إتنين دولار و نص .. حتي الآن 🤣🤣

إتنين دولار و نص .. حتي الآن 🤣🤣.. … ده هو ” الربح = Earnings ” اللي محسوب ليا حتي الآن مقابل البوست اللي أنا قاعد باتشتم في التعليقات فيه من أول إمبارح🤣 .. … شديت إنتباهك بالفلوس ؟! .. يا ريت .. لأن الكلام اللي جاي ممل فعلاً .. … 1- أول مليم دخل في جيبي من شغل علي الإنترنت .. كان سنة 2008 تقريباً .. … 2- في بدايات سنة 2010 .. كنت شغال علي تصميم تطوير لعبة أونلاين .. فيها درست بعمق الخوارزميات اللي مبني عليها السوشيال ميديا .. و أحد مجالات البحث الثانوية اللي إشتغلت عليها لمدة شهور في الوقت ده كان : ( the science of virality = يعني إزاي تخلي الحاجات تنتشر بشكل فيروسي علي الإنترنت ) . و متذكر والله محادثات بيني و بين أصدقائي ( في بدايات 2010 ) .. و أنا باقول لهم إن المستقبل مش رائع إطلاقاً في السوشيال ميديا .. لأن .. ( إنك تخلي أى حاجة تنتشر بشكل فيروسي ) .. مسئلة سهلة جداً.. خصوصاً لو مش حتفكر بشكل أخلاقي .. و قريباً جداً ( مرة تانية .. الكلام ده في بدايات 2010 ) .. فئات كتير .. و حكومات كتير حتفهم ده .. و السياسة حتخترق الإنترنت بشكل يغير مفهومه لمدة طويلة . و قد كان . … 3- أى مجموعة في الدنيا .. كل ما بيزيد عددهم .. بيزدادوا غباء و جهل . و كل ما بيزيد الوقت .. بيزيدوا غباء و جهل أكتر .

( دي حقيقة إحصائية لا تقبل الجدل و النقاش ) .. و شرحها كالتالي : البشر مختلفين في الذكاء و الوعي .. و الأغلبية .. متوسطين الذكاء و الوعي .. ( دي حاجة المفروض إنت درستها في إحصاء أولي ثانوي .. إسمها منحني التوزيع العياري = Standard deviation curve ) . . و لكن .. الغبي الجاهل … صوته دايماً أعلي بكتير من المتعلم الذكي .. و ثقته في نفسه لا حدود لها ( دي أحد الصفات المميزة للغبي الجاهل بالمناسبة ) .. لأن المتعلم الذكي .. أساس تركيبته العقلية هي الشك .. التساؤل .. فالتساؤل و الشك ده .. بيخليه أكثر حذر جداً في إنه يفتي .. أو يزعق بوجهة نظر معينة عنده .. و يقولها بصوت عالي كإنها حقائق . . و زي ما شرحت .. نصف المجتمع تقريباً ( بشكل أحصائي طبيعي ) أقل ذكاء و وعي من المعدل الطبيعي ( من منتصف المنحني ) .. . فبيسمعوا شخص واثق فنفسه جداً .. صوته عالي جداً .. بيزعق و بيهري بأى كلام .. و فنفس الوقت .. بيشوفوا شخص .. متشكك جداً .. صوته واطي .. و بيتكلم أقل بكتير .. . تتخيل .. نصف المجتمع حيمشي مع مين ؟! .. مع الغبي الجاهل اللي صوته عالي طبعاً .. لأنه واثق من كلامه بشكل يوحي إن كلامه فيه إجابات فعلاً .. و الناس بتدور علي إجابات سهلة .. مريحة لعقلهم ضعيف العلم و الوعي . . فبالتالي .. الغبي الجاهل حيصبح أقوي بكتير جداً. . و صوته أعلي بكتير جداً .. . و تدريجياً .. نقطة المنتصف بتاعت منحني توزيع وعي و ذكاء الناس العياري .. حتتحرك في إتجاه الغباء .. . لحد عند مرحلة معينة .. بعد فترة من الزمن .. ( نقول 50 سنة مثلاً ) .. منتصف المجتمع .. حيكون عند أغبي نقطة كان عندها أغبي شخص من 50 سنة فاتوا . … 4- اللي قلته في النقطة السابقة دي .. حقائق لا تقبل الجدل و النقاش .. و مش معناها إطلاقاً إني ( باشتم ) أو ( باحتقر ) فئات معينة .. إطلاقاً .. بالعكس .. أنا باتكلم علي حاجات المفروض كل إنسان يفهمها .. خصوصاً لو بيقرأ القرآن .. لأنه المفروض يعي .. إن كل الآيات اللي ذٌكر فيها ( أكثر الناس ) .. كان حيلاقي بعدها :

• مشركين .
