أحد أكتر الحاجات اللي مش باحبها في عيادة دكتور العيون

أحد أكتر الحاجات اللي مش باحبها في عيادة دكتور العيون اللي كنت عنده النهاردة عشان أعمل نضارة تانية بدل اللي ضاعت في دبي إنه مكان الإنتظار عنده مافيهوش شبكة .

أينعم بفضل الله الإنتظار ماكنش كتير .. لكن أثناء وقت الإنتظار ده .. و عشان كنت قبلها في الجيم و راشق السماعات فأعماق وداني و مشغل ال ( active noise cancellation ) لمدة أكتر من ساعة .. فقررت آسفاً .. و للأسف .. و متأسف .. إني أتفرج علي التيليفزيون اللي محطوط في الإنتظار مع باقي البشر .. لأول مرة في رمضان السنة دي ..

اللي حاكتبه دلوقتي مش جديد كالمعتاد .. و كتبته كتير قبل كده .. بس بكل أمانة أنا جايب كيبورد ” لوجيتك ” جديدة ميكانيكال .. و حابب صوت طرقعة الحروف و أنا باكتب .. فما علينا .

سؤالي هو .. ليه ؟!

ليه في العصر الجميل اللي إحنا عايشينه ده بفضل الله .. و كل الإختيارات المتاحة و الغير متاحة من وسائل الترفيه و المسلسلات و الأفلام اللي بيتصرف عليها تقريباً ما يعادل ميزانيات دول ..

ليه حد عاقل يقرر يتفرج علي التيليفزيون المصري و مسلسلاته .. و إعلاناته ؟!

فجأة قطعوا المسلسل .. و نزلوا بإعلان ( كارينا ) بتاع نيللي كريم !! .. النهاردة أول مرة ألقي نظرة علي التيليفزيون .. و شفت الإعلان ده 6 مرات متتاليين !! .. مرتين من غير صوت في الجيم ( عشان راشق سماعاتي فوداني ) .. و أربع مرات خلال فترة النص ساعة اللي إنتظرتها في العيادة ..

نيللي كريم بالنسبة ليا ( والله العظيم ) ما زالت وجه جديد ..

للتوضيح .. أحمد السقا بذات نفسه بالنسبة ليا ما زال مواهب شابة صاعدة .. أنا متوقف مع التيليفزيون المصري من سنة 2004 .. و كنت لسة باسمع محمد محي ( في الأول سبنا قلوبنا تسلم قلنا سلام لله ) و أنا باتمشي في إسكندرية من يومين !! .. و طلعت لسة حافظ الأغنية دي 😁😁

بس نرجع للسؤال المهم .. ليه ؟!

يعني أنا من أول رمضان مثلاً .. المسلسلات اللي شفتهم كانوا :

• super pumped و ده بيحكي قصة أوبر .. و مؤسسها ترافيس كالانيك .. و اللي بيمثل دوره هو جوزيف جوردون ليفت .
• we crashed و ده بيحكي قصة we work .. و تفاصيلها الملحمية .
• beaky blinders الموسم السادس و مش قادر أكمل بعد الحلقة التالتة بسبب الملل منه الصراحة
• shark tank كنت محوش 10 حلقات من الموسم الأخير ده

فسؤالي مرة تانية … ليه في إنسان تكون الحاجات دي فمتناول إيديه بكل سهولة و يسر .. و يروح يتفرج علي مسلسل رانيا و سكينة ؟! … … أنا كتبت عن ده كتيييير زمان أيام ما كنت باكتب كتير .. و حاكرره تاني … علي حسب ما حتقضي وقت تفاهتك و ترفيهك فإيه … علي حسب ما وقت الجد بتاعك حيكون فعال قد إيه ..

مرة تانية .. مش باقول روح ذاكر أو إقرا كتب أو أى كلام مهم في وقت ترفيهك و تفاهتك ( الساعة اللي بعد الفطار مثلاً ) ..

و لكن إختار .. والله بجد .. عندك إختيارات كتير .. إختار حاجة نضيفة .. ممكن تلاقيها صعبة في الأول .. بس بعد كده حتبقي بالنسبة لك قمة في السهولة و اليسر إنك ترفه عن نفسك بالحاجة اللي كنت بتستصعبها دي .

عقلك سفنجة .. علي حسب ما حتحاوطه بإيه .. علي حسب ما حيكون تكوينه .. و قيمته ..

أنا متأكد إني كاتب نفس المعاني دي من سنة 2007 علي الفيس .. و مكررها بتاع مرة كل سنة تقريباً ..

إنت متخيل لو كنت إستبدلت العبط بتاع التيليفزيون المصري ده بحاجة نضيفة من 5 سنين مثلاً .. و إتفرجت لك علي بتاع حاجة و عشرين مسلسل إنجليزي أو أى لغة تانية علي مدار الخمس سنين دول .. متخيل نوع اللغة و الثقافة اللي حتكون إكتسبتها ؟!

سؤالي ليك .. خمس سنين من المسلسلات المصري من 2016 ل 2021 .. أضافت لسيادتك إيه ؟!

بجد … ليه ؟!