذهب أنت و ربّك فقاتلا إنا ها هنا قاعدون ) . لما ربنا بيأمرهم إنهم يقاتلوا و يجاهدوا .. . دايماً كنت باقف عند الآية دي .. و أفكّر .. هل الرفض حصل مٌباشر كده ؟! .. ولّا كان في نقاشات ؟! .. و جدالات ؟! .. و مناظرات و برامج حوارية و خٌد و هات ؟! . . في الآيات اللي قبلها بنشوف جزء من ده .. و هٌمّا بيقولوا : ( قالوا يا موسي إن فيها قوماً جبارين .. و إنا لن ندخلها حتي يخرجوا منها ) . . يعني .. إحنا مٌش مٌدرّبين .. إحنا مش جاهزين .. إحنا مش … مسئولين . … سيدنا عمر بن الخطّاب .. أحد أشهر قراراته في فترة خلافته .. هي قراره بعزل سيدنا خالد بن الوليد من قيادة جيش المسلمين .. . سيدنا خالد .. في عز إنتصاراته و مجده .. لكن سيدنا عمر كان فاهم .. كان فاهم إن ( فكرة أسطورة البطولة الفردية ) فكرة مٌدمّرة للمٌجتمع .. . فكرة إن شخص واحد .. يعتمد عليه مٌجتمع بالكامل .. مهما كانت فكرة لسّة صغيرة .. مهما كانت فكرة وهمية .. إلا إن نتيجتها هي إن بيترسّخ في وعي المٌجتمع ده بالكامل إنه ( مش مسئول ) .. و إن حد تاني حيتعامل في الموضوع ده . . سيدنا عمر رضي الله عنه و أرضاه .. كان عبقري . … فبالتالي .. معلش .. إفهم إن سيطرة فكرة ال ( سووووووبر هيرووووووووو ) علي الأفلام و القصص و المسلسلات و الوعي العالمي آخر 70 سنة بالذات .. و كمية الصرف عليها بالمنظر ده … مش حاجة حلوة إطلاقاً .. ( قاعدة عامة .. شوف أغلب البشرية .. الأكثرية .. ماشيين ورا إيه .. و خلّي بالك منه ) .. دايماً .. و لو في يوم ماشي بالليل .. و لقيت حد ديليفري بيتزا بيسيب علبة بيتزا مليانة سٌخنة جنب بلاعة 🤣.. ماتستنّاش … و روح إتمرّن و إجهز إنت الله يبارك لك . … و الله أعلم .