بمناسبة النسكافيه المغشوش و ما شابه

بمناسبة النسكافيه المغشوش و ما شابه ..

أنا متفهم مدي صعوبة إنك تروح لأحد المولات الضخمة , و تدخل أحد الهايبرات الضخمة , و تدفع مبلغ و قدره .. فقط عشان تشتري نسكافيه مش مضروب أو مستورد . كل ده .. يمكن لأنك خايف علي صحة قولونك و بطنك من مواد خطر في المغشوش , أو يمكن لأنك بتدور علي طعم نضيف و حقيقي . بل و يمكن يكون عمرك ما دقت النسكافيه الحقيقي , أو البيبسي الحقيقي , أو أياً كان من الحاجات اللي قضيت عمر طويل بتستهلك المغشوش بتاعها و مفكره الأصل .

سؤالي هو : ليه إنت بتستهلك منتجات ” ترفيهية ” زي ( مسلسلات , أفلام , أغاني , كتب ) مغشوشة .. و راضي و مستمتع و سايب نفسك عادي كده ؟! ..

بالرغم من إنك علي بعد ضغطات بسيطة علي زرار الماوس , أو علي شاشة موبايلك .. تقدر ( و مجاناً ) تستهلك الأصلي بتاع بلده اللي متكلف و مش مغشوش و مش مسترخصين فيه .. ليه ؟!

علي مدار الشهر اللي فات , أنا باعمل تجربة معتادة علي عقلي .. باكررها كل كام سنة .. و إتكلمت عنها قبل كدة .. باعرض عقلي لشوية محتوي ( تافه ) لمدة معينة من الزمن ..

بابطل حرفياً معظم القنوات و البرامج العلمية أو البيزنس أو أى شيء تحس إنك محتاج تستخدم عقلك فيه .. و باشغل هري تافه و إسفاف و كل ما يمكن إنه يعتبر ترفيه لطفل حلزون مطرود من قوقعته و مضروب بشبشب حمام قديم .

و علي مدار الشهر اللي فات , أنا قاعد باتفرج علي مسلسلات عربي و أفلام عربي إنتاج آخر 4 سنين .. لكل نجوم الكوميديا و التمثيل و الهري المشهورين في مصر حالياً ..

زوجتي حرفياً بتعدي جنبي و شايفاني باصص لشاشة الموبايل أو التيليفزيون أو أجهزتي .. و بتقول لي بشفقة و عينين فيها دموع ” إنت بتعمل فنفسك كده ليه ؟! ” ..

…

أسباب إني باعمل التجربة دي كل كام سنة بتختلف كل فترة .. حالياً أنا باعملها علشان :

1- أقدر أقيم بعض أنواع المحتوي اللي شئت أم أبيت لازم أعرف أتفاعل معاه إزاي , لأن ديموجرافيك مصر أحد الفئات المستهدفة في شغلنا بكل تأكيد , فبالتالي .. ماينفعش أعين حد عشان يعمل محتوي بدون ما أقدر أقيم و أفهم ال ( ميمز ) اللي هو بيستخدمها .

2- أنا ما زلت باقضي وقت كبير في مصر , و كأحد مبادئ التعايش الأساسية هي : فهم لغة المجتمع اللي إنت عايش فيه .. و للأسف .. لغة المجتمع بشكل ضخم بيتم تشكيلها من الثقافة و المسلسلات و الأفلام اللي بيتم إستهلاكها .

3- نوع من أنواع قياس المسافة .. بين التوجهات الثقافية و قيمها و أنواعها عالمياً ,… و بينها في مصر … و بناءاً عليه .. بيكون في ( data and insights ) ظريفة تقدر تشوفها لو إنت مهتم بمراقبة تطور المجتمعات ( ده علم ممتع جداً بالمناسبة ) .

