( ماتنتعش = لا تنتع )

( ماتنتعش = لا تنتع ) … طيب , بما إني رجعت الحمد لله .. و شربت القهوة بالزعفران بفضل الله .. خليني أبتدي بالبوست الأولاني .. علي ما أهضم عشان عايز أنزل الجيم بعد شوية . … البوست الأول في سلسلة البوستات اللي محوشها بقالي فترة .. بعنوان : ( الوقت مش كالسيف الحقيقة .. الوقت كالدامبل ال1 كيلو .. ماتنتعش ) . … أى تنين جديد راح الجيم .. عارف صف الدامبلز اللي بيبتدي من 1 كيلو .. و معاك لحد 40 كيلو فأغلب الأحيان. المهم .. بص يا عم التنين .. عايزك تروح تمسك الدامبل ال1 كيلو بس .. الصغنن ده .. الملون .. الحريمي .. اللي عمرك ما إتمرنت بيه فحياتك و بتتكسف تشيله من مكانه حتي .. أيون .. هو ده .. روح إمسكه .. و إرفع إيدك علي إمتدادها … و … بس كده .. خليك رافع إيدك قدامك .. أو جنبك .. زي ما تحب .. المهم تثبت .. ماتتحركش .. و عد بقي يا وحش .. حتعرف تثبت قد إيه ؟ … … أجمد تنين مجنح من إصحابك تعرفه بيبات و ينام في الجيم .. غالباً حيبدأ يغني ظلموه بعد دقيقة و نصف .. و بعد دقيقتين ( ده لو وصل ) .. غالباً حيبدأ يدمع و تحس بالشفقة تجاهه . .. في حين إن نفس صاحبك التنين المجنح ده .. ممكن بكل سهولة ” ينتع ” الدامبل ال40 كيلو في تمرينة بنش .. أو يشيله من مكانه بسهولة و يوريك هو جامد قد إيه .. لكن ” نتع ” .. يعني شيل بسرعة .. يعني ” يتغاشم ” .. لكن مدة طويلة .. و ثبات .. لا … ساعتها بس بيكتشف قد إيه الوزن تقيل فعلاً . … … تقريباً بقي .. كل حاجة في حياتك .. نفس الطريقة .. ” نتعها ” ساهل .. لكن الثبات عليها … أصعب ما يكون .. علي الإطلاق .. و لو مافهمتش ده بدري في حياتك .. حتلبس خوازيق بالهبل … و حتفضل كل شوية تكتشف إنت حمار قد إيه .. .. خليني أشرح : .. مثال محلول رقم (1)

