قطعناكوا في بوركينا فاسو

قطعناكوا في بوركينا فاسو … طيب .. العيد خلص .. نكمل شغل بقي .. و نكمل قصة ( ال K POP و الدراما الكورية بالحلمنتيشي ) .. بس قبل ما أكتب الجزء الرابع .. فاكر المشهد ده من فيلم أفريكانو ؟! بتاع الصورة اللي عالشمال ..
لما أحمد عيد بيفقع الإفيه ده ؟ ( بتاع قطعناكوا في بوركينا فاسو ) .. .. تعرف إيه تاني عن بوركينا فاسو ؟ غير إننا بنسف علي إسمها ؟ … شايف الراجل اللي في الصورة التانية ده .. اللي عاللمين .. الراجل ده قدي في السن .. تخيل ؟! .. أنا و هو دفعة واحدة 🤣 .. مواليد 88 .. و لكن .. في فرق بسيط و صغنن جداً في بنقضي وقتنا إزاي حالياً 🤣 .. أنا بالعب Teamfight tactics و فالورانت .. و هو .. ماسك رئاسة بوركينا فاسو .. .. الراجل ده إسمه : إبراهيم تراوري … و مهم جداً تعرف عنه شوية حاجات . ليه ؟! … عارف زمااااااااااااان في المدرسة .. لما كنت بتتخانق كل يوم .. و تلاقي العيال اللي إنت بتتخانق معاهم راحوا جابوا سلاح ( عصيان خشب و طوب و جنازير ) 🤣 . تدخل إنت الخناقة .. تنضرب و يتعلم عليك .. و تستعد للإنتقام تاني يوم .. . تاني يوم تروح .. تلاقي برضو العيال اللي إنت بتتخانق معاهم مستعدين و معاهم عصيان و جنازير و طوب .. و تدخل الخناقة و تنضرب و يتعلم عليك تاني .. . عند مرحلة معينة .. و بعد كام يوم من التعليم المتكرر علي قفاك ده .. لو ماتعلمتش إن إيديك و قوة دراعاتك لوحدها مش كفاية .و مافهمتش إنك محتاج إنت كمان يبقي معاك سلاح .. يبقي تستحق اللي يحصل فيك . . ببساطة .. عشان تبدأ تفكر في أى مستقبل ليك في المدرسة دي .. و إنك يبقي عندك أى كرامة و تبطل تاكل علي قفاك .. لازم تعرف العيال اللي إنت بتتخانق معاهم بيجيبوا السلاح بتاعهم منين .. و تجيب لك سلاح إنت كمان . … أفريقيا .. هي منجم العالم .. حرفياً ( مش مجازياً ) .. . العالم حالياً معتمد إعتماد كامل ( مش جزئي ) علي شوية معادن معينة .. و في المستقبل ..الإعتماد ده حيزيد بشكل أكبر بكتير جداً .. ف مثلاً :

• الكوبالت : 70% من إحتياطي العالم منه .. موجود في الكونغو … و ده مافيش بطارية موبايل أو لابتوب أو حتي صبارة راقصة .. إلا و محتاجاه . .
• الليثيوم : في الكونغو , و رواندا , و نيجيريا … .
• تانتالوم : كونغو , رواندا , نيجيريا . .