• لا يشكرون .
• لا يعقلون .
• لا يؤمنون . .. أو الآية العظيمة : وإن تطع أكثر من في الأرض يضلوك عن سبيل الله إن يتبعون إلا الظن وإن هم إلا يخرصون … (الأنعام:116) … 5- طيب .. أنا عايز أقول إيه في ال4 نقاط اللي فاتوا دول ؟ .. .. ببساطة .. عايز أنفي عن نفسي تهمة إني ( باسعي لربح مادي أو إنتشار أو شهرة أو تريند أو ما شابه ) . .. يعني .. لو إنت من الفئة القليلة جداً .. النادرة جداً .. اللي حتقرأ الكلام ده .. و حتتعب نفسك شوية و ترجع تشوف آخر كام شهر مثلاً من وجودي علي الفيسبوك .. المفروض بشكل تلقائي تكون فهمت .. إني لو حابب إن عدد المتابعين اللي عندي علي الفيسبوك يصل لمئات الآلاف .. بل ملايين ..خلال شهور قليلة جداً .. فده شيء أعلم كيفية تنفيذه حرفياً من أكتر من 15 سنة .. . بل .. إني علي مدار السنين .. درّست أجزاء منه .. قدمت إستشارات مع شركات ضخمة في أجزاء منه .. و بنجاح بفضل الله . و لكن .. لنفسي و لشخصي .. يعلم الله إني طول الوقت باكون فاكر النقطة رقم (4 ) دي … و باشفق علي نفسي منها .. … 6- و لكن .. الحياة مش دار نعيم ولا دار راحة .. الحياة دار شقاء .. و أحد قوانينها الرئيسية و الأساسية .. هي إنك ماتهربش من الشقاء و التعب .. بل تهرب في إتجاهه .. و إلا حياتك حتختل . . فبالتالي .. قدر المستطاع .. جزء من إخلاص نيتي في إني أعمل كل ما أقدر عليه في سبيل الله .. هو إني أكتب ( قدر علمي و فهمي و إستطاعتي ) البوستات اللي باكتبها دي .. . و أخلص النية في إني لا أسيئ إستغلال ما أعلم .. لمصلحة أو مكسب تافه زي ( آلاف المتابعين ) .. و أحاول قدر المستطاع إني أكون حيادي جداً .. مع أمطار المديح اللي بتنهال عليا أحياناً لو وافق كلامي مزاج الأكثرية .. ( و ده أحد أكبر أسباب إني مش باحب المديح ) . و حيادي برضو .. مع عواصف النقد و الشتيمة .. لو عاكس كلامي مزاج الأكثرية . ( من عاش برضا الناس .. مات بسخطهم ) . … 7- أنا مهندس .. 🤣🤣 معلش .. أنا عارف إنها كلمة بتضايق .. بس إستحملني .. لأن .. ك مهندس .. أنا ماينفعش أقف قدام جهاز أو مكنة مش شغالة .. و أشتمها عشان تشتغل 🤣🤣 .. . شرحت في بوستات كتير أوي قبل كده .. إني باحس بالإستفزاز من أى حد ( يظن في نفسه العلم ) .. و يقف يتكلم و يقول ( إنتوا الجيل بتاعكم جيل مهبب و هو سبب كل المصايب دي ) .. الجملة دي سمعتها مراراً و تكراراً علي مدار فترة الثانوي و الكلية .. لحد ما إتعلمت أقف و أسأل اللي بيقول الجملة دي : ( طيب .. حضرتك شايف إيه الحل ؟! ) . و إتكلمت قبل كده عن عبثية الردود الي كنت باسمعها .. (ف أحد البوستات اللي إتكلمت علي الموضوع ده تفصيلياً علي ما أتذكر من سنتين إسمه : إعمل الصح ) . . المهم .. أنا بكل تأكيد زيي زي ملايين المصريين سمعت إسم زاهي حواس مراراً و تكراراً من أيام ما كنت باتفرج علي التيليفزيون و القناة الأولي و التانية من التسعينيات 🤣 . و بكل تأكيد .. زيي زي ملايين من المصريين .. علي مدار آخر 14 سنة بالذات ( بعد 2011 ) سمعت مئات القصص عن الفساد في نطاقات كتير في مصر .. لكن … اللي مختلف يمكن .. هو إني شفت بعيني الفرق بين إنك تقعد تنظّر في المدرجات .. و بين إنك تنزل الملعب و تلعب . ده هو