" إحنا اللي خلينا فيفا تزود قاعدة إن حارس المرمي

” إحنا اللي خلينا فيفا تزود قاعدة إن حارس المرمي ماينفعش يمسك الكورة لأكتر من 6 ثواني بعد اللي عمله شوبير في كاس العالم ” … الجملة اللي فاتت دي .. من أشهر الجمل اللي بتسمعها فمصر .. و حقيقية فعلاً .. بعد اللي عمله حارس المرمي المصري ( أحمد شوبير ) في كاس العالم 1990 .. و إزاي فضل يقتل المباراة بإنه يمسك الكورة .. تم إضافة قاعدة ال ( 6 ثواني ) بسببه . . يعني .. عدد ضخم جداً من ماتشات و بطولات كرة القدم إتلعب قبل 1990 .. و بسبب تصرف فرد واحد بس .. تم إضافة قاعدة رئيسية .. شرط أساسي .. حد من حدود اللعبة .. بيمشي علي كل اللي بيلعب اللعبة بعد كده . … اللي عمله شوبير في ماتش مصر في كاس العالم 1990 .. إسمه ( worst case scenario - أسوأ سيناريو محتمل ) .. و بناءاً عليه .. تم إضافة القاعدة دي في قواعد اللعبة .. .. حياة أى ( مهندس / مصمم / حد بيبني أى حاجة ) .. بتدور بشكل أساسي حوالين فكرة ال ( worst case scenario ) .. .. يعني .. دورك ك ( مهندس مدني ) مثلاً .. بيكون أغلبه هو (مراعاة المعايير اللي تم وضعها علي مدار سنين من تجارب و إختبارات من أسوأ السيناريوهات المحتملة ) .. يعني تتأكد إن كل حاجة في عملية البناء تمت بحيث إن لا قدر الله لو حصل أى مصيبة حصلت قبل كده و تم إكتشاف سببها .. ماتحصلش تاني . … لو كنا في ( عالم مثالي = يوتوبيا ) .. ماكنتش حتحتاج مهندسين إطلاقاً علي فكرة .. كان أى إنسان عايز يبني بيت مثلاً .. يقدر بكل بساطة و سهولة يحط شوية خشب علي طوب بأى طريقة عشوائية .. و لأننا عايشين في عالم ( مثالي ) .. العشوائية دي حتنتج أفضل صورة ممكنة لإحتمالات الخشب مع الطوب .. و كل سنة و إنت طيب ألف مبروك إنت بنيت قصر مشيب جامد تنين .. و فيه حمام سباحة كمان لو عايز . … لو كنا في ( عالم مثالي = يوتوبيا ) .. ماكنتش حتحتاج دكاترة إطلاقاً برضو .. لأن أى ( خلل ) في بيولوجيا جسمك .. ماكنش حيحصل إطلاقاً .. فبالتالي .. كل خلايا و أنظمة جسمك الحيوية حتفضل شغالة بأفضل صورة ممكنة .. و بالتالي .. مش حتحتاج أى دكاترة . … لو كنا في ( عالم مثالي = يوتوبيا ) .. بكل تأكيد مش حتحتاج أى حماية أو أنظمة دفاعية ضد أى ضرر ممكن يصيبك .. تناغم كامل بين كل عناصر و سكان العالم ده .. و مافيش أى حد بيضايق أى حد أو يركن قدام جراج بيتك و يعشق عربيته و يقفل عليك .. لأنه متخلف مش عارف يقرأ إن ده جراج دائم الإستخدام 🤣 . … و بكل تأكيد .. لو كنا في ( عالم مثالي = يوتوبيا ) .. الفيفا ماكنتش حتحتاج تضيف قاعدة ال (6 ثواني ) .. لأن مافيش أى حارس مرمي حيبقي عايز يقتل متعة اللعب الحقيقية بأسلوب اللعب المستفز ده 🤣 . … … الحقيقة .. هي إن العالم اللي إحنا عايشين فيه .. مش مثالي