• نيوديميام , دايسبروزيام , لانثوام , إيتيريام , يوروبيام … فمدغشقر , و جنوب أفريقيا , و بوروندي , و تانزانيا . … أكمل ولا تعبت من درس العلوم ده ؟! بص .. روح فأى محرك ذكاء إصطناعي .. و إكتب : المعادن اللي العالم محتاجها و مش موجودة غير فأفريقيا … و إتفرج . … كل الدول دي .. أسماءهم إنت غالباً مش بتقراهم غير في مباريات الكورة صح 🤣 ؟ . الدول دي .. هي أهم دول في العالم كله حالياً .. آه والله .. مش الدول اللي عينيها زرقا و شعرها أصفر .. . أصلك تبقي ناقص المعلومات جداً لو فكرت إن العيال اللي إنت بتتخانق معاهم ( اللي عينيهم زرقا و شعرهم أصفر ) عندهم علم مش عندك .. العيال اللي إنت بتتخانق معاهم .. اغلب علمهم هما شاريينه بالفلوس .. و الفلوس هما مش عاملينها من تجارة حلال مثلاً .. دي فلوس بلطجة و قرصنة مستمرة من 200 سنة فاتوا .. … علي مدار ال150 سنة اللي فاتوا بالذات .. و أغلب دول أفريقيا .. اللي فيها أهم معادن العالم محتاجها .. كانت و ما زالت تحت الإحتلال .. … عايز تعرف ليه العالم مش فارق معاه اللي بيحصل في أهالينا حالياً ؟ لأن العالم متدرب من زمان .. واخد تطعيم .. شاف اللي أكثر فظاعة .. و سكت برضو .. .. الكونغو , رواندا , النيجر .. و غيرهم من دول أفريقيا .. مش بس حصل فيهم مذابح و إ8تصاب مسلح و مجازر أضعاف اللي حصل في أهالينا علي مدار السنتين اللي فاتوا … لا … دول إتعرضوا لأكبر محاولة مسح هوية كاملة علي مدار التاريخ . … إيه هو موضوع مسح الهوية ده ؟ … بص يا حاج .. عارف أهم و أغلي حاجة عندك هي إيه ؟ عارف إنه سؤال بيخض .. معلش .. إستحملني .. . لو قلت لي إن أهم و أغلي حاجة عندك هي البلايستيشن بتاعك .. حصدقك .. لو قلت لي إن أهم و أغلي حاجة عندك هي شوية صور علي موبايلك .. حصدقك .. لو قلت لي إن أهم و أغلي حاجة عندك هي حظاظة خدتها هدية من بنت ضحكتها عجبتك .. برضو حاصدقك .. . عارف حاصدقك ليه ؟ .. لأن هي دي الحاجة اللي باشوفك بتتخانق عشانها .. بتزعق عشانها .. بتزعل عشانها .. و بتموت عشانها … و كل ده بيحصل بالساهل جداً .. لأن كل الحاجات دي .. رخيصة جداً جداً جداً .. فبالتالي .. مافيش منك قلق . . لكن .. كل ما الحاجة اللي إنت شايفها ( أهم و أغلي ) حاجة عندك كانت أغلي .. كل ما إنت بقيت أخطر .. صعب إنك يتعلم عليك .. . و من أغلي الحاجات عند الإنسان .. هي ( هويته ) .. إسم عيلته .. منطقته .. إنتماءه . . و علي مدار التاريخ .. مافيش حاجة قدرت تغلب اللي متمسك بهويته غير : إنسان متمسك بحاجة أغلي و أعلي قيمة .. و هي ( دينه ) .. أو .. إنسان ماعندوش أى قيمة إطلاقاً .. فبالتالي .. سهل جداً تشغله مرتزقة بالفلوس الرخيصة ( و دول هما أعداءك و أتباعهم منذ بداية التاريخ ) .. … المشكلة في أفريقيا هي : إن الهوية جزء من الشكل .. ماتقدرش تمسحه .. فبالتالي .. لازم تفكر إزاي تغير معناه بالكامل . .. يعني .. إتخيل إنك لون جلدك مثلاً أحمر .. أو أبيض بخطين حمر 🤣 .. اللي هو إنت أهلاوي أو زملكاوي من غير ما تتكلم . . أفريقيا فيها نفس القصة دي .. لون البشرة الأسود .. . و علي مدار التاريخ .. كان لون البشرة ده عزيز .. مميز .. بيحمل معاه تراث و تاريخ و حضارة .. هي الأصل . . لكن .. صعب جداً إنك تسيطر علي إنسان عزيز عارف قيمة نفسه .. و سهل إنك تسيطر علي إنسان .. علي حضارة كاملة .. لما تحسسهم بإنعدام قيمتهم و هويتهم . . علي مدار ال150 سنة اللي فاتوا .. مسح الهوية السوداء ك تميز و قيمة .. تم بشكل