( البوست الأولاني فسلسلة - الإنضباط و المتعة )

( البوست الأولاني فسلسلة - الإنضباط و المتعة ) متعة ( آخر خمس مسائل في التمرين اللى بعد كل درس فكتاب الرياضة ) .

زمااااان أيام ما كنت فثانوي عام ( 2004-2005) .. أفتكر إن أحد أكتر الحاجات اللى كنت باستمتع بيها في الحياة .. هو إني أرجع البيت فآخر اليوم بعد كل الدروس .. و أقفل عليا الباب .. و أختلي بكتاب الرياضة ( أو الملزمة أو النماذج ) … و أفتح التمرين اللى بعد الدرس اللى خدناه يومها … و أبص للمسائل . … إحساسي في الوقت ده .. كان بيبقي إحساس عجيب بالسيطرة .. إحساس كنت باستمتع بيه بدون ما أفهمه أيامها .. كنت لسة ماختبرتوش فحاجات كتير تانية بحيث إني أقدر أوصفه .. احلله .. أشرحه .. و أتحكم فيه . … أعتقد دلوقتي عندي قدرة بسيطة علي وصف الإحساس ده .. أقرب ما فمفهومي عن ال ( mastering ) .. أو بالعربي الحلمنتيشي ( السيطرة ) .. … الفكرة أيامها كان بيبقي إني عندي إيمان تام بإن كل الأدوات اللى محتاجها عشان أتعامل مع المسئلة ( أياً كان مدي صعوبتها ) .. معايا . ببساطة .. طالما الدرس عن حاجة معينة في التفاضل مثلاً .. و جاتلي مسئلة معقربة مش باين لها أول من آخر .. ماكنش بيبقي عندي أدني شك إن الآداة اللي محتاج أفكر فيها .. هي الحاجة المعينة دي في التفاضل . و كانت المسئلة بتتحول من ( إزاي أحل المسئلة الصعبة اللي فآخر التمرين ) ل ( إزاي أحول المسئلة لأبسط صورها ) . بحيث إنها تبقي سهلة زي أول خمس مسائل في التمرين . … النوع ده من الإطمئنان .. و الإستمتاع بمجرد ما ألاقي المسئلة بدأت تقاومني .. و تحاول تتذاكي عليا .. تحول بالتدريج لإدمان عندي .. و أصبح أى نوع من المسائل المباشرة اللى عبارة عن تعويض فقانون .. شيء ممل .. مستفذ .. مايستحقش إني أبذل وقت طويل فيه ” و ده كان غلط كبير.. بس كنت صغير وقتها ” . غلط كبير إني مافهمتش في الوقت ده إن الإنضباط و تدريب الذات علي مهارة التكرار … شيء في غاية الأهمية .. و مافيش طريق مختصر لتعلمه .. … … علي مدار باقي حياتي الدراسية .. و بعدها العملية .. بدأت أصطاد الإحساس ده .. و أدور علي إن أى حاجة أعملها .. تكون بمتعة اخر خمس مسائل فتمرين الرياضة . و لكن فكلية هندسة .. إكتشفت إن الموضوع ده رفاهية لا نملك وقتها .. لأن الكلية كانت عبارة عن عدد ضخم جداً من القواعد اللى محتاج إني أعرفها و أستخدمها إستخدام مباشر .. و ماكنش في رفاهية الوقت و الفراغ الكافية إني أدور علي المسائل الصعبة و أخوص معاها جولات ذكاء . و أكثر شيء كان مؤلم بالنسبة ليا كانت إمتحانات الكلية .. 75% منها عبارة عن مسائل تعويض مباشر فقوانين … و كل اللي إنت محتاجه عشان تحقق 75% ببساطة من الدرجة .. هو إنك تكون حافظ القوانين (الكتيييير أوي ) دي . و حتي ماكنش بيحتاج منك معظم الوقت إنك تفكر فأني قانون يناسب أنهي مسئلة !! هو كان بيحط لك قبل كل مسئلة سؤال بسيط إسمه ( derive ) .. يعني طلع القانون الفلاني أو حط إثباته ( الإسطامبة اللى بتكون محفوظة صم ) .. و بعدها مسئلة تعويض مباشر عليه . … و نتيجة لأني كنت غير ماهر في الإنضباط في أى مهمة تتطلب التكرار و المثابرة .. فالنظام ده أنا فشلت فيه فشل جدير … آخر دفعتي .. خريج دور تاني .. و شلت سنتين .. و راسب فبتاع 11 مادة علي مدار ال7 سنين اللى عشتهم في الكلية .. و إضطريت أعيدهم .. كتير . … و إتحولت إني أصبحت زي المدمن اللى بيدور علي أى شيء يديله إحساس الشيء اللى هو مدمنه . أى شيء أحس إنه بيقاومني بشكل ذكي عشان أحله .. أى شيء أحس إني مسيطر علي كل أدواته .. و لكني محتاج أفكر بشكل إبداعي عشان أحوله للي أنا عايزه . … لفترة طويلة من حياتي .. كنت باعوض إدماني ده بالفيديو جيمز ..
