للأسف كلمتين بسرعة فى التريند

للأسف كلمتين بسرعة فى التريند .. كيفية التعامل مع موت “ستيفن ” . السؤال المهم هو : ستيفن هوكنج .. كان أهلاوى ولا زملكاوى ؟!

بص , هو نفس الكلام ده إنت ممكن تطبقه على أى حد تانى فحجم أو شهرة ستيفن هوكنج . 1- عارف العيل الصغير اللى كان بيمشى فى الشارع و يشتم فى الزمالكاواية أو الأهلاوية .. بدون ما يكون فاهم هو بيقول إيه أو بيشجع مين أو فى إيه أساساً ؟! ..

• حتلاقى برضو شوية عيال صغيرة كتير ماشية فى النص إما بتشتم فى ستيفن هوكنج , أو بتشتم فى اللى بيشتموا فستيفن هوكنج … سيبك من دول و من دول , و طبطب عليهم و لو تقدر حط بونبوناية فبق كل واحد فيهم و كمل سكرولنج عادى خالص .. اللى يلعب مع العيال دى بيقل من مقداره جداً . .. 2- اللى تلاقيه بيحكم على عالم فيزيا أو كيمياء أو أى حاجة تانية , بقوانين الدين . فده بالظبط زى لعيب كرة القدم اللى بيدى لاعب كرة سلة فاول عشان مسك الكورة بإيده … دى لعبة و دى لعبة تانية خالص .. و اللى مش فاهم كده برضو سيبه فحاله .. مسيره فيوم حيفهم إنه إما إنه يقنع دول باللعب معاه فملعبه بقوانينه .. أو ينزلهم هو فملعبهم و يلاعبهم بقوانينهم . .. 3- فى ناس حتلاقيها ماصدقت إن فى حاجة حصلت تعمل خناقة عالفيس .. و حيدخلوا يحاولوا يتخانقوا مع أى حد . دول بالظبط زى الراجل فاقد أى قيمة اللى دايماً قاعد على نفس الكرسى عالقهوة اللى بيدور على أى حوار يدخل فيه يحس بقيمته شوية فيه .. سيبهم خااالص .. و كمل سكرولنج . … 4- فى ناس برنسات فنفسهم أوى .. حيدخلوا يسألوا ” هو مين ستيفن سبيلبرج ده ؟! ” , ” هو هوكنج ده كان علينا فى أنهى شابتر فى المنهج ؟ ” ” يا جماعة نظرية التطور سقطت فى القطب الشمالى صح ؟ ”
• ماتتعبش نفسك فى الرد على كل واحد فيهم , مسيرهم حيلاقوا واحد إبن حلال من الملايين اللى نقلوا الخبر عندهم بالتفصيل و يفهمهم … كمل سكرولنج إنت عادى . … 5- فى ناس تابع رابطة ” حكاكين للأبد ” .. شوية منهم حيلبسوا تيشرت عليه صورة ستيفن الشهيد , و شوية تانيين حيلبسوا تيشرت ستيفن رمى الشنطة اللى فيها كتاب دين .. و دول حيدخلوا يحكوا فأعضاء الجنس الآخر من كل فئة . حتعرفهم لما تشوفهم .. سهل جداً حالياً إنك تعرف اللى بيحك .. على حسب نيتك .. و إحتياجاتك الخاصة فى الوقت ده .. كمل سكرولنج .. أو ركز معاهم لو حبيت . … 6- فى الشريحة المقربة من ستيفن هوكنج نفسه .. و اللى حيقسملك إنه كان بيلعب مع هوكنج رست .. و أحياناً كان بيغلبه .. و إنه على علم بأسرار إعتناق هوكنج لدين معين أو عقيدة معينة ..
• ما لم تكون من عشاق نظريات المؤامرة و فاضى و طالبة معاك تهيس حبتين .. كمل سكرولنج عادى . … ممكن تلاقى فئات تانية أكتر .. و لكن الخلاصة هى : لو عايز فعلاً تكرم الراجل اللى مات , إستفيد بعلمه . و لو متضايق من الراجل اللى مات , إستفيد بعمله و إسعى إنك تكون أفيد منه . … و الله أعلم .