حاجات فدماغي

حاجات فدماغي: … 1- اللي حصل اليومين اللي فاتوا ( و ما زال شغال علي بروفايلي ده ) مخليني عايز أوي أكتب بوست ضخم تحت عنوان زي ( حوار مع صديقي السرسجي 🤣 ) .. أشرح فيه إن : السرسجية .. ما هي إلا الصورة العصرية ( بتاعت 2025 ) للعصبية القبلية اللي كانت موجودة من أكتر من 1400 سنة .. و اللي أحد أهم ركائز الإسلام هي النهي عنها . و إن السرسجية مش معناها إطلاقاً صورة ( أساحبي البلطجي 🤣 ) بس .. و لكن صور تانية كتير .. ممكن تلاقي مهندس سرسجي , دكتور سرسجي .. و غيرهم . . 2- عايز أشرح قصة سيدنا عمرو بن العاص مثلاً .. قبل الإسلام و بعد الإسلام .. و إزاي إن في فرق ضخم جداً بين إني أكره الشخص لذاته .. و بين إني أكره أفعاله . و إن آخر طريقة المفروض تحاول تكسب بيها عدوك .. هي إنك تقلته أو تتخلص منه .. و لكن بييجي قبل كده .. عشرات و مئات المحاولات إنك تكسبه ف صفك .. عن طريق ( إدفع باللتي هي أحسن .. فإذا الذي بينك و بينه عداوة كأنه ولي حميم ) . و عن طريق إني أستفيد من علم و إنتاج أى إنسان .. بغض النظر عن توجهاته الفكرية و الشخصية .. و بعدين أستخدم علمه و إنتاجه ده فإني أنا شخصياً اكون أقوي و أكثر قدرة و سيطرة ( مش عشان أجبر غيري علي شيء .. و لكن عشان أكون أقدر علي توصيل صوتي بدون ما حد يمنعني ) . . 3- و فنفس الوقت عايز أعمل المحاضرة الرابعة في ( الذكاء الإصطناعي بالحلمنتيشي 🤣 ) .. لأن خلال الأسبوع اللي فات نزلت النسخ الجديدة من ( claude ) .. اللي هي ( سونيت و أوباس ) .. و النسخ دي فيها إمكانية توليد فايلات json بشكل أفضل بكتيييييييييير جداً .. و قدرتها علي البرمجيات أعلي جداً .. يعني : دلوقتي تقدر بكل سهولة تقول ل (claude ) يا عم الحاج أنا عايزك تعملي ( agent ) علي N8N يعمل ( اللاللي 🤣 ) … و Claude بيطلع لك فايل الjson طازة و سخن و جاهز علي الحشو في N8N مباشرة 🤣 . . 4- و فنفس ذات الوقت عايز أكتب الجزء الرابع من سلسلة ( قصة الK POP و الدراما الكورية .. بالحلمنتيشي 🤣 ) .. لأن الجزء التالت نزل بقاله كتير كدة . . 5- و فنفس ذات الوقت .. عدد الرسائل اللي في الماسنجر عندي أصبح ضخم جداً ( تخطي ال200 ) … و ( بقالي 10 أيام مافتحتش الماسنجر تقريباً ) .. و في المعتاد باقعد أرد علي عدد ضخم من الرسائل كل جمعة .. و لكن بكرة غالباً حابقي مشغول جداً . . 6- طبعاً ده غير الحاجات الكتير اللي عايز أكتبها و أشرحها عن ( Google Veo3 ) بالذات .. لأن المحتوي المرئي تأثيره غاية في الخطورة .. و غاية في الأهمية خلال السنتين اللي جايين .. . 7- و في بوست فاتحه في تاب بقالي 4 أسابيع دلوقتي لحد ما عتّق و عناكب بنت بيوتها فوقه 🤣 .. باتكلم فيه عن المدرسة اللي إيلون ماسك عملها للأطفال و مبنية علي علاقة مباشرة بين الطفل و الذكاء الإصطناعي .. و إزاي إن نتائج الأطفال دي كانت مبهرة فوق كل الصور . … و طبعاً مافيش وقت لكل الكلام ده .. لأني مشغول في إطلاق مشاريع ( لسة ماجاوش وقت الإعلان عنها 😉 ) علي الأرض حالياً بقالي فترة .. و عايز ألعب جيمز .. و عايز أنزل الجيم دلوقتي .. … الله أعلم لما أرجع أنهي حاجة من دول حلاقي دماغي شاغلاني بيها 🤣