جدو علي عنده خروف .. إيا إيا أوه

جدو علي عنده خروف .. إيا إيا أوه .

من كام سنة .. لما كنت باشرح كورس ( تصميم و برامج أدوبي ) فنيو هورايزونز فإسكندرية .. دخلت فحصة من الحصص .. و وقفت قدام الحاجة و تلاتين بني آدم اللي قاعدين .. و بدأت أغني .. جدو علي عنده خروف … إيا إيا أوه .. … … فاكر كويس جداً آخر السنة فخامسة إبتدائي .. فمدرسة الحديثة الخاصة فدمنهور . و إزاي تم تجميع الفصلين ( خامسة أول و خامسة تاني ) .. أنا كنت فخامسة أول .. و تم إختيار عدد معين من الأشخاص عشان إحتفالات آخر السنة اللي كان بيتم التجهيز لها .. و جزء من الإحتفالات دي .. كان إن عدد معين من الأشخاص حيغنوا ( جدو علي عنده خروف .. إيا إيا أوه ) .. بس بالإنجليزي ( النسخة الأصلية .. Old MacDonald Had A Farm ) .. و كانت الكلمات بتاعت الأغنية مكتوبة بالإنجليزي فكتيب صغنن إتوزع علينا .. و تم إختيار عدد معين من الأطفال عشان يغنوا الأغنية دي .. و في الإختيارات الأولي .. كنت من ضمن المختارين عشان ( طويل و بينطق إنجليزي نص نص ) .. و لكن تم إستبدالي بسهولة جداً بمجرد التجارب الأولي .. عشان :) . ( بيتوتر جداً و يتلجلج .. نطقه مش حلو أوي .. مش قادر يحفظ الأغنية و الكلمات .. في غيره أحسن منه ) . … … فاكر كويس جداً إن الموضوع ده فضل فجزء بعيد جداً فذاكرتي .. و غالباً بشكل غير مباشر أثر علي إختيارات كتير أخدتها فحياتي بعد كده .. كنت كل ما أفتكر شكل الميس و هي بتقول لزميلتها الميس التانية قدامنا كلنا في الفصل .. و بصوت عالي الكل سامعه … علي أسباب رفضي دي .. كنت أحس إني باعيش الموقف من أول و جديد .. … … لفترة طويلة جداً طول حياتي .. ذاكرتي عموماً … و ال ( working memory ) خصوصاً ( الذاكرة القصيرة يعني ) كانت بتشكل ليا أكبر عائق قدام أي حاجة أنا عايز أعملها .. كنت بابقي مقبل مثلاً علي أى علم .. بشغف و حماس و حب .. و بعدين علي ما أوصل للإمتحان علي أول جزء منه .. ألاقي نفسي واقف قدام أسئلة تافهة جداً و بسيطة جداً .. و مش قادر أجاوب .. أحيان كتير كنت بابقي عارف الإجابة عاملة إزاي .. و عارف إني ذاكرتها .. و حليت أسئلة عليها .. كتير .. بس مش قادر أفتكر أى تفاصيل تساعدني أجاوب . … … فاكر كويس جداً إني فبدايات تعلمي للشطرنج و أنا طفل صغير فتانية إبتدائي .. كنت باسأل أهلي إذا كانوا عندهم المشكلة دي ولا لا … بس ماكنتش قادر أشرح بالظبط المشكلة إيه .. و فضلت باتعامل مع ال ( مشكلة ) دي في الشطرنج مثلاً .. إنها شيء لازم أعيش بيه .. و مهما حاولت أشرح إنها ( مشكلة ) .. ماحدش من اللي حواليا كانوا بيفهموا أنا باتكلم عن إيه … ده كان لحد من سنتين .. لحد قبل ما أتعلم يعني إيه ( ADD - Attention Deficit Disorder ) . يعني متلازمة إضطراب الإنتباه . … و دي كانت هي اللي بتخليني في الشطرنج .. أبتدي أبني خطة معينة … إستراتيجية معينة ( هو حيتحرك كده .. فأنا أتحرك هنا .. و بعدين أعمل كذا .. عشان هو يعمل كذا .. و تكون الإختيارات المتاحة قدامه كذا و كذا و كذا … ) .. خطة بتتكون من عدد معين من الخطوات اللي باتوقعها في المستقبل .. و كنت دايماً بمجرد ما أوصل للخطوة السادسة أو السابعة مثلاً .. أنسي الخطوة الأولي كانت إيه !! و بعدين أنسي التانية .. و لما أحاول أرجع أفتكرهم .. أنسي أنا كنت عايز أوصل لفين .. بالظبط كأنك بتحاول تمسك أكتر من