شوية عن الحياة مع ال ( ADHD )

شوية عن الحياة مع ال ( ADHD ) ..

من شوية تقريباً كنت بانتهي من تظبيط نظام شغل جديد بعد أجازة طويلة لأجزاء كتير من شغل الشركة و المكتب بسبب كورونا و الأعياد و ما شابه . و تظبيط نظام شغل جديد خاص بيا شخصياً .. و تقريباً دي المرة الألف مثلاً اللي أجرب فيها أو أسطب فيها نظام ( شخصي ) جديد للشغل .. … نظام شغل يعني :

• ترتيب الأولويات و ال ( to do ) بشكل معين .
• أرشفة التاسكات المتأخرة بشكل معين .
• ترتيب المعلومات الأساسية للشغل ( أكاونتات و روابط و علاقات و ما شابه ) بشكل معين.
• ترتيب خطط الشغل نفسها كخطط ( يومية , شهرية , ربع سنوية , سنوية , .. ) بشكل معين .
• و هكذا و هكذا .. … … و ده بالنسبة لشخص زيي لازم يحميني من نفسي كالتالي : ( علي سبيل المثال و ليس الحصر ) .
  .. 1- أنا ممكن جداً أبني 4 خطط مختلفين .. ل4 بيزنس مختلفين النهاردة .. و أشتغل فيهم الأربعة مع بعض فنفس الوقت .. و أمشي مشوار كويس فكل واحد فيهم . و أصحي الصبح تاني يوم .. ناسي بالكامل 90% من اللي عملته إمبارح .. و ناسي أنا كنت عايز أعمل إيه فإيه .. ليه .. .. 2- أنا مابعرفش أخد أجازة تقريباً .. خالص .. و أى حاجة زي ( أجازة عيد لمدة أسبوع مثلاً ) .. فده معناه إني أحاول أبطل التركيز في جانب معين من الشغل مثلاً لمدة الأسبوع ده .. و أفتح خمس أو ست جوانب جداد ياخدوا جزء من تركيزي . .. 3- ممكن جداً يكون أحد الحاجات اللي شغالين عليها بدأ يشد و يجيب فلوس كويسة مثلاً .. أو يبقي ال ( prospect ) بتاعه رائع .. و يبدأ يجيب عائد كويس مقابل اللي إستثمرناه فيه من وقت و مجهود .. و في اللحظة دي عقلي يقرر إنه زهق خلاص .. الموضوع بطل يبقي مثير بالنسبة له .. و ألاقي نفسي بادور علي حاجة تانية ألعب فيها و بيها .. و أبقي مش قادر حتي أفكر فأى حاجة ليها علاقة بالمشروع ده أو تفاصيله .. و منين ما أحاول أشتغل فيه .. ألاقي نفسي بانام .. أو بادور علي أى لعبة تانية ألعبها .. و ده كان مدمر بالنسبة ليا طول السنين اللي كنت شغال فيها لوحدي .. … 4- في مشاريع أو حاجات معينة في الشغل .. مابتنفعش غير بإنك تمشي عدد كبير من الخطوات اللي ماينفعش تسيب خطوة منها .. مثلاً يعني : عشان تعمل موقع معين لعميل معين ك (متجر إليكتروني مثلاً ) .. ( بكل الإضافات بتاعته من علاقات بسوشيال ميديا و قنوات و روابط و ما شابه .. و الميديا بتاعته كمان و تصميماته ) . .. فده عبارة عن مشروع لا يقل في البروتوكولات بتاعته عن 60 نقطة مختلفين مثلاً .. و مترتبين علي بعض .. .. أنا شاطر جداً في وضع البروتوكولات و الخطط دي .. و حل المشاكل اللي ممكن تظهر في النص .. و متابعة الجديد جداً و تطبيقه بمجرد ما يحصل جديد مثلاً .. … و لكني من أسوأ البشر .. فتنفيذ البروتوكولات دي بنفسي .. و ممكن أسقع مشاريع كتير .. بل و أرفضها .. لمجرد علمي بالمشوار اللي حاضطر أمشيه مع كل مشروع من خطوات ( مش صعبة .. و لكن متكررة .. كتير ) . … و من الصعب جداً إني أقدر أحافظ علي تركيزي لمدة أكتر من نص ساعة عشان أنفذ كام خطوة ورا بعض .. و ألاقي نفسي رايح ( أكتب بوست مثلاً :) . .