هو أنا عندي سؤال صغنن .. و يا رب مايضايقش

هو أنا عندي سؤال صغنن .. و يا رب مايضايقش حد : و سؤال تاني كبير .. و برضو يا رب مايضايقش حد : أنا عندي 32 سنة .. و حضرت مقاطعات كتير أوي ..و إنتفاضات بعدد سنين عمري تقريباً ..و جمعات غضب من أيام ما كنت فإبتدائي و الله أعلم .. و كم ضخم من الستيكرات و الملصقات في الجوامع و علي زجاج الأوتوبيسات اللي الجرافيكس بتاعها عبارة عن شوية قوالب و تيمبليتس دي .. و عليها كلام دين كتير .. و لن ننساك يا أقصي .. و كل ده . و كتبت مواضيع تعبير كتير في المدرسة من أيام 2000 والله … و خدت فيهم كلهم 9 من 10 … و أحياناً 10 من 10 كمان . .. و يبدو إن الناس اللي عملوا الحاجات اللي زعلتنا زمان … مافرقش معاهم أي حاجة من الكلام ده .. و ما زالوا بيزعلونا كل شوية .. .. السؤال الصغير اللي باسأله لنفسي :

• هل إذا ربنا مد فعمرنا .. كمان 32 سنة .. حاكتب نفس البوست ده .. بس حاضيف ليه إننا بقالنا بنشير فبوستات و بنقاطع بضائع من عند البقال لمدة 64 سنة ؟! .. .. السؤال الكبير اللي باسأله لنفسي برضو :
• هل لو بدل ما نقاطع و نندد و نشجب .. و بعد شهر أو شهرين ننسي و كل حاجة ترجع زي الأول و أسوء .. قررت مثلاً إني أغير من روتين يومي الخاص .. اللي هو حاجة من ضمن الحاجات البسيطة جداً اللي ليا تحكم عليها .. و قررت إني أدرس جزء قرآن يومياً مثلاً ( أدرس مش أقرا ) .. بحيث إني أضايق الشيطان بشكل مباشر يعني .. أو إني أدرس أى كتاب بنية إني أتعلم .. بنية إني أكون أفيد و أكثر إنتاجية في الكيان اللي بانتمي ليه … مش مجرد بق ( فم يعني ) .. أقاطع الجبنة البريزيدون كل ما أزعل و آكل بدالها ميلكانا .. .. هل ده أفضل ؟ … و لا الصح فعلاً هو إني أقاطع … تاني .. للمرة ال32 .. علي مدار ال32 سنة اللي عشتهم لحد دلوقتي . … … و الله أعلم .