طبق و أكتر من فنجان فإيديك فنفس الوقت .. و كل ما تركز علي واحد منهم .. الباقيين يقعوا .. و بعدين كله يقع .. و تلاقي نفسك في الآخر واقف باصص لأفكار كتير متكسرة و مرمية حواليك .. … … و أنا صغير كنت باصرخ .. صريخ حرفي .. (((( أنا مش قادر أفتكر أفكارييييييييي ) .. ده و أنا عندي 9 سنين تقريباً .. … … و إتعلمت بالتدريج .. إني أرجع بسرعة تاني .. أنزل علي الأرض .. و ألم حطام الأفكار المتناثرة دي .. و ألزقها بسرعة .. و أمسكها من أول و جديد .. مرة .. و التانية .. و التالتة .. و العاشرة .. … … و بالتدريج .. بقيت سريع جداً جداً .. و ماهر جداً جداً .. مش فإني أفكر في الخطط المعقدة جداً لخطوات كتير قدام .. لا .. و لكن إني أعيد تكوين خططي و أفكاري بعد ما أنساها … لأني .. دايماً بانساها .. … فطبيعي جداً مثلاً إني كنت أبتدي تكوين خطة معينة .. و تعجبني جداً .. و أنساها .. و أرجع أحاول تكوينها تاني .. فأنساها .. و هكذا .. لحد ما أوصل إني أنفذ خطة مختلفة خالص عن اللي فكرت فيهم .. و متكونة من حطام خطط .. فاكر منهم ملامح بسيطة . … … المعاناة دي أنا مازلت بعانيها لحد النهاردة … مع أى بوست بابتدي أكتبه مثلاً .. بابتدي بإن في فكرة فدماغي عايز أتكلم عنها .. و أبدأ أكون البوست في دماغي .. و بمجرد ما أقعد علي اللاب توب … أكون نسيت 80% من اللي فكرت فيه .. فاكر فقط ( الدافع اللي عندي و الفكرة الأساسية ) .. و ناسي كل التفاصيل .. فأبتدي في الكتابة … و بالتدريج .. أفضل أكون و أهدم و أكون و أهدم … فأفكار مختلفة طول ما أنا باكتب .. لحد ما ينتهي البوست في المعتاد بالشكل اللي بانشره بيه .. صورة مختلفة تماماً عن اللي نويته من الأول .. … … مثلاً .. والله العظيم البوست ده كان عن ال ( الإنضباط = self discipline ) .. مش ال ( ADD ) إطلاقاً 😅🤣🤣 … … … ناس كتير ممكن تقرا الكلام ده .. و تقول ( و أنا كمان ) .. ( و أنا كمان باحس بده ) .. و ده ممكن يكون حقيقي .. متلازمة إضطراب الإنتباه حاجة موجودة في 30% من البشر .. بدرجات .. في درجات عالية جداً … زي اللي باتكلم عنها فحالتي دي .. و في درجات بسيطة .. و في درجات أعلي مني بكتييييير .. … … المعاناة اللي بيحس بيها اللي عنده المتلازمة دي … صعب جداً إنه يوصفها غير لحد بيعاني منها .. و فاهمها . ( إحساس إنك مش واثق إنك حتفتكر فكرة بتفكر فيها بعد كام دقيقة ) . … و خصوصاً .. ما يترتب علي ده من مشاكل و إضطرابات تانية ( مشاكل في الثقة بالنفس .. التوتر .. الخوف .. النرفزة السريعة جداً .. ) .. و حاجات تانية كتير بتنشأ من المتلازمة اللعينة دي . … … سريعاً جداً ( متلازمة إضطراب الإنتباه دي .. متلازمة جينية بتسبب خلل دائم فإنتاج عقل الإنسان لهرمونين أساسيين هما الدوبامين .. و السيروتونين ) . الهرمونين دول مسئولين بشكل كبير عن ( الإنتباه و التركيز و الذاكرة ) ” ده بناءاً علي آخر معلومات عندي .. و لكن البحث عالمياً في المجال ده ما زال مستمر .. بنتائج كتير جداً ” … … … المهم .. حاجات كتير جداً إتعلمتها عن ال( ADD ) خلال السنتين اللي فاتوا .. و لكن ما قبل السنتين دول .. و قبل ما أعرف كتير عن ال ( كتلة الخرسانية ) اللي كانت مربوطة فرجليا طول حياتي دي .. كنت باتعامل إزاي مع حياتي ؟! كنت باتعامل إزاي مع أى شيء كنت عايز أتعلمه و أمارسه … … … الإجابة كانت فعلاً .. ( جدو علي عنده خروف .. .