ثقافة الغُرزة

ثقافة الغُرزة . ( في الشغل و الفلوس و الإقتصاد و الإستثمار و ما شابه ) ..

في فيلم ( the karate kid) .. فمشهد من أروع المشاهد فيه فوجهة نظري .. الطفل بيدخل علي المعلم ( مياجي ) .. و بيلاقيه ماسك ( chopsticks - عيدان الأكل الياباني دي ) .. و بيحاول يلقط دبانة طايرة في الهوا . و لما الطفل بيسأله إنت بتعمل إيه ؟! .. بيشرح له إن أحد المراحل المتقدمة جداً اللي ممكن توصل لها في تدريبك .. هي إن يبقي عندك القدرة إنك تعمل كده … تبقي متحكم جداً في شيء مش سهل التحكم فيه إطلاقاً زي ال ( chopsticks ) دي .. تبقي سريع و منتبه جداً لدرجة إنك تقدر تلقط بيهم دبانة طايرة في الجو . و تبقي متحكم في قوتك جداً .. إن الدبانة ماتموتش منك بعد ما تلقطها . … من كام يوم طلبنا أكل صيني .. و كنت باشرح لزوجتي إزاي تمسك العيدان دي و تاكل بيها .. فاكر إني أيام الكلية قضيت فترة محترمة أدرب نفسي علي طريقة مسكهم و كنت باجرب ده بالأقلام الجاف . و لما شفت إزاي هي لسة مستغربة المسكة و الطريقة و بتتعلمها تدريجياً .. في حين إني ماسك الإتنين و بالعب بيهم و ألفهم و باعمل حركات و ” تريكات ” … إفتكرت المشهد اللي شرحته ده من فيلم ( the karate kid) .. .. و إفتكرت إمبارح و أنا باشوف التعليقات و التفاعل مع البوست اللي فات ( بتاع شوية من طرق النصب و تعمل إيه عشان ماتقعش فيهم ) .. إفتكرت الكوميديا اللي كنت باشوفها لما أى حد من أصدقائي ماجربش يمسك ( chopsticks ) فحياته قبل كده .. بيحاول يعمل الحركات و ال ” تريكات ” دي من أول مرة . … الموضوع بالظبط زي ال ” غُرز ” .. بكل أنواعها .. غُرزة السواق المحترف … اللي بيعرف ياخدها وسط زخانيق العربيات علي الدائري و بين موتوسيكلات و تروسيكلات و تريلات .. و بيسلك بعربيته و يركنها حتي و لو في خرم إبرة في الشوارع الضيقة و الجراجات . … غُرزة الجراح المحترف .. اللي صوابعه بتكون حافظة الحركات اللي بيعملها .. و تحت ضغط و نزيف و صريخ أهل العيان برة .. بيكون شغال برنس ولا بيتهز … … غُرزة الخياط المحترف .. أو حتي ال ” غُرزة ” .. بمفهومها الشعبي في عوالم الإجرام و المخدرات .. مكان معين بقواعد معينة .. و بيحصل فيه حاجات معينة 😉😆.. يعرفه اللي يعرفه بس .. و اللي مايعرفوش .. مايهموش يوصله أساساً .. … كل غُرزة من الغرز دي … في أحيان كتير .. بتكون كسر للقاعدة .. و خارج إطار الصح و المعروف و الطبيعي و المتعارف عليه .. .. يعني في السواقة .. إنت بتتعلم قواعد كتير لآداب الطريق و آداب التعامل مع عربيتك … و لما بتاخد غرزة .. إنت بتعمل شيء خارج عن المألوف نسبياً .. عشان تقدر تاخد خطوة لقدام . … ماعتقدش إن في إنسان عادي مثلاً .. أو حتي طالب تالتة طب .. ممكن يدخل أوضة عمليات . و يبتدي يحاول يعمل حركات أو غرزات ( sutures ) معينة في جسم مريض .. … و ماعتقدش برضو إن مبتدئ صياعة و إنحراف … حيروح يرتاد غرز معينة فأماكن معينة .. بدون ما يكون معاه حد يعرفه يكح مع مين .. و مايكحش مع مين . … كل غُرزة من الغرز دي .. بتيجي .. بعد ما بتكون قضيت فترة محترمة .. بتتعلم و تتفحت و تاخد خبرات .. و فشل و نجاح .. بتكون حكيت بعربيتك مرات كتير … أو حتي خيشت في شنطة اللي قدامك مثلاً قبل كده مرتين تلاتة علي الأقل .. بتكون قضيت فترة محترمة بتدي حقن