طلع بوست طويل فحت .... معلش بقى

طلع بوست طويل فحت … معلش بقى .. … لو قمت بإرسال هذا البوست لعشرة من أصدقائك .. سيمكنك العودة فى الزمن 10 سنوات إلى الخلف .

لو بس رجع بيا الزمن 10 سنين لورا … ياااااااااه .. دانا كنت حاسوى الهوايل و أعمل عمايل .. و ماكنتش حاعمل المصايب اللى عملتها و ندمت عليا .. صح ؟ … تقريباً عدد الأشخاص اللى أعرفهم فحياتى اللى لو إتعرض عليهم العرض ده حيرفضوه .. مايكملوش 5 أشخاص . و باقى الناس اللى عرفتها كلها .. حيدفعوا أى شىء فمقابل العرض ده .. اى شىء .. لدرجة إنهم ممكن يشيروا البوست فعلاً . نفس العرض طبعاً لو عرضت عليهم إنهم يعرفوا اللى حيحصل فى المستقبل و الغيب كمان 10 سنين .. حيوافقوا مباشرة برضو .. ( ما عدا نفس ال5 أشخاص ) . … السبب فكده هو إننا بطبعنا كبشر بنرتكب أخطاء كتييييييير .. أخطاء فاااادحة .. بنرتبط بناس غلط .. بنبعد عن ناس صح .. بندخل فشغل غلط .. و بنطلع من شغل صح .. بنعمل حاجات غلط .. و مابنعملش حاجات صح .. كلنا كده .. مافيش بنى آدم فى تاريخ البشرية ماعملش حاجات ندم عليها .. و ماندمش على حاجات ماعملهاش . … و على رأى المثل بتاع ( الخبرة هى المشط اللى الحياة بتديهولك بعد ما تتصلع و شعرك يقع ) .. ناس كتير مابتكتشفش أخطاءها و ندمها ده .. إلا بعد فوات الأوان . دى مشكلة ضخمة … طيب الحل إيه ؟! ما هو الرجوع فى الزمن .. او السفر للمستقبل .. بقت حاجات قديمة أوى .. و إتهرت ألف مرة فى القصص و الأفلام . الحل ببساطة هو … سر .. سر .. ناس كتير على مدار التاريخ عرفوه و فهموه .. سر .. هو أكثر سر مشهور فى التاريخ . … أن أن آآآآن … تشششش . … مواقف كتير بتحصل بتفكرنى بالسر ده .. و إزاى إن فى ناس كتير متجاهلاه .. مع إنها مستعدة تصرف أى شىء معاها فسبيل الحصول على نتيجته .. … إتخيل التالى : إتخيل إنك بتلعب (سوبر ماريو ) .. اللعبة دى كانت 36 مرحلة (على ما أتذكر) .. و أول مرة قفلتها .. كنت قفلت المراحل بتاعتها بالترتيب .. و الموضوع خد منى 6 ساعات لعب .. متواصل .. و كنت فأولى إعدادى ساعتها .. بعد سنة كاملة تدريب و لعب يومياً .. قفلت اللعبة أخيراً .. و رحت المدرسة فرحااااااااااان … و باقول لواحد صاحبى على تفاصيل المرحلة الأخيرة .. لقيته بيوصفهالى ..