إيا إيا أوه ) .. … … الأغنية بتبتدي بمعلومات معينة .. للوهلة الأولي إنت مش فاهمها و مش فارقة معاك فحاجة .. و لكن .. و لكن عشان تكمل الأغنية .. غصب عنك في الكوبليه التاني .. لازم تكرر الكوبليه الأول بالكامل .. … و بعدين .. … عشان تغني الكوبليه التالت .. لازم تكرر الأول و التاني .. … و هكذا .. بحيث إنك علي ما توصل لآخر كوبليه خالص .. بتكون غصب عنك كررت الكوبليه الأول .. بعدد مقاطع الأغنية بالكامل .. … و بتكون النتيجة .. إنك حتي لو مش عايز تحفظ الأغنية .. بتكرارها .. بتكون حفظت الكوبليه الأول . … … … و لكن الشرط هو … إنك تكمل الأغنية لحد الآخر .. إنك تكمل .. لحد الآخر .. حتي لو مش فاهم .. و لو مش مقتنع .. و مش قادر تتابع .. ال ( Follow through ) .. … … خلال الوقت الحالي فحياة البشرية .. حاجة من أكتر الحاجات اللي بتضمحل بشكل مستمر .. هي قدرة الإنسان علي ال ( follow through ) .. أو ال ( تكملة ) .. … معظمنا إن لم يكن كلنا .. إتعود إن الفيلم اللي مايعجبنيش .. أقفله بعد 15 دقيقة .. و أشوف غيره .. المسلسل .. أتفرج علي حلقتين تلاتة بالكتير .. و أقلبه لو ماعجبنيش .. الأغنية اللي ماتشدنيش من أول 10 ثواني .. أقفلها .. فيديو اليوتيوب اللي مايشدنيش من عنوانه .. مافتحوش . … … … النتيجة فده .. إن حاجات كتير جداً .. من اللي بتعتمد علي إنها تبني في الأول أساسات قوية .. و بعد كدة تبدأ تبني فوقها بناء ضخم من القصص و المحتوي و المعلومات .. بتتظلم و تندثر .. … و معظمنا تم تدريب عقله إنه يبقي عامل زي عقل الإنسان ال ( ADD ) .. بالرغم من إن كتير ماعندهومش المتلازمة دي .. … تم تدريب عقلهم إن مايفكرش أكتر من تلات أربع أفكار بالكتير .. و كفاية علي كده .. تم تدريب عقلهم إنه مايجمع تلات أربع معلومات .. و يقدر يركبهم مع بعض عشان يوصل لفكرة معقدة شوية . … كتير .. تم تدريب عقلهم إنهم يكونوا من جيل ( إنجزني ) .. جيل غير قادر علي إنه يصبر علي أي علم أو فكر . … … البوست ده مثلاً .. يا تري كام واحد شاف بوست طويل فحت زي ده .. و وصل للجملة دي ؟! لو إنت منهم ( أحييك بشدة ) . … و لو إنت من الفئة بتاعت ( بوست طويل فحت ياسطي .. إنجزني و هات المفيد ) .. يبقي أعزيك فعلاً فقدرتك علي الإنتباه و الصبر . … … قريت كتير تعليقات علي بوستاتي من نوعية ( خير الكلام ما قل و دل ) … يا سيدي دي مش جملة أو حديث عن النبي صلي الله عليه و سلم .. بل يقال إنها لعلي أو للحسن ابنه رضي الله عنهما. و حتي لو قالوها رضي الله عنهما … فماكنش عشان تستخدمها كشعار ترد بيه علي أى بوست يوصل ل5 أو 6 صفحات وورد مثلاً 😅😅 .. و لكن عشان نستخدمها فحواراتنا اليومية العادية.. إحتراماً لوقت اللي بيسمعنا .. و مجهوده . … … … يومياً تقريباً بيكون دايماً في مكالمتين أو تلاتة .. من أشخاص بيسألوني أسئلة ليها علاقة بالتكنولوجيا أو البيزنس .. و إجابتي كل يوم بتكون من نوعية ( إتفرج علي الفيديو الفلاني .. مدته ساعتين .. بيشرح كذا ) .. … و إذا بي النهاردة .. ألاقي مكالمة برضه من نفس النوعية .. و لما أكرر ليهم نفس الكلام ده .. بعد 4 شهور من نفس النصيحة لهم .. تكون إجابتهم .. ” بس ساعتين فيديو كتير أوي .. و لما بافتح الفيديو مابفهمش حاجة .. و أحس إني بطيخة ” … … فيا صديقي .. جدو علي عنده خروف … إيا إيا أوه .. … … … و الله أعلم .