• بتصحي من النوم يوم 1 يناير كل سنة .. و إنت ناوي تكون إنسان جديد .. و تبطل السجاير .. و تشرب حديد .. صح ؟ و بعدين .. بعد ما بتنتع أول يوم فعلاً نتعة سليمة .. و تبطل سجاير .. و تشيل حديد .. و تصلي جماعة كمان .. تاني يوم ؟! .. غالباً بترجع زي الأول إن لم يكن أسوأ . .. مثال محلول رقم (2)
• واحد صاحبك بيقول لك علي فرصة بيزنس أو شغل جامدة .. و بتجيب فلوس حلوة كتير .. و حلال .. بس محتاجة مجهود شديد و دراسة كتير .. فبتححمس زوحليقة .. و بعدين .. بعد ما بتنتع أول يوم النتعة السليمة .. و تنزل كورسات .. و تشتري كراسات .. و تكتب علي الفيسبوك رحلة الإنطربرنور حتبدأ أهه … تاني يوم ؟! .. غالباً بترجع تقعد علي القهوة .. و تكسل .. و لو حد سألك علي البيزنس ده بعد كده بتقول إنه هجص و أى كلام و مش حقيقي .. فقط لمجرد إنك ماجربتش تكمل أكتر من كام يوم فيه . … أمثلة كتيييييييييير فحت علي الموضوع ده … … … و لكن لأن الإنسان بطبعه ( ظلوم , جهول , جدول , … ) و كل الصفات اللي مذكورة في القرآن عن أمراض النفس البشرية .. إحنا بننسي .. .. بننسي إن الموضوع ده مشروح في ديننا و سنة الرسول الكريم محمد صلي الله عليه وسلم بكل تفصيل . … عن عائشة أم المؤمنين أنَّ رسول الله -صلى الله عليه وسلم- قال: (سَدِّدُوا وَقَارِبُوا، وَاعْلَمُوا أَنْ لَنْ يُدْخِلَ أَحَدَكُمْ عَمَلُهُ الجَنَّةَ، وَأَنَّ أَحَبَّ الأَعْمَالِ إِلَى اللَّهِ أَدْوَمُهَا وَإِنْ قَلَّ)،[١] وفي رواية أخرى للحديث: عن عائشة أم المؤمنين أنَّها قالت: (سُئِلَ النَّبِيُّ صَلَّى اللهُ عَلَيْهِ وَسَلَّمَ: أَيُّ الأَعْمَالِ أَحَبُّ إِلَى اللَّهِ؟ قَالَ: أَدْوَمُهَا وَإِنْ قَلَّ. وَقَالَ: اكْلَفُوا مِنَ الأَعْمَالِ مَا تُطِيقُونَ). … … و هنا بييجي دور وعي الإنسان بقدرته و إمكانياته .. و لكن بعد إيمانه و علمه الشرعي … في أكثر من حديث علي حد علمي عن حكم بقاء المسلم في مجتمع غير مسلم … و إزاي إن لو كان ده مفروض .. و شيء الإنسان المسلم مُجبر عليه .. يبقي يخلي باله جداً و يحاول قدر الإمكان إنه مايخالطش المجتمع ده في تفاصيله الحياتية ( مأكل , مشرب , مسكن , … ) .. .. الإنسان بطبعه كائن إجتماعي .. بيتأثر جداً باللي بيعاشرهم و اللي يعاشروه .. و بيأثر فيهم هو كمان .. لكن .. بالظبط زي كل شيء في الحياة .. قوة التأثير دي بتتناسب من إنسان لإنسان . … … هل مافيش ناس بتتأثر بالمسلم التقي الورع اللي بيروح مجتمع غير مسلم و يكون فخور بإسلامه هناك ؟ بكل تأكيد في .. و كتير بيتأثروا بيه .. لكن هو كمان بيتأثر بيهم .. و علي حسب نيته و علي حسب طاقته .. بيبدأ يتحول تدريجياً .. و بتبدأ الحاجات السهلة جداً اللي إنت ممكن تضحك من سهولتها .. زي إنك تقول لواحد بيعزم عليك بإزازة بيرة مثلاً ( لا شكراً دي حرام ) .. حتلاقيها تدريجياً بقت صعبة فحت .. صعبة جداً .. بالظبط زي الدامبل الواحد كيلو ده .. تدريجياً .. بتبدأ طاقتك علي الرفض تضعف .. و توصل لمرحلة الإنكسار .. إما إنك بتاخد موقف صارم واضح يحصرك في شكل معين داخل المجتمع اللي إنت عايش فيه ده .. أو .. بتلاقي نفسك سبت الدامبل الواحد كيلو ينزل شوية عشان تريح إيدك .. و يااااااااااااااااااااااااااااااه .. يا لها من راحة .. حرفياً بتلاقي نفسك مستريح للغااااااااااااااااااااااااااااااااااااااااية .. … و مجرد فكرة إنك ترفع الدامبل الواحد كيلو ده تاني .. بتبقي فكرة غاية في الصعوبة و الثقل علي نفسك . … … … طيب تعمل إيه ؟ .. … ببساطة … ماتنتعش . .. يعني إعرف إن لو نفسك خاطبتك إنك تقدر تتواجد في وسط 100 ست .. و مايتهزش شعرة منك .. يبقي إنك بتنتع .. و إنك ممكن جداً فعلاً مايتهزش شعرة منك .. لمدة ثانية .. إتنين .. دقيقة كاملة ماشي .. بس بعد كده شعرك كله حيتهز 😅 . .. يعني إعرف إن لو نفسك خاطبتك إنك تقدر تستني لحد ما تكبر عشان تتوب و تهدي و تبدأ تلتزم .. يبقي إنت بتنتع .. و إنك علي ما تكبر .. حتلاقي كل نفسك و وعيك .. متعود علي حياة إنت مش قادر تعيش غيرها .. و معاذ الله إنك تموت عليها . .. يعني إعرف إن لو مستني بس الفرصة تجيلك .. و تلاقي حد يستثمر فيك أو فشغلك و يديلك ال100 مليون عشان تفتح المشروع اللي تحلم بيه .. يبقي إنت بتنتع .. و إنك لو ماكنتش قادر تفهم إن في فرق ضخم جداً .. بين ال ” مال ” اللي مذكور في القرآن .. و بين ال ” فلوس ” الورقية اللي إنت شايفها قدامك دلوقتي .. حتفضل طول عمرك بتطارد وهم و سراب . ( المال أحد أنواع الرزق المادي في الحياة الدنيا … لكن ال”فلوس الورقية ” .. فدي وهم و سراب مالوش أى علاقة بالمال .. و لكنه مجرد فنكوش إنت بتستبدل بيه مالك الحقيقي .. و تحطه في جيبك ) . … … … الخلاصة .. إتعلم صح رجاء إنت إيه , دورك إيه , إمكانياتك إيه .. و إبدأ درب نفسك عليها بفهم إن ربنا خلق لك ” عمر = حياة = وقت ” .. فاللي يتعمل في ” عمر = حياة = وقت ” .. مايتعملش في لحظة ..

و ماتسيبش حد يسوحك و يتوهك و يخليك تلف تدور علي وهم .. و سراب .. و طول الوقت يخليك فاكر إنك تقدر تنتع .. تنتع لحظة التوبة .. تنتع لحظة الحرية .. تنتع لحظة الحياة ..

و يبروز لك صور و فيديوهات اللي بينتعوا دول … لحظات .. فقط لحظات .. لحظة علي يخت .. لحظة علي شاطئ .. لحظة فرح ..

اللحظة سهلة … أى حد ممكن ” ينتع ” دامبل 40 كيلو .. لكن بعدها .. عمر كامل من الألم و التعب و القلق و المعاناة … .. درب نفسك بالممكن .. سقف الممكن مذهل .. و داوم .. داااااااااااااااااااااااااااااااااااااااااااااااوم .. و إخلص النية .. .. و ربنا يبارك .