• إيه ده ؟!.. إنت قفلتها إنت كمان ؟ رد عليا = من زمان ! حسيت بالإحباط .. و إنه علم عليا .. و إذا به يكمل … = إنت بتاخد الشورت كات فى المرحلة التانية يوديك على التامنة .. و من التامنة بتاخد شورت يوديك عالستاشر .. و بعدين … و لقيته بيشرح إزاى تقفل اللعبة فنص ساعة .. بالشورت كاتس . … عمرى ما حانسى إحساسى فى اليوم ده .. إحساس شكل جزء كبير من حياتى لحد النهاردة .. إحساس إنى قضيت من عمرى سنة تقريباً بنافس فلعبة .. غيرى كسبها و وصل لنهايتها قبلى و بكل سهولة .. لأنه خد شورت كات . … و عند المرحلة دى أنا فاكر إنى بدأت أفكر .. إيه تانى فى حياتى فيه شورت كات ؟! المذاكرة كان فيها شورت كاتس كتيير .. كان ممكن إنك تذاكر المنهج كله عشان تنجح .. أو تحفظ الإمتحانات بس عشان تقفل و تجيب الدرجة النهائية (بس للأسف عندى مشاكل فى موضوع الحفظ ده ) . اى لعبة فيها شورت كات .. ( و إصحابى بيكرهوا يلعبوا معايا عشان عملت ده فيهم كتييييير ) .. الحياة نفسها … ليها شورت كاتس .. … … بقالى سنة و نص منتظم فى الجيم بفضل الله .. خلال السنة و نص دول .. شفت معظم الأنواع المشهورة اللى بتشوفها فأى جيم فى العالم .. التخين المليان اللى بييجى يومياً .. و مع ذلك لسة تخين و مليان .. الرفيع الهيكل العظمى .. اللى برضو بييجى يومياً .. و لسة هيكل عظمى .. المواظب اللى بييجى يومياً .. بس بيلعب بنفس الأوزان .. نفس التمرينات .. و جمسه مازادش فيه عضلة .. .. و فى نوع معين .. هو اللى باتكلم عنه هنا .. اللى جه الجيم أول يوم زيه زى أى مبتدئ .. و خلال ست شهور بس .. بقى فيت و عضلات و جسم و ما شاء الله عليه .. من غير مكملات أو كلام من ده .. النوع ده .. خد الشورت كات .. … الشورت كات ده هو .. السر .. اللى هو ال : ***** المعلومات ***** … لسة من شوية كنت باتفرج على فيديو بيشرح (HIT) = High intensity training و ده أنواع من الكارديو و التمرينات .. بتحرق الدهون بدون ما تحرق العضلات .. و بتحرق الدهون بسرعة جدااا .. و إزاى إن الكارديو الطويل .. أو التمرينات الطويلة .. زى إنك تجرى لمدة 30 دقيقة مثلاً أو 45 دقيقة .. مؤذى جداً أحياناً ( مش دايماً ) .. و مش هو ده الحل إنك تنزل وزنك بسرعة و بكفاءة . … أول ما إبتديت تمرين .. كنت باجرى لمدة 45 دقيقة فى التراك الأول براحة … و بعدين باسبرينت لمدة 15 دقيقة .. و بعد كده باطلع على الجيم أقضى فيه ساعة على الأقل . حرفياً كنت بارجع مقتول .. يومياً .. بس العائد ماكنش مريح إطلاقاً !! عضلاتى كتلتها كانت بتقل مش بتزيد ! نسبة الدهون عندى كانت ثابتة و عالية ! و منظرى كان برضو مش ولابد ! الحاجة الوحيدة اللى كانت بتزيد كويس و مفيدة هى الستامينا ( أو قدرتى على تحمل ده بشكل يومى لمدد طويلة بدون ما أتعب جداً ) . … بعد أول شهرين .. قررت إنى كفاية إستعباط لحد كده .. و بدأت أدرس .. دراسة زى دراسة الكلية حرفياً .. و بدأت أفهم حاجات كتير عن الهورمونات و التشريح العضلى و بناءه و دورة التغذية و كل ده .. و فهمت إنى كنت باقتل نفسى مش باتمرن .. و فهمت كتير عن الصح اللى المفروض يتعمل إيه .. و إزاى إنى محتاج بالكتير 45 دقيقة بس يومياً عشان أحققه .. و النتيجة كانت واضحة … جداً .. … نفس المبدأ ده أنا كنت و مازلت باطبقه على كل ما أقدر عليه فحياتى .. مبدأ ( المعلومااااااااااات ) .. إتخيل أى مجال … أى مجال مهما كان .. ليه تبتدى من الأول ؟! ليه تخترع العجلة من الاول ؟! … يعنى فى الطبخ مثلاً … أى حد عايز يبتدى يطبخ صح .. بيخلوه يقرا وصفات و يطبقها .. مش يدخل المطبخ و يبتدى يخترع لوحده !!! كلنا عارفين كده .. طب ليه مش بنطبق ده على كل حاجة تانية فحياتنا ؟!!!! ليه بننسى إن فى مليارات من البشر عاشوا نفس الحياة دى قبلنا .. و نفس مشاكلنا دى قبلنا .. و لقوا حلول كتير .. و كتبوا ده .. فكتب .. مابيقراهاش غير 10% مننا على الأقل ؟!! … عايز تحب و تتحب صح ؟ … فى آلاف الكتب عن ده عايز تنجح فشغلك أياً كان هو إيه ؟ … فى آلاف الكتب عن ده عايز تعمل أى شىء ؟!! .. غالباً حتلاقى عشر كتب خلال دقيقة لو دورت على جوجل . حتى لو مش عايز تعمل أى شىء … إقرا .. حتعرف عن اللى إنت مش عارفه حالياً .. … و لكن .. إحنا بننسى .. و بنكسل .. و بننسى إن فى كتب شرحت إزاى تتغلب على الكسل ده .. و مابنقراهاش .. و النتيجة … إن القسمين دول فى العالم كل يوم بيبعدوا عن بعض أكتر بكتيييييير … القسم اللى بيقرا و يتعلم يومياً .. و القسم الجاهل اللى عايش كأنه بيعيش الحياة لأول مرة .. … و كل يوم الفروق بين القسمين دول بتبان أكتر .. هيلارى كلينتون كانت بتقول على ( الجاهلين ) دول : ديبلورلابلز = ملهمش أهمية . و لكنهم طلعوا النص تقريباً … و خسرت الإنتخابات .. خسرت ضد اللى ملهمش أهمية .. لأنهم كتييير .. أوى … … فى علامات كتير بتبين الجاهلين دول .. بس أكبر علامات هى : دايماً ندمانين .. دايماً حاسين إنهم مهزومين .. و دايماً… مابيقروش .. … و الله أعلم