و تشتغل مساعد و تتفرج .. لحد ما ينفع إنك تجرب ( suture ) معينة . و بتكون برضو قضيت فترة محترمة بتدي أو تضرب حقن 😆 .. و تشتغل مساعد و تتفرج … لحد ما ينفع إنك تزعق في ( غرزة ) معينة . … … السؤال بقي .. ليه متخيل إن الطريقة الأمثل للإستثمار أو إنك تعمل مكسب فلوس حلو .. هو إنك تاخد ( غرزة ) .. أو تتعلم ( تريككة ) معينة ؟! … من شهر تقريباً .. إتصل بيا إنسان .. أحد الزملاء في مجال معين من مجالات شغلي .. إداه رقمي لعل يكون عندي إجابة علي أسئلته و مشكلته .. مشكلته كانت ” أنا كنت شغال أفيلييت .. و عملت شوية فلوس حلوة جداً علي مدار 5 سنين … و صرفتهم و رصيدي في البنك بيقل كل شوية بسرعة .. و ال ” تريككاية ” و أسلوب البزنس اللي كنت شغال بيه باظ و مابقاش ينفع يتعمل خلاص … و مش عارف أعمل إيه ” … ردي عليه كان : سيدي الفاضل .. لا تخطئ رجاء .. إنت عملت فلوس آه … لكنك ماعملتش ” بيزنس ” … إنت إتعلمت طريقة معينة سريعة عشان تحقق مبيعات … و فضلت شغال بيها لمدة 5 سنين ما شاء الله .. خلال ال5 سنين دول … إنت ماستخدمتش الفلوس اللي حققتها .. غير في إنك تحوشهم و تصرفهم علي ( شقة و عربية و زواج و .. ) .. و ماحاولتش إطلاقاً تحضر نفسك ليوم تحتاج فيه طريقة تانية . .. عند مرحلة معينة .. أى إنسان عرف طريقة يحقق بيها فلوس ما .. بعد ما يوصل لمبلغ معين ( بيختلف بالنسبة لكل إنسان و إحتياجاته الأساسية ) .. لازم تبطل تشتغل بإيدك الحاجة دي .. … و لازم تعمل 3 حاجات أساسية : … 1- لازم تجيب حد معاك يتعلم إنه يشتغل الحاجة دي بدالك .. 2- لازم تجيب حد تاني .. و تديله مرتب مقابل إنه يتعلم حاجة تانية .. 3- لازم تتعلم إزاي تدير الإتنين دول ( تتعلم بيزنس و إدارة أعمال ) .. و غيرهم .. لحد ما ربنا يرحمك و تسيب الإدارة لحد تاني خالص .. و تروح إنت تتقاعد في جزيرة في المحيط . … مش معني كلامي إنك تبطل تلعب بإيديك و تلغوص إيديك زيت و تشتغل في المكن بتاعك .. لا .. و لكن مايبقاش المصنع بتاعك معتمد عليك .. يعني ” تلعب ” .. و تسيب الشغل بمزاجك فأى وقت .. لكن ماتبقاش إنت الوحيد اللي فاهم المكن بيشتغل إزاي . … و عند المرحلة دي .. . عند المرحلة دي بس .. بيكون دورك في الشغل بتاعك هو ال ” غُرز ” .. و مش ” غُرز” في كل المجالات … لا .. و لكن .. تبقي بتعرف تاخد غُرزة في مجال واحد أو إتنين علي الأقل .. و بتعين ناس عندها القدرة تاخد غُرز في مجالات تانية .. و لو عند فترة معينة .. لقيت نفسك مابتعرفش تاخد ” غُرز ” في مجال الإدارة .. سيبه .. و دور علي حد حابب المجال ده بما يكفي .. إنه يبقي حابب ياخد ” غرز ” فيه . … … … لكن رجاااااااااااااااء و رجاااااااء كمان مرة .. ماتروحش تاخد كورس في ” تريككات ” المجال الفلاني .. و تتعلم بس إنك تعمل ” غرزة ” أو إتنين .. عشان تحقق بيهم شوية فلوس و خلاص .. لأنك .. إما إنك حتعمل حادثة فطريق سالك و سهل و مفتوح .. لأنك أساساً ماتعلمتش السواقة العادية .. أو إنك بعد ما توصل لمرحلة معينة .. و تبطل عربيتك .. مش حتعرف تدورها تاني .. او حتي تفولها … و حتتصل بحد تسأله .. هي الغرزة مش بتطلع عربيتي من البنزينة ليه ؟! . … لما تحب تاخد كورس في ” غرز ” أو ” تريككات ” … رجااااااااء .. إتأكد إنك دارس المجال ذاته كويس من تحت .. و من الأساس .. .. و الله أعلم .