هل مليون دولار سنوياً كفاية عشان الواحد يعيش مستريح في

هل مليون دولار سنوياً كفاية عشان الواحد يعيش مستريح في دبي ؟!

في أحد الفيديوهات القصيرة علي ( Tiktok) بيسأل شخص ما أحد المستثمرين الأمريكان ( أنا محتاج فلوس قد إيه عشان أقيم و أعيش مستريح في دبي ؟ ) , و بيرد عليه المستثمر الأمريكي بعد شوية تفكير :

• مليون دولار سنوياً تقريباً كفاية إنك تعيش مستريح نسبياً في دبي . 😅😅😅 … هو بالتأكيد ماكدبش .. مليون دولار فعلاً كفاية إنك تعيش مستريح في دبي .. و لكن برضو 10 مليون دولار .. و 100 مليون دولار .. و زود بقي براحتك .. كل دول كفاية .. علي حسب إنت حتعيش إزاي .. مش يمكن تكون بتحب تقضي كل مشاويرك بالهيليكوبتر ؟! . و مش يمكن حمام واحد مش بيكفيك مثلاً لما بتبقي مزنوق .. و محتاج لما تتمشي يكون معاك حمام خصوصي بتاعك ماشي جنبك مثلاً ؟! 🤣 . … لكن خليني أسأل السؤال بشكل ألطف شوية .. تكاليف الحياة الآدمية المرفهة فأبسط صورها في عصرنا الحالي .. قد إيه تقريباً في دبي ؟ . … و الإجابة دي من وجهة نظري المحدودة جداً .. بعد سنتين رايح جاي علي دبي بعد ما أسست شركتي فيها … و بشكل مختصر للغاية مافيهوش كل التفاصيل كمان . … 1- بند الأكل : بمجرد ما تدخل دبي مول ( اللي هو تحت برج الخليفة مباشرة ) , حتلاقي بوراك , و Jamie oliver , و زوزو , و كل ما تشتهيه نفسك من البراندات العالمية في عالم الأكل . ما عدا Gordon ramsey .. ده حتلاقيه لما تروح أتلانتيس في جزر النخيل .

و حتلاقيهم بيقدموا أكل جميل , و طعمه حلو بكل تأكيد . أقل رقم حتدفعه في وجبة لفرد واحد مثلاً مش حتقل عن 150 درهم تقريباً . و ده رقم مش كبير إطلاقاً بالنسبة للعديد من الفئات هنا .

و لكن فنفس الوقت .. تقدر تروح أى كارفور .. و كارفور في دبي موجود حرفياً فكل مكان . و حتلاقي قسم كامل للوجبات الجاهزة ..الطازة و معدة يومياً .. اللي حيسخنها ليك و إنت واقف .. و من كل الأنواع .. بداية من البيتزات .. لحد الكوراع .. و إنتهاء بالسي فود . أكبر رقم ممكن تدفعه في وجبة ضخمة لفرد واحد .. غالباً مش حيعدي 50 درهم .. و حتلاقي نفسك مش قادر تكمل كمان .

و كل ده بفرض طبعاً إنك مش حتطبخ بنفسك ولا حتي حتسلق بيضة . لأنك لو قررت تطبخ .. حتلاقي إن الأسعار حتقل معاك بشكل دراماتيكي . … … 2- بند اللبس :

تقدر تتمشي في fasion avenue برضو في دبي مول .. و تدفع بالمستريح 900 درهم في تيشرت 🤣 من أغلي و أشهر براندات الموضة في العالم . و لو معاك زوجة .. حتشتري لها فستان لا يقل عن 2000 درهم تقريباً . و إنت طالع حتعدي علي شوية محلات بيرفيومز تشتري منها برفان 150 ملليجرام ببتاع 800 درهم كمان . يادوب .

و برضو تقدر تطلع علي أى فرع Day to day … و دي سلسلة ضخمة من مراكز التسوق .. حتلاقي هناك حرفياً كل شيء ممكن تحتاجه من لبس و إكسسوارات و أدوات مطبخ و أجهزة و معدات و … و أغلي شيء هناك ب 20 درهم .

تقدر تشتري كل أحلامك من الهدوم بأشكالها و ألوانها و أنواعها و أحزمتها و جزمها و شراباتها و إكسسواراتها .. و غالباً مش حتدفع أكتر من 200 درهم .. أغلي تيشرت هناك ب10 درهم . أغلي بنطلون ب 20 درهم . و أغلي شوز .. ب 20 درهم .

