" أنا حيوان ... إحييني النهاردة .. و موتني بكرة

” أنا حيوان … إحييني النهاردة .. و موتني بكرة ” … الثلاث صور اللي في البوست دول : الصورة رقم (1) : سيدة من سكان الرحاب ” الراقية النضيفة ” بتشتكي إن بائع تين شوكي متجول فرش أمام محل سالي سوكريه .. . الصورة رقم (2) : خبر إزالة سوق باكوس في الإسكندرية و إخلاء الشوارع بتاعته .. و أى حد راح إسكندرية و مشي في السوق ده .. أو كان ربنا إبتلاه بإنه يسوق سيارته الجديدة الزيرو فيه .. فاهم معني التجربة دي . . الصورة رقم (3) : ” فرشة عصير لمون = Lemonade stand ” .. و ده منظر معتاد في كثير من الأحياء السكنية الأمريكية ” suburbs ” .. و ده عبارة عن نشاط تجاري بسيط بيقوم بيه الأطفال أحباب الله .. و يعملوا فرشة عصير لمون صغننة كده عالرصيف في الأجازة .. يلموا بيها شوية فلوس يجيبوا بيها لعب و كلام من ده 😅 … في صور كتير جداً ممكن إني أضيفها في البوست ده .. و لكن مش محتاج إنك تشوفها عشان تعرف باتكلم علي إيه .. مثلاً :

