14 نكست أكشنز سهلة جداً تقدر تعملها فى البيت

14 نكست أكشنز سهلة جداً تقدر تعملها فى البيت : عشان المنتخب يفوز بعد كده إن شاء الله , و مايلعبش فيه ناس مش عاجبينك , و يرجع منتخب ساجدين بيصلي الفجر حاضر , و ياخدوا أجور و مرتبات تتناسب مع اللى بيقدموه .. مش 20 ضعف أجر الجراح و العالم و المدرس , .. و تبقى كل حاجة ماشية تمام و ماتحسش إنك عايز تشتم شتايم قبيحة على القهوة … أعمل التالي : … 1- ماتتابعش كورة .. خالص .. لمدة سنة . 2- ماتتكلمش فى الكورة .. خالص .. لمدة سنة . 3- لو شفت ناس تعرفهم بتتكلم فى الكورة .. سيبهم و إمشي . 4- لو لقيت برنامج مستضيف لعيب كورة .. ماتتفرجش . 5- لو لقيت منتج عليه صورة لعيب كورة .. ماتشتريهوش. 6- لو لقيت لعيب كورة مشهور جداً معدي جنبك .. ماتعبرهوش و ماتتصورش معاه . 7- ماتشيرش أى حاجة ليها علاقة بالكورة المصرية أو لاعيبيتها على بروفايلك. 8- لو صلاح خد الدوري الإنجليزي لوحده .. و بعدين دوري الأبطال لوحده .. و بعدين راح لعب كاس العالم و خده لوحده برضو … مالكش دعوة .. كأنك ماشفتش حاجة .. ماتعبروش .. بالظبط زي مابتعبرش لعيبة الشطرنج بتوع مصر اللى عاملين شغل زي الفل و أراهنك إنك ماتعرفش أسامي حد فيهم . 9- لما أصحابك يقعدوا على قهوة عشان يتفرجوا على أهلي ضد زمالك .. ماتقعدش معاهم .. و شيرلهم البوست ده . 10- لما أصحابك يقعدوا يلعبوا معاك بلاي ستيشن .. و حد منهم ياخد ليفربول عشان يلعب بصلاح .. شد فيشة البلاي ستيشن و لاعبهم طاولة أحسن . 11- لما إبنك يقولك عايز يشتري منتج أطفال عليه صورة صلاح … هزأه و قول له يبطل قلة أدب و صياعة .. و هاتله منتج عليه صورة كرتون أنضف والله العظيم . 12 - ماتشيرش حاجة فيها كورة مصري 13- ماتقعدش على قهاوي شغال فيها ماتش كورة مصري . 14- شير البوست ده لصاحبك اللى مضايق من اللى حصل مع جنوب أفريقيا . … أوعدك إن لو إنت و إصحابك عملتوا ال14 خطوة دول … خلال سنة … ماحدش حيدفع للناس اللى مضايقينك دول ملايين .. لأن بضاعتهم الناس بطلت تشتريها خلاص . … بس السؤال هو : حتقدر ؟!

… لو بتسأل ( طب أنا شفت الماتش ولا لا .. إلقي نظرة على أول كومنت ) .