بمناسبة إعلان البرفان اللي بيجيب نسوان

بمناسبة إعلان البرفان اللي بيجيب نسوان … إحم … آسف علي العنوان … و القافية 😅 … فبداية تالتة إعدادي بتاعتي .. سنة ( 2002 ) .. و قبل ما أروح حصة الرياضة عند أستاذ ( دُمين منصور) ” أيون .. هو إسمه كده .. و أستاذي العظيم اللي باعتبره واحد من 4 أشخاص ربنا جعل ليهم فضل عليا إني أكون بافهم فأى حاجة ليها علاقة بالهندسة أو الرياضة عموماً ” قررت إني ” بما إني بقيت كبير و عندي شنب أخضر و صوتي بدأ يخشن ” .. أروح علي دولاب بابا ربنا يبارك له .. و أستخدم البيرفيوم بتاعه . … بابا ربنا يبارك له .. دايماً بيبقي في عدد من البيرفيومز موجود في دولابه ( هو صيدلي .. فبراحته بقي 😄) .. و كان البيرفيوم اللي إستخدمته منهم وقتها .. إسمه ( سانتياجو ) .. هو نفس اللي موجود في صورة البوست ده .. و حطيت من البيرفيوم .. و عجبني ريحته شوية .. و رحت الدرس .. و الأستاذ رسم مسئلة هندسة علي السبورة … و كان الأستاذ ( دُمين ) ليه طريقة جميلة لما يرسم مسئلة صعبة .. إنه يقدمها بديباجة خاصة توحي بصعوبة مستوي المسئلة و أهميتها .. و قبل أى حد تاني …و بمجرد إنتهاءه من رسم المسئلة .. لقيتني باقول الحل .. بكل سهولة و بساطة .. الأستاذ أثني عليا جداً .. و حسيت إني فعلاً تميزت عن كل اللي كانوا حواليا .. … ريحة البيرفيوم .. مع ريحة و درجة برودة الأوضة المكيفة اللي كنا فيها .. مع الإضاءة الفلورسنت البيضاء القوية .. مع ريحة كحول أقلام السبورة النفاذة .. .. التركيبة دي .. كانت .. و ستظل للأبد في عقلي هي أحد أقصي تركيبات السعادة و التميز .. .. و لحد النهاردة .. و بعد مرور 20 سنة تقريباً .. و إستخدامي لعدد ضخم من البيرفيومز و الروائح بمختلف أنواعها و أثمانها و ماركاتها .. ما زالت .. و ستظل ( سانتياجو ) هي العطر المفضل بالنسبة ليا … و اللي ريحته بالنسبة ليا بتعطيني ثقة بالنفس و سعادة و قوة و فرحة و كل الحاجات الحلوة دي .. … إستخدامي للبيرفيوم نفسه أصبح نوع من أنواع التحضير لأي شيء مهم في حياتي .. يعني .. لو رايح مشوار عادي أو مالوش أى أهمية .. ممكن أستخدم أى ( axe ) .. أو أى بيرفيوم ألاقيه قدامي عادي .. لكن .. قبل أى ميتنج فعلاً مهم … قبل أى محاضرة مهمة حالقيها أو تم دعوتي ليها ( زي تيدكس مثلاً ) … قبل أى ماتش شطرنج مهم مثلاً حالعبه … يوم جوازي نفسه .. البيرفيوم ده كان جزء أساسي من طقوس التحضير . … … نفس نوع البيرفيوم ده .. دايماً لازم أتأكد إن عندي منه حالياً عبوة في البيت .. و واحدة تانية في المكتب .. و واحدة صغننة في العربية . … … إطلاقاً مافتكرش إني سألت حد هل عجباه ريحة البيرفيوم ده ولا لا .. إطلاقاً مافتكرش إني إهتميت تأثيره علي الجنس الآخر .. و هل بيخليهم عايزين يركبوا معايا العربية أو اليخت ولا لا 😂 .. الحمد لله إن زوجتي حبت نوع البيرفيوم ده و ريحته .. و إلا كانت حتبقي مشكلة ضخمة ..خصوصاً إن ريحة كل بدلي تقريباً .. و كل هدومي فأى مناسبة مهمة .. بتبقي هي البيرفيوم ده . … … أنا مدرك جداً لمعني ال ( إرتباط الشرطي ) اللي فعقلي بين ذكري معينة .. و بين ريحة البيرفيوم ده .. و إنه مافيهوش أى قوي خارقة بتخلي آدائي العقلي أفضل .. او تأثيري فتاك علي الجنس الآخر مثلاً 😅 و لكني سعيد إني كل مرة باستخدم البيرفيوم ده فيها .. بيكون لسبب و ذكري خاصة بيا جداً .. و مش عشان شفت إعلان لديفيد بيكهام مثلاً ( بلاش نقول حد تاني 😅) و حبيت أبقي زيه ..