إطلااااااااقاً .. بل إن فكرة ال ( يوتوبيا = العالم المثالي الحلو البمبا المسخسخ ) دي فكرة مستحيلة منطقياً بكل الأشكال و الصور .. و أى صورة تحاول تقرب لها من قريب أو من بعيد .. فده معناه إن في خلل و ضرر ضخم واقع في مكان آخر بسبب المحاولات دي .. و مش محتاج إنك تكون ( مؤمن موحد بالله و مسلم ) عشان توصل للفهم ده .. و حاشرح إزاي .. .. و لكن لو إنت (مؤمن بالله و مسلم ) .. يبقي المفروض إنك مؤمن بالتالي : إن دي أحد أقوي خدع الشيطان للإنسان طول حياته .. لأن الشيطان شاف الإنسان و طريقة حياته و تفكيره في الجنة .. و شاف إزاي قدر يخلي الإنسان يتصرف بالشكل اللي يتسبب بطرده من الجنة .. و شاف الإنسان في الأرض .. و الإنسان بطبيعته .. كائن بيعتاد و يألف ( creature of habit ) .. يعني بيحاول يدور علي المألوف و المعتاد بالنسبة له طول الوقت .. و الإنسان لما كان في الجنة .. كان كل شيء ( مثالي ) .. ماكنش في أى خلل أو لغط أو خلاف أو ضرر .. .. فلما نزل الإنسان علي الأرض .. أصبح جزء منه طول الوقت بيطمح لده .. بيشتاق له .. بيتمناه .. .. و الشيطان بيتواجد مع الأماني .. دايماً .. حتي الأنبياء .. الشيطان ألقي في أمنياتهم .. فما بالك بالبشر العاديين ؟.. … … لو درجة إيمانك و فهمك لإسلامك ماوصلتش إنك تفهم الكلام اللي فات ده .. أو حتي لو مش ( مؤمن مسلم ) .. و بالتالي مش مؤمن بوجود ال ( مُسبب ) .. يعني وجود ( الله ) .. و وجود الشيطان .. .. ممكن تفهم نفس الكلام لو فكرت بشوية منطق و معلومات .. … يعني : … تواجد و تطور البشر في الأرض ماكنش نتيجة حياة ( مثالية سلمية ) إطلااااااااقاً .. بل إن أى تواجد للبشر في الأرض في أى وقت .. نتج عنه .. و بينتج عنه دايماً ( قتل , تشريد , حروب , معاناة , ألم , ظلم , … ) و كل ما يمكن إنك تتخيله من مصايب . … ليه ؟! … لأن رغبة البشر في إشباع غرائزهم دايماً بتكون أكبر من قدرة الموارد المتاحة حواليهم في إشباع الرغبة دي . … يعني إيه ؟! .. يعني دايماً حتلاقي ناس عايزة تاكل أكتر .. و بفرض إنك قدرت توفر أكل أكثر بكتير من عدد البشر .. حتلاقي غريزة تانية ظهرت .. و ناس عايزة تتجوز أكتر ( علاقة جنسية أكتر ) .. و القاعدة الرئيسية فموضوع العلاقات الجنسية دي معروفة لكل الرجالة بلا إستثناء .. و هي : ( أجمل مرأة علي الإطلاق .. هي المرأة اللي لسة إنت ماحصلتش عليها ) . . و بفرض إنك قدرت بشكل ما تغطي شبع الغريزة الجنسية لكل أعضاء مجتمعك المثالي ده .. حتلاقي غريزة الإمتلاك .. و غريزة الإنجاز و تحقيق الذات .. و غريزة السُلطة و القوة .. و غريزة الملل و الرغبة في الإثارة .. و غريزة الإكتشاف .. و غيرهم و غيرهم و غيرهم .. . و مستحيل منطقياً و بكل الطرق و الإمكانيات الأرضية و البشرية .. إنك توجد مجتمع فيه