أو ألعب جيم .. او أقرا مقال ما أو كتاب ما ..) . … … 5- لو المشروع اللي شغال عليه مهم .. و حبيت إني بعد ما عقلي فسحني شوية .. أرجع أكمل شغل عليه .. بابقي كإني بادئ من الصفر .. باكون نسيت كل حاجة مكانها فين .. و ألاقي نفسي فاتح بتاع حاجة و تمانين تاب مختلفين .. علي براوزرات مختلفة .. و لابات مختلفة .. و ورق كتير مكتوب فيه حاجات عجيبة بخط إيدي مش فاكر هي إيه .. .. و بعدين ألاقي نفسي باصص للكلام ده بإستغراب .. و عقلي يطلع فيه عدد جديد من الأفكار الجديدة اللي تنفيذها معناه إني أهد جزء كبير من الشغل اللي إتعمل بالفعل .. و عدد جديد من الأفكار لمشاريع جديدة مالهاش علاقة باللي أنا شغال عليه أساساً .. … و لما كنت باشتغل لوحدي دايماً .. كنت فعلاً باعمل كده . … … 6- زمااااااااااااان .. و قبل ما أقرا بشكل كافي عن المتلازمات الناتجة عن متلازمة ( ADD ) .. كنت باعاني معاناة ضخمة من اللي باحس بيه ده .. .. ببساطة ( متلازمة ال ADHD- فرط الحركة و تشتت الإنتباه يعني ) .. مش بتيجي لوحدها معظم الوقت .. بل غالباً بيترتب عليها خلطة من المتلازمات التانية … منهم مثلاً :
• إضطراب التوتر المزمن = Anxiety disorder
• إضطراب ثنائي القطبية = Bipolar Disorder
• إضطراب الوسواس القهري = Obsessive Compulsive Disorder .. و كل واحد من التلاتة دول لواحده أساساً مصيبة سودة و منيلة بنيلة .. مثلاً بسبب الإضطرابات الشعورية الناتجة عن ال( ADD ) .. في الإمتحانات مثلاً .. أوتوماتيك كنت بادخل فنوبات هلع رائعة .. كانت بتخليني أنسي أجزاء من إسمي نفسه والله العظيم . .. و بعدين بدون فهم كافي للي كنت باعدي بيه .. كنت بادور علي أى طريقة أفهم بيها طريقة لعقلي إنه يكون ثابت علي حال معين .. فكنت باربط بين أى نواتج متكررة .. و أى شيء كنت باحلله ك( سبب ) للنواتج دي .. و أكون ( متطير ) جداً نتيجة لكده = ocd . مثلاً : أبقي متفائل جداً بلبس معين .. و أتشائم بلبس تاني .. و أظن إن آدائي في الإمتحانات ممكن يبقي مرتبط باللبس ده . أبقي مش قادر ماعملش فعل معين .. بتكرار معين .. لأن عقلي ربط بين الفعل ده و بين الناتج المعين اللي هو عايزه .. فأغسل إيدي 4 مرات لازم مثلاً .. و لو كانوا 3 بس .. أبقي مش قادر أبطل تفكير في الموضوع ده و لازم أرجع أغسل إيدي المرة الرابعة .. و هكذا . .. و غيرهم من الإضطرابات الظريفة .. … … خدت وقت طويل فعلاً لحد ما قدرت أفهم إزاي أفك العقد الكتير اللي كانت مبنية علي الإضطراب الأساسي ده .. و بقيت قادر أتعرف علي ( قالب ) معين من الأفكار بييجي ورا بعضه خاص بكل إضطراب . . و أبدأ أتعامل معاه بالشكل المناسب . … … … … لو حابب إن اللي وصل للحتة دي في البوست يستفيد شيء ما .. فهو فكرة ال ( تكرار محاولة بلا توقف ) .. .. ممكن جداً النهاردة بالليل ألاقي نفسي نسيت السيستم اللي كنت قاعد بابنيه بقالي ساعة مثلاً .. و أبص للمجهود اللي بذلته في بناءه و بناء حاجات كتير تانية .. و أحس إني عايز أدغدغ كل ده و أبتدي من أول و جديد .. .. و خصوصاً لما الموضوع بيكون مربوط بنظام أنا مش متحكم فيه بالكامل : ( ديدلاين لمشروع بنقدم عليه مثلاً , إمتحان ما , … ) .. أى حاجة من النوعية دي .. كان بيبقي في الغالب مصيرها لو أنا شغال فيها لوحدي : الفشل . .. فشل كتير جداً .. جداً .. و ما يترتب عليه من ( يأس و إحباط و تعب و … كل الحاجات الظريفة دي ) .. .. و لكني إتعلمت من زمان بفضل الله .. إني أستمتع بالفشل ده .. بالظبط زي ما إتعلمت أستمتع بكل أجزاء اللعب اللي كنت باكسرها زمان .. و أركبها فبعضها .. و أطلع لعبة جديدة .. و بعدين أكسرها .. و أجيب شوية أجزاء من لعب تانية إتكسرت برضو .. و أركبهم فبعضهم .. و هكذا .. … … و الله أعلم .