…

اللي أثار إنتباهي , هو كم الزعيق و القلق اللي حاصل حالياً بسبب تريند ( النسكافيه المغشوش ) .. و يكأن الناس كانت بدأت تصدق الوهم اللي كانوا بيكرروه قدام نفسهم إن ( رغيف الحواوشي اللي ب3 جنيه ) فيه لحم بتلو مدبوح علي الشريعة الإسلامية ! .

إنت لو سألت أى طفل بياكل رغيف الحواوشي ده , حيكون عارف إنه بياكل شيء ماينفعش يسأل عن مصدره ..و لكنه لازم ياكله لأنه مايقدرش علي ثمن البديل .

و الطفل بيكبر , و يعيش ضمن مجتمع ( مابقاش مقفول عليه خلاص ) .. و بقي بيشوف في موبايله و السوشيال ميديا .. طبقات و أشكال مختلفة من الحياة .. تخليه يتمني إنه يطلع في سلم الرفاهيات الإجتماعي . …

أنا كلامي ده , موجه لكل من هو قلقان حالياً من إدراكه المفاجئ اللي حصل ليه إنه ( في خطر ) إنه مايلاقيش أكل .. خالص بقي .. مش بس أكل نضيف أو معلوم المصدر … لا .. هو قلقان إنه ييجي عليه وقت .. و فعلاً يشوف خط الفقر الحقيقي اللي كان متجاهل وجوده .. و متجاهل وجود ناس عايشين تحته بقاله فترة طويلة .. … كلامي هو : you are what you eat يعني : زي ما حتاكل , زي ما حتبقي ..

لو حتاكل أكل نضيف , حتبقي صحتك حلوة , و حتعيش حياة حلوة .. لو حتاكل زبالة مغشوشة , حتبقي صحتك زفت , و حتعيش حياة مؤلمة ..

و الأكل .. مش بس أكل معدتك و قولونك ..

الأكل الأهم هو : أكل عقلك ..

لو إنت عمرك ما ضحكت غير علي إيفيهات رخيصة غبية تافهة متخلفة زي اللي بتشكل 99% من المحتوي الكوميدي المصري خلال آخر 5 سنين .. ـ عمرك ما حتفهم أو حتعرف تضحك علي محتوي كوميدي حقيقي وظيفته إنه يخفف من صعوبة إستهلاك محتوي ثقافي أكبر يحتويه .

يعني لو في فيلم تقيل فكرياً مثلاً .. أحياناً كتير بيبقي فيه بعض من الكوميديا بغرض ال ( comic relief = تخفيف كوميدي ) وظيفته إنه يسهل بلع و إستيعاب الفكر التقيل اللي فيه ..

فلما يكون عقلك شارب و كرعان من كوميديا مصرية خالصة بتستهدف نفس الحلزون اللي مطرود من قوقعته و مضروب بشبشب حمام قديم .. حتلاقي إنك مش مترجم أو فاهم هي الناس بتضحك علي إيه فوسط الفيلم التقيل فكرياً ده ..

و بشكل كبير مش حتستوعب أساساً الفكر التقيل .. و حتطلع تدخل فيلم العيد المصري اللي جنبه ..

و بعدين تطلع من السينيما تستغرب و تشتكي من سعر التذكرة العالي أوي .. و سعر كل حاجة تانية في المول عالية أوي .. و بعدين ترجع بيتكم تدور علي أى وظيفة لشخص بيتكلم إنجليزي مكسر بالعافية .. يتكسف يفتح اليوتيوب بتاعه قدام أبوه و أمه .. و بيقضي 90% من وقته بيستهلك زبالة ثقافية مغشوشة .. و بيدفع فيها أعز ما يملك ( وقته و إنتباهه ) ..

و الأراجوزات اللي هو بيتفرج عليه يغتنوا و يبقوا مليونيرات و نجوم مجتمع .. و هو يفضل يندب حظه في بوست علي الفيس بوك .. و بعدين يشير بوست تاني بعده .. لمسلسل تافه متخلف .. و يكتب تحته … ( صريخ ضحك … هو اللي مخفف علينا نكدنا ) .