إشباع كامل مستمر لغرائز كل أعضاءه .. طول الوقت .. .. طيب .. إيه اللي حيحصل بعد كده ؟! .. .. ال ( cracks - شروخ ) حتبدأ تحصل تدريجياً في بناء المجتمع بتاعك ده .. و تفضل تكبر لحد ما توصل لكسور .. و يتحزب الناس .. و تلاقي مجموعة بتطلب الوضع (أ ) .. و مجموعة بتطلب الوضع (ب) .. … و هنا بتبدأ تكتشف صفات جديدة في الطبيعة البشرية .. و لكنها من أكثر الصفات الأصيلة و اللي من الصعب جداً إنك تروضها .. و أهمها صفة ال ( إنتماء ) .. .. حتلاقي إن الناس اللي عايزة الوضع ( أ ) .. أصبحوا شايفين نفسهم أقرب لبعض .. و بينتموا لبعض .. و بسبب ( إنتماءهم ) ده .. بيتسببوا في خلافات أكبر ماكنتش حتحصل قبل كده .. ضد الناس اللي في المجموعة ( ب ). .. يعني … حتلاقي قدامك علي القهوة .. إتنين مافيش بينهم أى علاقة سابقة غير إن واحد بيشجع الزمالك .. و واحد بيشجع الأهلي .. و حتلاقيهم بيتخانقوا .. مع إن ( غرائز ده ) .. إطلاقاً مش متعارضة مع ( غرائز ده ) .. .. و لكن ( إنتماءهم ) الوهمي لمجموعات مختلفة .. بيولد جواهم ال ( عصبية و القبلية ) .. … … و علي مدار التاريخ .. دي كانت و حتفضل دايماً هي الحياة البشرية في الأرض .. إنت حالياً قد تكون متجاهل حقائق كتير عن ( وضعك ) .. و لكن ده إطلاقاً مش معناه إن الحقائق دي مش موجودة .. .. يعني : .. إنت حالياً تظن إن غرائزك الأساسية ( مأكل , مشرب , ملبس , مسكن , زواج ) إشباعها مش متعارض مع أى حد حواليك .. و لكن ده مش حقيقي .. إنت بس عايش داخل ( حدود ) .. حدود موضوعة لك .. و إنت عايش جواها . … الحدود دي واضحة جداً جداً جداً .. حدود ( مال و موارد ) + حدود ( قوة و نفوذ ) . اللحظة اللي الحدود دي بتوسع شوية .. بتلاقي نفسك بشكل طبيعي بتفكر في إشباع غرائزك بشكل أكبر .. أو بتكتشف غرائز جديدة . … … الفكرة هنا بقي .. هي إن ال ( حدود ) دي .. مش إنت اللي حاطتها لنفسك .. ال ( حدود ) دي .. محطوطة لك .. و إنت طول عمرك بتتخانق و بتعافر بس عشان تزقها لبرة و توسعها شوية ب شوية . .. بتصرف أكبر قدر من ( وقتك و مجهودك ) .. اللي هما الحاجتين الوحيدين في الحياة اللي تمتلكهم .. فقط عشان توسع حدود ال ( مال ) و ال ( قوة ) .. بما يكفي إنك تشبع غرائزك الأساسية .. … و لكن .. .. اللي جنبك هو كمان له حدود بيحاول يوسعها .. و اللي جنبه .. و اللي قدامك .. و اللي وراك .. .. و زي ما شرحت .. حتلاقي دايماً اللي عايز يوسع حدوده .. علي حساب حدودك .. .. و لو لقاك قوي .. و بتدافع عن حدودك .. حيسيبك .. و يدور علي اللي جنبه من الناحية التانية .. .. المشكلة هنا .. هي إن اللحظة اللي حيقدر فيها إنسان إنه ( يوسع حدوده ) علي حساب إنسان جنبه .. مش حيكتفي بده .. و لكنه حيبقي دلوقتي أقوي .. لأنه بيتحرك فحدود أكبر منك .. فاهم ؟! .. يعني هو أصبح عنده موارد مالية و قوة و نفوذ أكبر منك .. لأنه قدر يستولي علي نصيب اللي جنبه .. .. فدلوقتي .. لما يحاول يعتدي علي حدودك .. مش حتقدر تمنعه زي ما منعته أول مرة .. لأنك أضعف .. و حيقدر يغتصب .. حدودك . … … هنا بقي لازم تسأل .. طيب .. مين اللي حط لينا الحدود دي من الأول ؟! .. ليه أنا ماحطش حدودي لنفسي .. و أعمل إمبراطوريتي لوحدي بعيد .. و أتأكد إني فأمان بعيد عن اللي عايز يغتصب حدودي .. .. حتلاقي نفسك بتلف و تدور حوالين نفسك .. لأن مهما بعدت .. حتلاقي اللي إنت بعدت عنهم هناااااااااااك خالص دول .. واحد فيهم كبر و تفحل و إغتصب كل اللي حواليه .. و أصبح خطر ضخم جداً مستحيل إنك تقف قدامه بعد كده .. .. و حييجي يسفلت بوش حدودك الأرض 🤣 … … و دي طبيعة البشر طول التاريخ زي ما شرحت . .. و علي مدار التاريخ .. البشر إرتكبوا .. و ما زالوا بيرتكبوا أفظع الجرائم في حق بعض أثناء عملية إغتصابهم لحدود بعض .. .. و علي مدار التاريخ .. الناس بتدور علي حلول .. و تايهين في البحث عن الحلول دي .. .. بتلاقي ناس بينادوا .. إن التوهان و العبط و الغباء و الهطل اللي بيحصل ده كله .. نقدر نتفاداه و نعيش بشكل أفضل بكتييييير جداً .. .. و إن الإجابة واضحة .. .. و بيبدأوا يشرحوا أصل الحياة دي جه إزاي .. إتبنت إزاي .. إتخلقت إزاي .. و مين هو الخالق .. .. و بعد ما بيشرحوا من هو ال ( خالق ) .. بيشرحوا رسالته .. الرسالة اللي فيها كل الحلول .. حلول إجتماعية إقتصادية سياسية مادية نفسية .. .. فالناس بتسأل .. فين الدليل ؟ .. فين الدليل إن إنتوا ال ( مُرسلين ) .. فبيشرحوا بالدلائل و المعجزات و الأخبار .. و في ناس بتفكر .. و تفهم .. فبتصدق .. و تؤمن .. و في ناس تانية .. بتعاند .. بيبقي واضح قدامها إن بكل الدلائل و البراهين … إن كلام ال (مُرسلين ) هو الحق .. و لكنهم بيعاندوا .. ليه ؟! لأن كلام المُرسلين فيه حدود تمنعهم من الإغتصاب . … … رسالة الخالق للبشر .. فيها معايير كل الحدود اللي البشر محتاجينها .. و لكنها بتمنع السرقة .. في حين إن مافيش أى سبب أرضي منطقي يمنع السرقة .. حدود الخالق بتمنع الإغتصاب .. في حين إن مافيش أى سبب أرضي منطقي يمنع الإغتصاب .. حدود الخالق بتمنع التعدي علي الغير .. بتمنع الكذب !!! .. في حين إن مافيش أى سبب أرضي منطقي إطلاقاً يمنع الكذب .. … حدود الخالق … حدود الله .. حدود من خلق السماوات و الأرض .. حدود من خلق الجنة .. حدود من خلق النار .. حدود من خلق الإنسان .. و يعلم خير الإنسان .. و يعلم شرّه .. .. حدود يعيش بيها الإنسان .. و يعمر الأرض .. … … و علي مدار التاريخ .. في خناقة دايرة .. و حتفضل شغالة .. إلي أن تقوم الساعة .. و هي الخناقة بين الناس اللي عايزة تٌقيم حدود الله في