اللي علمني .. إن في فرق ضخم بين إن معرفتي و علمي يكونوا كلهم عبارة عن ( قصص سمعتها من ناس , كلام قرأته في بوستات و تعليقات , إشاعات , … ) .. و بين إني أكون ( علمت بنفسي .. و شفت بنفسي ) . .. و إتعلمت كويس جداً جداً جداً .. إني مهما سمعت من إشاعات و قصص و حكاوي و أساطير .. إني مافتيش إلا في حدود علمي الحقيقي فقط . و إن حتي لما أفتي في حدود علمي الحقيقي ده .. أنهي كلامي ب ( و الله أعلم ) .. لأن في إحتمال ضخم إني أكون لسة حمار مش فاهم حاجة . … 8- فبالتالي .. تقريباً عدد اللي علقوا علي البوست إياه حتي لحظة كتابتي دي .. بالسب و الهجوم .. فاق ال400 فرد . و كلهم من كلامهم شبه متيقنين تمام اليقين إن زاهي حواس فاسد و نصاب و لا يصلح للوجود في المكان و المنصب و الصورة اللي هو موجود فيها .. . تمام .. ماشي .. أنا حافترض موافقتي التامة لكم .. بل .. سأزيدكم من الشعر بيت .. و أفترض موافقتي التامة لكل القصص و الإشاعات و الحكاوي اللي سمعتها علي مدار ال15 سنة اللي فاتوا .. ل ملايين من المصريين .. مش مجرد 400 فرد . . أما بعد ؟! . ليه ال ( ملايين ) دول .. مازالوا مجرد ” غثاء سيل ” ؟! .. صوت فرقعة عالفاضي ؟! .. مجرد دوشة بيتم إستغلالها من الخوارزميات لعمل تريندات ؟! . ليه .. بالرغم من كل كلام الملايين دول ( الشتايم و السب و الهجوم ) .. مافيش حاجة إتغيرت إطلاقاً علي مدار 15 سنة ؟! . … 9- بل .. ساعدني أرفع راسك شوية عن رجليك .. و أخليك تشوف صورة أكثر إتساع و شمولية . . نفس الملايين دول من البشر .. مش بس شتموا زاهي حواس و هما مؤمنين تمام الإيمان بإنه ( نصاب , لا يصلح , … ) .. و لكنهم .. شتموا .. و سبوا .. و لعنوا .. و عيطوا .. علي مواضيع أخري كتييييييير .. لا تقبل أساساً أى شك .. زي اللي بيحصل في أهالينا علي بعد بعض الكيلومترات .. . و بنفس الطريقة .. الملايين دول كانوا مجرد ( دوشة , فرقعة فاضية , غثاء سيل ) … و الوضع بقاله سنتين .. مزري .. و مُخجل .. و مؤلم . . ليه ؟! … 10- لأن .. طول ما إنت مش عارف إنت ليه مُجرد ( فنجري بق ) .. حتفضل طول عمرك ( فنجري بق ) . . اللي هو بالظبط شبه الصورة المشهورة اللي في البوست دي 🤣 … بتزعق و تشتم .. لكنك مش عايز تتعب شوية بشكل حقيقي .. عشان تمتلك قوة و أدوات حقيقية .. تساعدك تاخد أكشن حقيقي .. مش مجرد ( تشتم في كومنتات ) . … 11- يعني لو أنا مكانك .. و عندي كل المعلومات اللي لا تقبل شك إن ( زاهي حواس نصاب و لا يصلح و كل الكلام ده .. ) أعمل إيه ؟! . . أسأل نفسي .. هل أنا عندي قوة كافية تمكنني من إني أقف و أطالب بحقي ؟! . لو الإجابة آه .. خد أكشن .. و إعمل ده .. لو الإجابة ( لا ) .. و كنت عارف و متأكد إنك لو حاولت تعمل كده .. حتاخد علي قفاك حتي الصباح الباكر .. يبقي تعمل إيه ؟!.. . تحاول تمتلك القوة دي . . تمتلك القوة إزاي ؟! بإنك تفهم لعبتها .. و تفهم مين اللي بيلعبوها .. و أدواتهم إيه . … 12- عند مرحلة معينة في رحلتك دي .. حتوصل لموضوع جو روجان .. و حتفهم شوية موقعه من الإعراب عالمياً دلوقتي عامل إزاي .. و إنه محطوط ك ( بونطة شنيور = drilling bit ) .. ضمن ماكينة ضخمة بتخرم في (أى أساسيات ) . … أساسيات