شغلانة #سوشيال_ميديا... ( من البيت .. بس يفضل من دمنهور

شغلانة #سوشيال_ميديا… ( من البيت .. بس يفضل من دمنهور .. و يفضل لو بنت .. فرأيى : مستقبلها جميل جداً ) .

صديقى صاحب كافيه ( la femme ) بدمنهور ( اللى عند تشاو مول) .. بيدردش معايا و عايز حد سوشيال ميديا .

معلومات عن الوظيفة :

1- كافيه و مطعم حريمى فقط (و طبعاً فيه جزء أطفال ) . 2- مكانه بدمنهور .

متطلبات الوظيفة :

1- يفضل لو بنت .. بس مش بالضرورة . 2- عايزين كائن عايش على الفيسبوك … حرفياً . 3- يفضل لو كان/كانت بتعرف فوتوشوب . 4- يفضل لو كان من دمنهور . 5- يفضل لو كان بيحب الأكل و بيتفرج على فتافيت و سي بس سي سفرة كتير . 6- و طبعاً .. يا حبذا لو كان جرب يمسك صفحة فيس قبل كدة . 7- الشغل ( 10 ساعات يومياً - مدة شغل المكان) … من البيت .

أوبجكتيف الوظيفة :

1- رد على كل الرسائل و التعليقات . 2- تسويق الصفحة بشكل أورجانيك عن طريق وضع محتوى جديد .. و مستمر .. و مبدع .. و جذاب .. و كده يعنى .. 3- إستهداف الجمهور المرغوب فيه و التواصل معه بشكل ( بروأكتيف ) .. مهمة جداً الحتة دى . 4- دراسة السوق المستهدف و تحديد إتجاهاته من ( مطالب , تريندات , شكاوى , … ) .. يعنى مثلاً ( لو عرفت إن فى صنف جديد نزل فمطعم فإسكندرية و الناس عاملة دوشة عليه .. دورك تبلغ الإدارة بكده و تشوف إزاى تستغل ده عندك .. تعمل زيه .. أو أحسن منه .. و تعمل دوشة على كده عندك إنت كمان ) . 5- ركز على كلمة ( بروأكتيف ) .. يعنى شغلتك مش رد على رسايل و كومنتات بس .. لا .. شغلتك لو المدير مش مشغلك .. إنت اللى تشغله .. إنت اللى تقوله فوق معايا مش كده . 6- لو من دمنهور (أو إسكندرية ) .. و عندك الإستطاعة تزور المكان مرة أو مرتين أسبوعياً .. ( يا ريت ) ..

مزايا الوظيفة :

1- حتابع معاك أحياناً من بعيد لبعيد .. جداً .. و لو إحتجت أى حاجة أو حبيت تتعلم أى شىء .. حاكون معاك … (لكن لاحظ إنى أجهل ما يكون بالديموجرافى دى ) . 2- المكان (على حد علمى ) رائع .. و أثق فى صاحبه إنه مابيبخلش على شغله أو اللى شغالين معاه بأى حاجة . 3- لو عرفت تعمل نقلة ملحوظة فى الشغلانة دى .. إنت كده بتحط نفسك على طريق كارير رائع بيكبر كل يوم فمصر بالذات (بلد المليون كافيه - بلدك بتعشق الأكل و الكافيهات) .. و لو عرفت مداخل و مخارج العالم ده على السوشيال ميديا .. حتقدر تشتغل مع أكتر من حد بأرقام رائعة . 4- لو أثبت نفسك و عملت شغل كويس .. فى أكتر من مكان مشهور ( فدمنهور و إسكندرية برضو) طلبوا منى نفس الشىء .. حوصلك بيهم إن شاء الله .

فلوس الوظيفة :

75 دولار شهرى (كبداية)

طريقة التقديم :

إبعت لى رسالة فيها التالى : 1- لو فى CV يا ريت … و لو مافيش .. يبقى اللى بعده : 2- إسم كامل . 3- رقم موبايل . 4- دراسة ( جامعية أو ثانوى أو أونلاين .. باسأل على علمك مش شهادتك ) . 5- سابق شغل ( لو فى .. مش مشكلة لو مافيش) . 6- إمكانيات و مهارات ( كمبيوتر و غير كمبيوتر ) . 7 - و الأهم : ( عايزك تفتح ملف وورد .. و تكتب خطة للشغلانة دى .. و إزاى حتطبق الخطة دى .. تفصيلياً ) ( و أولوية الدراسة للطلبات حتكون للى بعت الخطة دى ) .

لو فى جديد فى الموضوع حاضيفه .. و الله أعلم .