• صورة الطرق في معظم الأرياف ” و بما إني من دمنهور - البحيرة ” فأنا عارف باتكلم علي إيه كويس جداً 🤣 .. اللي هو تلاقي الطريق متسفلت و واسع و ممهد ما شاء الله لا قوة إلا بالله .. و بعدين تلاقي شخص ما قرر يفرش عالطريق السريع مباشرة .. و يحط نصباية فاكهة أو أى سلعة أخري .. و بعد يومين تلاتة يبقوا شخصين .. و بعد 10 .. و بعدين يقرروا من تلقاء نفسهم إن الوضع كده خطر عليهم ولازم يحافظوا علي أمان أطفالهم اللي بقوا بيستخدموا الشارع كملعب و مرتع و حمام عمومي كمان .. يقوموا بانيين مطب صناعي طوله لا يقل عن 45 سم .. و مصمم بحيث إنه يدغدغ عفشة أى عربية تعدي عليه .. . و بعدين يقرروا إن المنطقة دي أصبحت منطقة حيوية .. و خلال أسبوعين بالكتير تلاقيهم بنوا أرضي و تلات أدوار علي نفس الأسفلت الجديد اللي لسة معمول .. و يعمل مدخل البيت ممتد لحد نص الشارع .. و يقعد قدامه عشان يتسلي مع اللي رايح و اللي جاي 🤣😅😡 . … … لو مفكر إن الثلاث صور اللي في البوست , و الصورة البشعة اللي وصفتها فوق دي .. مالهومش علاقة ببعض .. للأسف ده معناه إنك من نوعية البشر اللي عايشين حياتهم بأسلوب : ( إحييني النهاردة و موتني بكرة ) . … … في سؤال معين دايماً باحب أسأله لما بادخل في نقاش طويل مع أى إنسان .. و ده بيكون عشان أعرف .. هل الإنسان اللي قدامي ده .. إنسان ولا حيوان … و هو : إيه الفرق ؟! إيه الفرق بين الإنسان و الحيوان ؟! .. و قبل ما تفكر كتير .. حاجاوب مباشرة عشان وقتي و وقتك .. الفرق هو : الوعي . .. إيه هو الوعي ؟!!! . بإختصار مخل : الوعي هو القدرة علي التفكير و التخيل في الزمن .. و دي حاجة ربنا أخص بيها الإنسان دوناً عن باقي المخلوقات اللي نعرفها و نراها .. و أحد أكتر الحاجات اللي عليها دوشة حالياً في ” هل الذكاء الإصطناعي قادر علي الوصول لمرحلة الوعي البشري ولا لا ” . … … أحد أسهل الطرق إنك تفهم معني الوعي .. هو تجربة المارشميلو المشهورة فحت .. اللي هو لما جابوا شوية عيال صغننة .. و حطوا كل واحد منهم في إختبار ..و سألوه :
• تاخد حتة مارشميلو واحدة دلوقتي حالاً ؟ .. ولا تستني ساعة و تاخد حتتين ؟! . و شافوا إجاباتهم .. و علي مدار 40 سنة بعد كده .. شافوا العيال دي كبرت و وصلت لفين . .. معظم اللي قال آخد دلوقتي حتة واحدة .. كبروا و تحولوا لبشر غير مؤثرين إطلاقاً .. ( عمال باليومية , عواطلية , فاشلين بمقاييس كتير في حياتهم ) . . في حين إن اللي قال أصبر و آخد حتتين كمان ساعة .. كبروا و تحول معظمهم لبشر ناجحين بمقاييس كتير في الحياة ( أكاديمياً و عملياً و مادياً .. و إجتماعياً كمان ) . … … العيال اللي قالت ” نصبر دلوقتي و ناخد حتتين بعد ساعة ” .. كان عندها القدرة علي التخيل بعد ساعة حيحصل إيه .. و عقلهم قدر يسيطر علي غريزة الشهوة للمارشميلو … مقابل مكسب أكبر في المستقبل . .. هو ده الوعي المقرون بالفعل . … … … تقريباً كل أفعال و أفكار الإنسان .. مرتبطة بالوعي ده .. بداية من إدراكك إنك جعان و عايز ترضع .. لحد ما تكبر و تظهر جواك تساؤلات عن ” مين رب الكون ده ؟! , قوتي محدودة لحد فين ؟! .. و هكذا ” . … … الوعي ده بقي .. نوعين أساسيين .. 1- وعي فردي . 2- وعي جمعي . … … الوعي الفردي : ده شرحه ساهل نسبياً … هو اللي يخصك لوحدك و منعزل و مالوش دعوة باللي جنبك بيفكر إزاي .. أو اللي حواليك بيتصرفوا إزاي .. . و الوعي الجمعي : ده بقي اللي معقد .. و مايفهموش غير اللي واصل لمرحلة عالية من الوعي الفردي .. تمكنه من إنه يفهم هل هو يصلح لفهم وعي المجتمع ولا لا . يعني .. هل هو يصلح للفتي في آراء الجماعة و ما يخصهم .. ولا يخليه فنفسه كافي غيره شره ؟! … . و عشان كده الرسالة نفسها ” الإسلام أقصد ” .. هو جزئين أساسيين . 1- إسلام الفرد . 2- إسلام المجتمع . و برضو كل جزء و له قوانينه و فقهه و شرحه و تفاصيله الخاصة بيه . و ماينفعش تطبق قوانين إسلام الفرد علي المجتمع .. أو قوانين إسلام المجتمع علي الفرد الواحد .. إلا بفهم كامل للجزئين .. . يعني : الإسلام في أساسه دين رحمة قبل ما يكون دين قانون .. و في قصص كتير جداً عن النبي صلي الله عليه و سلم في ده .. و إزاي كان بيراجع الصحابة و يحاول قدر المستطاع إنه لا ينفذ عقوبات عليهم مثلاً .. . في حين إن الخطاب الجمعي كان واضح .. ” لو أن فاطمة بنت محمد سرقت لقطعت يدها ” . … … … … نرجع للصور اللي في البوست : إيه اللي يخلينا شايفين سيدة مدينة الرحاب إنها ظالمة و برجوازية و بتقطع عيش بياع التين الشوكي الغلبان .. و لكن فنفس الوقت يخلينا بنلعن و نسب لما نشوف العشوائية في إشغال الطرق العامة ؟! و فنفس ذات الوقت يخلينا بنشجع العيال الصغننة اللي عاملين فرشة عصير لمون علي جنب الطريق ؟! .. الفرق مش إطلاقاً في الحجم .. .. يعني : الخلية السرطانية و العياذ بالله أول ما بتظهر في جسم إنسان .. مش بنقول سيبها تسترزق دي غلبانة و لوحدها 🤣 .. لا .. الخلية السرطانية بتتكاثر بشكل … سرطاني .. و تستولي علي جسم الإنسان بالكامل . ليه ؟! لأن السرطان مش بيفكر في مصلحة جسم الإنسان .. مع إنه من نفس خلاياه بالظبط . . السرطان مرض خبيث .. لأنه بيفكر في مصلحته هو فقط .. علي حساب جسم الإنسان اللي هو عايش جواه .. و غبي .. يعني بيسبب إن جسم الإنسان يموت .. و بالتالي هو كمان حيموت .. و لكنه مش بيفكر في المستقبل بشكل واعي .. هو بيفكر فقط في : إحييني النهاردة و موتني بكرة … .. بنفس الطريقة .. لو سبت بائع تين شوكي واحد في منطقة خالية من الباعة الجائلين إطلاقاً .. و قلت عادي ده غلبان و بيسترزق .. خلال أقل من شهر .. حتتحول المنطقة حواليه لسوق شعبي بالكامل لا تحكمه غير قوانين الغاب يعني ” إتاوات , بلطجية , غباء , قذارة , تلوث , … ” . … … و ده خصوصاً لما يكون المجتمع أساساً فيه إستعداد لفساد عناصره بسبب جوع و فقر أغلبيته . … … … بنفس الطريقة جسمك و عقلك و كيانك ك إنسان . . لو تركت لجزء من أفكارك حرية تصرفها بشكل عشوائي يتبع فقط هواه .. التحول اللي حتشوفه في نفسك للأسوء بيكون تحول سريع و سرطاني بشكل فظيع .. .. في حين إنك لو فهمت إن كل جوارحك ( مشاعرك , أفكارك , أعضائك ) .. عبارة عن مجتمع كامل .. لازم تحافظ علي كل جزء فيه قدر إستطاعتك من إنه يتصرف بشكل ” حيواني ” .. و يحاول يشبع غريزة فيه بدون التفكير في ” يا تري في المستقبل ده ممكن يؤدي لإيه ؟! ” .. .. ساعتها فقط حتقدر تقوي ( مجتمعك / جسمك / كيانك ) بالشكل الكافي .. إنه يتحمل شوية ( عيال بتبيع عصير لمون عالرصيف 🤣 ) .. و تكون شايف ده حاجة حلوة و متاحة .. بدون ما تؤدي بيك لعشوائية سرطانية كاملة . … … و الله أعلم .

#إسلام_أسامه_الجويلي