و للملاحظة : أنا أول مرة جيت دبي و إشتريت من هناك شوية لبس للجيم , ما زلت باستخدمه لحد النهاردة .. يومياً تقريباً .. في الجيم ( يعني فحت و ردم ) … و ما زال بنفس الجودة .

بكل تأكيد مانصحكش تشتري من هناك أجهزة كهربائية إلا لو فاهم في الفروقات بين جودة التصنيع الصيني الأى كلام و عارف إن في حاجات ماينفعش تسترخص فيها .. يعني مثلاً ماتشتريش من هناك ماكينة حلاقة كهربائية .. دي غالباً مش حتكفي معاك حلقتين تلاتة بالكتير . … … 3- بند المواصلات و التنقلات :

تقدر طبعاً تقضي كل مواصلاتك بأوبر الهيليكوبتر زي ما قلت فوق .. أو تشتري الهيليكوبتر بتاعتك … و تقدر تقضيها تاكسيات أو كريم .. و لكنك برضو تقدر تعتمد علي الميترو في معظم إحتياجات تنقلاتك .. و حتلاقي إن أبعد مشوار حيكلفك بالكتير 12 درهم مثلاً .. رايح جاي . و لكنك في الحالة دي حتبقي واقف وسط زحمة أوقات كتير .. و علي حسب رفاهيتك و إحتياجك .

و لما توصل لمرحلة إنك تقدر تشتري عربية .. حتلاقي إنك تقدر تشتري لامبورجيني ببتاع 60 ألف درهم مستريح .. المرسيدس في أنواع رائعة كتير منها هنا تعمل لها أقل من 60 ألف درهم برضو . 50 ألف درهم عموماً هنا في العربيات ممكن يجيبوا لك عربية أحلامك لو بتحلم بيها في مصر . العربيات رخييييييييييييصة للغاية هنا . … … 4- بند السكن :

تقدر تعيش في سويت فندقي مجهز و بيطل علي برج الخليفة مباشرة , و تأجره لمدة سنة .. و حتلاقي إن التكلفة ممكن تكون 100 ألف درهم في المتوسط .

و تقدر تلاقي شقة جميلة جداً في مكان مميز للغاية , تكفي فردين , و خدمات رائعة .. و تشتريها ب200 ل 300 ألف درهم .. و تقدر تأجرها لحد ما تكمل تمنها ( كإنك بتقسط سعرها يعني ) .. و تدفع ما يعادل 5000 درهم شهرياً .

و تقدر تلاقي فيلا دوبلكس بجنينة … في مكان جميل برضو .. بس بعيد نسبياً عن مركز المدينة .. و تدفع نفس اللي فوق .

و تقدر تلاقي أقل من كل ده , لو إنت فرد .. و تأجر أوضة في فندق 3 نجوم مثلاً .. في منطقة زي ( ديرة ) .. لمدة شهر .. و تدفع 1000 ل 1500 درهم شهرياً .

و تقدر تلاقي أقل بكتير ..

علي حسب إنت أولوياتك إيه .. … … 5- أما عن بند الشغل … … وجهة نظري في الموضوع ده ماتغيرتش طول الفترة اللي إشتغلت فيها تقريباً من أيام ما كنت في الكلية . و هي : النهاردة أنا حاكون مفيد إزاي ؟ .. و مفيد لمين ؟ و بعد سنة : حاكون مفيد إزاي ؟ … و مفيد لمين ؟ .

يعني : في كتير بييجوا يدوروا علي شغل هنا .. و كل مؤهلاتهم هي شهادة دراسية .. و شوية إنجليزي مكسر .. و بيشتكي إنه مالاقاش شغل في مصر يديله مرتب كويس . قابلت منهم كتير .. و فعلاً في نسبة منهم ربنا بيرزقه فرصة .. و بيلاقي شغل .. لكن نسبة قليلة جداً .. و إحتمال ضعيف للغاية .

أكتر حاجة أقدر أقول إني شفتها هنا هي : المنطقية . يعني 1 + 1 .. بنسبة ضخمة غالباً بيساوي 2 .

في مصر .. إنت ممكن تكون مؤهلاتك رائعة .. و لكن لما تجمع 1 + 1 ممكن تلاقي النتيجة 0 . و ناس تانية مابيجمعش أساساً .. و ماعندوش مؤهلات .. و النتيجة بتكون إبتلاء من ربنا بالرزق .. و بيلاقي عنده ثروة من حاجات كتير في غير رضا الله سبحانه و تعالي .