مدروس و شيطاني .. . و علي مدار ال20 سنة اللي فاتوا بالذات .. أحد أهم الصراعات الحضارية .. هو صراع الهوية الأفريقية في إستعادة ذاتها و قيمتها .. بعيد عن سيطرة الفكر الغربي الأمريكي الأوروبي . … عمك إبراهيم تراوري ده بقي ( بتاع أول البوست لو لسة فاكر 🤣 ) .. مش أول واحد يطلع يقول : كفاية .. خلاص .. بح .. .. مش أول واحد يطلع يقول : أفريقيا للأفريقيين .. مش أول واحد يطلع يثول كلام أبيح لفرنسا اللي محتلة نص أفريقيا بالغصب . مش أول واحد يطلع يقول إن العالم مش حينعدل موازينه .. إلا لو أفريقيا سيطرت علي مناجمها .. و بطلت تشغل أطفالها بالسُخرة في المناجم .. المناجم اللي مسيطر عليها شركات أوروبية بالقرصنة و الغصب و السلاح . . مش أول واحد يطلع يفضح الفساد و الرشاوي اللي ضاربة فأوصال حكومات أفريقية زي السرطان . .. و كان قبله في كتير .. وصلوا إن صوتهم بقي عالي أوي … و تم إغتيالهم . أو تلبيسهم فضيحة .. أو تلفيق لهم فضيحة .. أو عشرات الحلول اللي بتلجأ لها حكومات أوروبا و إقتصاداتها اللي معتمدة علي سرقة و نهب ثروات أفريقيا . … طب ليه هو مهم دلوقتي ؟ .. ( إبراهيم تراوري ) يعني .. لأنه لسة عايش .. و بدأ صوته يعلي .. أوي .. .. و جمّع حواليه كذا حد من رؤساء و حكومات الدول اللي منهوبة و مُحتلة ( neo colonialism = إحتلال جديد يعني ) .. و بدأوا يعملوا قلق شديد أوي .. … و فوسط القلق و الدوشة و الصوت العالي ده .. إنت ليك دور .. … أيون إنت .. إنت اللي قاعد عالقهوة مالكش دعوة بسياسات دولية ولا مناجم ولا إقتصادات ولا أى شيء خارج إطار رصيف القهوة اللي إنت قاعد عليها . .. عارف دورك إيه ؟ إنك تسمع الصوت ده .. صوت إبراهيم تراوري و غيره .. تعرف هما مين .. و عايزين إيه .. لأن هما اللي عندهم السلاح اللي إنت حييجي يوم و تحتاجه .. و هما اللي إنت محتاج تقرب لهم .. تضحك معاهم مش تضحك عليهم .. … إقتصاد أفريقيا .. أحد أكتر الإقتصادات العالمية أهمية خلال ال10 سنين اللي فاتوا .. و حيكون أهم عشرات المرات من إقتصادات دول أوروبية كتير خلال ال10 سنين اللي جايين . … ثورة الذكاء الإصطناعي .. معتمدة بشكل اساسي علي كروت الشاشة بتاعت إنفيديا و غير إنفيديا .. كروت الشاشة دي .. ماينفعش تتصنع .. غير لما تطلع معادن من أفريقيا .. … إنت غالباً مالكش أى دور مباشر دلوقي .. عارف .. بس عيالك ممكن يكون لهم .. أصحاب عيالك حيكون لهم .. .. إنت دورك و تأثيرك أقوي بكتييييييييييير مما تتخيل .. كل شير .. و لايك .. و تعليق بتعمله علي أى محتوي أونلاين .. بيحيي المحتوي ده .. و يوصله لبعيد جداً .. … أحد أهم صناع المحتوي علي تيكتوك في مجال الأخبار و السياسة و الإقتصاد .. إسمه ( dylan page ) .. بعد ما عمل فيديو عن ( إبراهيم تراوري ) .. قناة ديلان .. اللي عليها ملايين من المتابعين .. و ملايين أكتر بكتير من المشاهدات .. إتقفلت لمدة 24 ساعة .. و تم عمل حظر علي أغلب فيديوهاته .. … اللي بيحصل في أهالينا .. مش بيحصل بإيدين فاضية .. اللي بيحصل في أهالينا .. بيحصل بأسلحة و تكنولوجيا و درونز ( طيارات موجهة ) .. كلها معتمدة بشكل مباشر علي أفريقيا .. و إقتصادات أوروبا بالكامل قائمة بشكل مباشر علي إن أفريقيا تفضل تحت الإحتلال .. … إفهم و إعرف … حتي لو كان ده أضعف الإيمان . … في البوستات القادمة ( عن قصة الكي بوب و الدراما الكورية ) .. حتعرف علاقة الكلام اللي في البوست ده إن شاء الله .. بكوريا و الصين و اليابان … و الله أعلم .