الأرض .. و الناس اللي مش عايزة تٌقيم حدود الله في الأرض .. … و زي أى خناقة في الحياة .. في ناس بتبقي بتتخانق .. و هي عارفة كويس جداً بتتخانق ليه و علي إيه .. دول هما ال ( علماء ) ضد ال ( مُضلين ) .. . و في ناس بتبقي بتتخانق .. و هي إطلاقاً مش عارفة مين ليه فين .. و لكن بتتخانق لأنها عارفة حد بيتخانق و بينصروه و خلاص .. دول هما ال ( اللي لم يتم إختبارهم بعد ) .. ضد ال ( ضالين ) .. . و في ناس بتبقي بتزيط في الزيطة .. و في ناس منافقين .. … و من ضمن مشاهد الخناقة دي .. بتلاقي دايماً مشهد : إنسان قليل العلم .. أو لا يعلم .. لكنه بيشجع فريق اللي عايزين يقيموا حدود الله .. و بيتخانق مع إنسان لا يعلم ( ضال ) .. و لأن الإنسان قليل العلم ده .. ماعندوش علم أو هداية يقدمها .. فبيلجأ لأى شيء تاني يقدر عليه ( بجهل ) للأسف .. و إما : بيشتم , يعنف , يضايق , … الإنسان ال ( ضال ) .. بدل ما يعمل اللي كان المفروض يتعمل أساساً .. و هو إنه يحاول يعلمه .. أو يوصله لحد يعلمه .. … فاللي بيحصل فأحيان كتير .. إن الإنسان ال ( ضال بحدود الله ) ده .. ممكن يكون عالم بحاجات تانية كتير جداً في الدنيا .. ممكن يكون دكتور و رئيس قسم أساساً .. .. فبيزداد كرهه لفريق اللي عايزين يقيموا حدود الله .. فقط لأنه شاف منهم الجاهل .. .. و أحياناً كتير بيشوف منهم منافقين .. … … و هنا بييجي دور ( كل من يعلم ) .. إنه يشرح .. يشرح الخناقة بين مين و مين … و ليه .. يشرح لكل الأطراف .. اللي بيشجعوه .. قبل اللي ضده .. في سورة الأنعام .. آية 108 : لا تَسُبُّوا الَّذِينَ يَدْعُونَ مِن دُونِ اللَّهِ فَيَسُبُّوا اللَّهَ عَدْوًا بِغَيْرِ عِلْمٍ ۗ كَذَٰلِكَ زَيَّنَّا لِكُلِّ أُمَّةٍ عَمَلَهُمْ ثُمَّ إِلَىٰ رَبِّهِم مَّرْجِعُهُمْ فَيُنَبِّئُهُم بِمَا كَانُوا يَعْمَلُونَ . … … … … رغبة الإنسان في الحرية .. رغبة أساسية و أصيلة في تكوينه .. و لا يوجد أى حرية بأى شكل علي الإطلاق في الحياة الدنيا .. إلا في عبودية الله بشكل كامل لا يُشرك به شيء … و عبودية الله بشكل كامل .. جزء ضخم فيها قائم علي العلم و التعلم .. و التعليم . . لأن زي ما شرحت فوق .. لو ظننت و ولو للحظة .. إنك تقدر تعيش حر في حدود .. تظن إن ماحدش حيعتدي عليك فيها .. يبقي مافهمتش و ماتعلمتش صح .. . و أحد أهم الطرق اللي تقدر تحمي نفسك بيها .. هي إنك توّعي اللي جنبك و تشرح له و تفهمه .. عشان مايتمش الإعتداء علي حدوده و ضمه لقوة المُعتدي … عدد التشبيهات اللي موجودة في الإسلام عن أهمية إن عناصر المجتمع تنبه بعضها و تقوي بعضها كتير جداً جداً .. و في غير الإسلام برضو .. … … البوست طوّل جداً .. جداً جداً .. و تأثير شوية الشاي اللي كانوا مخلييني مركز .. بدأ يروح 🤣 .. .. والله أعلم .