جيمز زي ( tom clancy , assassins creed , prince of persia , COD , …و غيرهم كتير ) بكل إصداراتهم .. كانوا هما حياتي الحقيقية .. و كنت باطلع منهم مؤقتاً عشان أكل أو أصلي أو أنام .. و بمجرد ما دخلت عوالم (Command and conquer , zero hour , … ) .. و طبعاً .. league of legends .. أصبح كل حياتي بتدور بشكل كبير حواليهم . … … و كنت باحس بنشوة ضخمة .. كل مرة كنت باتغلب فيها علي لغز ما فأى لعبة .. أو أهزم خصم أونلاين أو من إصحابي فلعبة زي جينيرالز أو ليج أوف ليجيندز .. نشوة كانت بتحسسني إني ناجح .. ذكي .. … مسيطر . نفس النشوة اللى كنت باحس بيها .. أيام ثانوي عام . … بس بمجرد ما كنت باقابل أى حد من أصدقائي .. أو أهلي .. أو أى حد في الحياة العادية .. كنت باحس إن كل الإنتصارات الضخمة اللي عملتها دي = صفر . و إنهم بيحققوا إنتصارات مفهومة بالنسبة ليهم .. و بيحتفلوا بيها مع بعض .. و غير مهتمين إطلاقاً بقدراتي اللى بتتطور فعوالم ليج أوف ليجيندز أو أساسانز كريد . و ده كان المؤرق الأضخم ليا لكذا سنة فحياتي .. إني … فاشل . … … و لكن خلال مرحلة الفشل دي .. إكتشفت إن فأعماق الحاجة اللى كنت مدمن ليها و باحبها .. كان موجود الشيء اللي كنت باكره و باهرب منه طول حياتي . و إن أحد أكبر أسباب إني كنت باعشق إحساس آخر خمس مسائل فتمرين الرياضة ده .. هو إني كنت بشكل غير واعي تم تدريبي علي الإنضباط اللى كنت باكرهه .. كل مرة كان في منظومة مسئولة عن إني أكرر نشاط معين … داخل هيكل من الثواب و العقاب ( إذا كان البيت أو المدرسة أو الدرس ) .. بالرغم من تذمري و تكبري .. إلا إني كنت بيتم تدريبي بشكل تكراري ( فهمت إسمه الحقيقي لاحقاً - deliberate practice ) .. و بمجرد ما كنت باختلي بنماذج الرياضة .. كان الجزء الإبداعي عندي هو اللى بيتعامل بشكل واعي … في حين إن كل الأدوات اللى كنت باستخدمها و ( مسيطر ) عليها .. كان تم حفرها فعقلي بشكل غير واعي . … و إن أحد أكبر أسباب فشلي الضخم في الكلية .. هو إن مسئولية التدريب و التكرار و الإنضباط دي .. كانت بالكامل عليا … ماكنش حد في البيت قادر علي مناقشتي فتفاصيل كل مادة زي أيام الدراسة قبل الكلية . و ماكنش في حد فاضي في الكلية إنه يتابعني بشكل شخصي يحسسني بالضغط النفسي الكافي لتوليد الإنضباط جوايا زي أيام الدروس فثانوي عام . … … لحظتها .. حرفياً مسكت ماركر أحمر … و حطيت دايرة حمرا كبيييرة حوالين الكلمة دي فأوضتي (discipline ) و بدأت أكرس كل مجهودي فإني أكون ( disciplined - منضبط ) .. بشكل واعي .. و أدرس كل ما هو عن ( الإنضباط ) و كيفية التدريب عليه … … … و تعدي سنيييين كتير … و تحصل كام حاجة فآخر كام يوم .. تفكرني بالأيام دي .. الأيام اللي بدأت أعلم نفسي فيها ( الإنضباط ) .. و اللي فهمت فيها إنه بالرغم من إنه في قمة الوضوح أهميته .. إلا إنه غير بسيط إطلاقاً فكيفية التحكم فيه بشكل واعي .. … … كنت باتكلم النهاردة مع أحد الأشخاص عن ( المتعة ) دي .. و إزاي إني كنت في غاية المتعة و أنا باحول ( مسئلة ما في الشغل ) .. من شيء غير مفهوم المعالم و لغز مسبب مشكلة … ل شيء مباشر سهل حله و تم حله ببساطة بفضل الله .. … و إفتكرت أيام الخمس مسائل فآخر تمرين الرياضة .. … و قررت .. إني علي مدار الأيام القادمة إن شاء الله .. حاكرس جزء ضخم من اللى باكتبه أو بانشره هنا عن ال ( إنضباط ) .. و أنواعه .. و أجزاءه .. و أهميته .. و … … توكلنا علي الله .