لكن هنا بشكل كبير في منطقية . يعني لو قدرت يكون عندك لغة تحاور بالإنجليزي كافية ( و ده تتدرب عليه في مصر ) … و ده مهم جداً جداً … لغة الحوار الأساسية هنا هي الإنجليزي .. يليها الهندي تقريباً 😅 و عندك أى مهارة تقدر تكون مفيد بيها ( مش شهادة مالهاش معني أو محل من الإعراب ) . بشكل كبير حتيجي هنا حتلاقي مكان تقدر تكون مفيد فيه . … أما بالنسبة لو وضعك زي وضعي .. و عندك أساساً شغلك و شركتك .. و بتدور تفتح هنا في الإمارات .

من وجهة نظري الموضوع كان قمة في البساطة و السلاسة .. و أى مشكلة ممكن تواجهك .. فده مالوش علاقة بالإمارات .. و لكن ليه علاقة بهل إنت فاهم شغلك أو طبيعة تكوين شركة من الأساس ولا لا ..

لأن ( السبهللة - الفوضي - ثقافة المعلش - ثقافة بالحب و كله بالحنية بيفك ) كل الحاجات دي للأسف أمراض متأصلة في فلسفات ناس كتير .. و بتؤدي إنهم لما بيستقلوا بشغلهم علي هيئة شركة أو بيزنس خاص بيهم .. بيكون برضو عندهم نفس الأمراض دي في شغلهم و شركتهم .

نصيحتي هي : رجاء فكر في الموضوع بشكل منطقي بعيد عن ( نحط رجلنا بس و الدنيا حتمشي ) . … … 6- أخيراً : بند الترفيه :

زي ما قلت فأول كام سطر … تقدر فعلاً في دبي تصرف مليون دولار شهرياً .. و تحس إنك ماعملتش كل اللي نفسك فيه ..

و تقدر برضو تصرف 50 درهم شهرياً .. و تحس إنك ملك زمانك المتوج و إنك عايش أسعد أيام حياتك .

شخصياً .. أنا باكون في قمة سعادتي لما باروح الشارقة .. لأنها فيها جناين و مساحات واسعة .. هناك بتفكرني بالمنتزة قبل ما يطوروها 🥲 .

و لكن موضوع بند الترفيه ده يقودني أساساً إني أفكر في فلسفة الترفيه عند ناس كتير أساساً .. ناس كتير للأسف الترفيه عندها لازم يكون معناه حاجة ممنوعة .. أو حاجة غلط .. عمري ما حانسي في أحد أيام تالتة ثانوي قبل عيد الأضحي .. لما سمعت أحد زملائي بيتكلم عن تجهيزات ليلة الوقفة .. و اللي ناوي يعمله مع أصدقائه .. أعتقد إنه لو كان بيحاول يجمع أكبر قدر من الذنوب و المعاصي في ليلة واحدة ماكنش حيعمل أى شيء مختلف .

بالنسبة ليا أيامها أنا كنت مستني أجازة عيد الأضحي عشان أقرا 8 أعداد روايات مصرية للجيب محوشهم للأجازة مخصوص .. و كنت فقمة سعادتي .

نفسك علي حسب ما حتروضها .. و علي حسب ما حتخليها معتادة إيه .. لو إنت مش حتستمع و تحس بالسعادة غير لما تكون في مكان مليان ناس قالعة .. سكرانين و بترقص .. يبقي ربنا يكون في عونك .

أما لو إنت قدرت تروض نفسك .. و تسيطر عليها .. حتلاقي إنك ربنا بيفتح عليك بأنواع و أشكال و كميات ضخمة من السعادة .. فأى مكان .. … … …

ملاحظة أخيرة و هي : نفسك بتعتاد أى شيء … مهما كان .. يعني لو بكرة بقيت ليونيل ميسي .. و مرتبك مليون و نص دولار يومياً .. أوعدك إنك بعد شهرين بالكتير .. حتلاقي نفسك زهقان من كل الحاجات اللي إنت دلوقتي بتتمناها ..

بيكيه .. خان شاكيرا .. 🤣

الحل في الموضوع ده .. هو إنك تفهم إن الثروة في الدنيا أياً كان مقدارها ( 10 جنيه .. أو مليون دولار ) .. مسئولية .. يعني حتتسأل عنها .. تفصيلياً ..

و إن مش حتتسأل عنها يعني صرفت إيه علي نفسك ؟ .. و صرفت في الحرام ولا الحلال .. لا . يعني حتتسأل كنت مفيد بيها إزاي ؟ .. و فكرت إزاي تستغلها لصالح مين و إزاي ؟ .. ولا لا .. بالظبط زي وقتك .. و عقلك ..

و الله أعلم .