فكر .. فلسفة .. علوم .. دين .. … و أسلوبه في ال ( خرم ) ده .. أسلوب بسيط جداً .. بالظبط زي أى شنيور .. مجرد ما تشغله علي أى سطح .. و تسيبه شوية .. فجأة السطح حيتخرم . .. جو روجان نفس الطريقة .. كل اللي هو بيعمله .. إنه بيفرد مساحة لأى شخص بيطلع معاه إنه يتكلم في أى شيء هو عايزه .. . طب و إيه المشكلة … ما يعمل ده عادي .. إيه اللي يمنعه ؟! . .. لأن زي ما شرحت في البوست إياه .. هو نباطشي محترف .. بيعرف كويس جداً يزود الإثارة و الجدل و الدوشة . .. فبتكون النتيجة إيه ؟! .. إن الأغلبية من البشر ( إرجع للنقطة رقم 4 ) .. من الملايين اللي بتسمعه .. بيتلعب في أساسايتها .. .. اللي هو بيوصلوا للنتيجة بتاعت ( مش يمكن أساساً مافيش فيسبوك إنت بتقرا الكلام ده عليه دلوقتي 🤣🤣 ) . … 13- ال ( خلخلة ) اللي بتحصل لك دي .. نتيجة إنك بتسمع كم ضخم من ال ( قشور العلوم - Pseudo science ) .. بتكون نتيجتها كارثية عليك لو إنت أساساً مش متعلم صح .. يعني لو ماعندكش مرجعية منطقية و علمية قوية .. لأنك بعد ما ( بتتخلخل ) بالمنظر ده .. و تتملي فراغات فجأة.. بيتم إعادة تشكيل وعيك بسهولة جداً .. علي حسب مين صوته أعلي فودانك .. و مين قاعد قدام عينيك طول الوقت . … 14- يعني .. لما أفضل أقنع فيك إن : ناس من القارة المظلمة هما اللي بنوا الأهرامات .. و كانوا علي تواصل مع حضارات علي كواكب أخري .. و إن الأهرامات فيها أسرار تكنولوجية ضخمة مرعبة .. و إن أبو الهول بيطلع بليل علي ( circle k ) يشقط و يكروز بال بي إم بتاعته🤣 . .. و إنت تتملي فضول و شكوك عن كل الكلام الكبير و المثير أوي ده .. .. تعالي بقي إدرس أساسيات الرياضة .. لا يا عم ..ده ملل .. تعالي بقي إدرس أساسيات المجالات الكهرومغناطيسية و الكهربية .. لا يا عم .. ده ملل و هري .. تعالي طيب إدرس تاريخ … لا يا عم .. ده ملل .. .. لأنك عايز من التاني الحلو المسكر اللي عليه توابل .. اللي فيه شغل أفلام و أسرار و حاجات حتغير معني الكون و الحضارة و تقنعك إن الكشري أحلي من غير تقلية . … 15- الغباء و الوهم و الجهل .. هو إنى آخدك من علي باب الجيم .. قبل ما تبدأ تمرين خالص … و أعيشك في أفلام و حوارات عن المصل اللي حتضربه في العروق تتحول ل كابتن أميريكا . . و لما ييجي حد ( مهما كان درجة شكوكك فيه ) .. يتكلم و يقول إن والله الناس اللي عندها عضلات دي .. عملتها في الجيم .. و علي مدار سنين .. و الموضوع مافيهوش أى أسرار و أمصال و شغل هوليوود ده .. تكرهه إنت و تشتم فيه .. لأنه مش عايز يمتعك و يزيط معاك في الأسرار و الحكايات و الهري ده كله . … 16- و بعد سنين .. حتلاقي حد تاني ( خلينا نفترض إسمه حمادة ) بيتم إستضافته في برنامج تاني مع مذيع تاني مشهور فحت .. و حتلاقي ملايين الناس طالعين ينكتوا و يشتموا و يهزروا و يقولوا ..
• شفتوا ؟! .. شفتوا النصاب الأحمق العبيط اللي إسمه حمادة .. طالع فضحنا إزاي ؟! .. و يمصمصوا شفايفهم إزاي إن مافيش حد ذو قوة و حكمة و ( صلاح الدين فنفسه ) يطلع ينجدنا و يحارب بدالنا .. … و غالباً حاكتب برضو بوست .. أشرح فيه وجهة نظري في 16 نقطة تانيين .. و الناس حتقول لي إني ( باطبل ) ل حمادة . … و الله أعلم .