بالنسبة لشغلانة الأفترإيفكت اللى كنت كتبت عنها إمبارح

بالنسبة لشغلانة الأفترإيفكت اللى كنت كتبت عنها إمبارح .. فى شخص إستلم حالياً .. فعملت البوست ( only me ) .. و جارى إختبار شخصين تانيين لشغلانة تانية تحتاج مستوى متقدم شوية ..

شكراً جزيلاً لكل شخص راسلنى بخصوص الشغلانة بتاعت إمبارح .. تم عمل ليست بالأكاونتات و الأسامى .. و حيتم مراسلة الليستة دى بمجرد توافر شغلانة تانية إن شاء الله .

بالنسبة للناس اللى كلمتنى بخصوص هل مازلت بادى كورسات ؟ .. و إمتى ؟ ------ شوية كلام صغيرين كتير :) --------- 1- أنا باحب و باستمتع للغاية بالشرح .. ده حقيقى .. و ماعنديش أدنى مشكلة والله إنى أشتغل شرح كورسات مجاناً بالكامل لأى حد فأى مجال من المجالات اللى ربنا رزقنى حب تعلمها . السبب فحبى للشرح و التدريس هو : إنى باستمتع و أنا بافتكر المعلومات .. و باستمتع و أنا باحاول أربط مسارات المعلومات دى فدماغ اللى قدامى .. بشكل مشابه لأول مرة إتعلمتها .. و بأشكال جديدة لو مانفعش معاه طريقتى . باحس بعد كل معلومة باقولها .. حتى لو كانت دى المرة الألف اللى أشرحها فيها .. إنى باتعلمها من أول و جديد .. و باكتشف جانب جديد فيها .

2- و لكنى زى ما كنت طالب متمرد على نظام التدريس الجاسئ المتحجر .. برضو بقيت مدرس متمرد لأى مجال بادّرسه و باشرحه .. و أسلوبى قد لا يعتاده الكثير .. و ده بيسبب تعارض مع أغلبية بتفضل نظم التدريس المعتادة التى لم و لن أحترفها :( . و مثال على كده .. كورساتى الأونلاين .. هى مش كورسات من الألف للياء أبداً .. و عمرى ما قصدتها كذلك .. و ما زلت أؤمن إنها مجرد دليل للطريق .. و ليست دليل على الطريق . و مع ذلك .. بتتراوح الآراء عليها من أقصى اليمين و أناس بتثنى عليها للغاية بشكل يذيبنى خجلاً .. لأقصى اليسار و أناس بتلعن فيا و فيها و فى الإنترنت عموماً تقريباً .. و لكن لو إتفق الناس لبارت السلع :) .. فما علينا ..

3- أنا درّست لفترة تزيد على السنتين و النصف تقريباً .. خلال الفترة دى .. عدد (مش كبير) من اللى درستلهم .. حالياً ما شاء الله كملوا الطريق و قادوا حيوات عملية رائعة فى المجالات اللى حضروها معايا. و لكن العدد الأكبر (للأسف) .. طلعوا من كورساتى .. زى ما دخلوا فيها .. و بالرغم من إستمتاعهم بالكورس و إتفاقهم مع أسلوبى .. لم يبقى فى ذهنهم من الكورس سوى بضع ذكريات ضاحكة .. نتذكرها و نضحك :) .. أحياناً . العدد ده بقى هو أكبر مشكلة بالنسبالى .. إحساسى إن شخص ما ..دفع مبلغ ما من وقته و ماله و طاقته .. و قعد يسمع لكلامى لمدة من الزمن .. و عاد كما جاء … إحساس غير رائع إطلاقاً .. إحساس إنى لا أستحق أياً من ماله أو جهده أو وقته .

4- و مع علمى إن ناس كتير بتقول إن جزء كبير من النقطة السابقة يتوقف على طالب المعلومة اللى بيحضر الكورس .. و ليس المحاضر .. إلا إنى بارفض المفهوم ده شكلاً و موضوعاً .. و ما زلت باعتبر إن مسئوليتى 100% إنى أياً كان اللى قعد قدامى .. إنى ألاقى الطريقة اللى أحققله الإستفادة القصوى و المرجوة من الكورس . و ده مش ساهل … إطلاااااقاً .

5- نتيجة للأربع نقاط اللى فوق دول .. بدأت تدريجياً أهرب من عمل كورسات من سنة .. و بدأت أدور على طرق جديدة و فعالة أكتر تحقق النتيجة المرجوة لشخص بيطلب علم فأى من المجالات اللى بافهم فيها . و لكنى لم أنجح بعد للأسف فإيجاد و إكتشاف العنصر الفعال اللى ممكن يزود كفاءة العملية بالشكل المرجو بعد .

6- كما إن بناءاً على الأربع نقط (من واحد ل أربعة) .. باهرب من إنى أحدد سعر لأى كورس باعمله .. و لما حد يسألنى “كورس كذا معاك بكام ؟ ” .. بيكون ردى هو ” شوف سعر الكورسات اللى من النوعية دى كام .. و اللى تقول عليه أنا موافق” . و دى مش طريقة تخلى من الموضوع ده نشاط حياتى ينفع إعتباره مصدر دخل مريح .. إطلاقاً .

7- أنا كثير السفر .. و قليل البقاء فى نفس المكان فترات طويلة .. و ده بيخلينى أكره عمل كورسات تمتد لفترات طويلة .. تلزمنى بجدول مواعيد ثابت لفترات طويلة .. فى حين إن الأغلبية بتفضل الكورسات الطويلة الممتدة اللى بتشرح كل شىء تفصيلياً .. و أنا عاشق لمبدأ ال ” كراش كورس” .. وبقيت قدر الإمكان شايف إن أطول وقت المفروض ياخده كورس .. المفروض يكون 5 أيام بالكتير .. ساعتين فى اليوم . اللى هو المفيد فوقت قليل جداً .. و إنت تكمل الساهل و البديهى بنفسك .. و الإنترنت بقى حق إنسانى زى دخول التواليت بالظبط دلوقتى . و ده غير ماركتابل إطلاقاً بالنسبة لسنترات كتير .. جداً .

8- و أخيراً و ليس آخراً .. إنى أتحمل إدارة الكورس بتاعى بقى بنفسى .. و أعلن عنه .. و أسوق ليه .. و أحاول أقنع الناس .. و أجمع الناس .. و أكلمهم .. و ألم فلوس .. و أتابع إداريات .. ( فدى أحد أنجح الطرق لتعذيبى ) ..

9- لذا .. ردى لكل من طلب منى كورس على مدار الشهور اللى فاتت هو : ” لو عايز نحدد برايفت .. معنديش مشكلة .. شوف السعر المناسب حالياً فى السوق و نحدد مواعيدنا و نتوكل على الله .. بس لو عايز مجموعة .. هات إنت المجموعة .. و كون المسئول و المدير .. و خد نسبتك .. و حلال عليك .

و الله أعلم .