ماكانش بوست و كان صورة بس .. شوية شوية ..

ماكانش بوست و كان صورة بس .. شوية شوية .. بقى بوست !

just added a couple more :D . من شوية و أنا باعمل قهوة ( تانى فنجان النهاردة :( ) … خطر على بالى فكرة سريعاً .. رجعت بالذاكرة لأقصى ما يمكننى فى المراحل التعليمية الحكومية اللى عديت عليها .. و لقيت نفسى باسأل …

• هو إحنا إتعلمنا القراية ؟!! .. أيون إحنا إتعلمنا ( إزاى نقرا ) … بس مافتكرش إننا حد حاول يعلمنا ( نقرا .. إيه ؟!!! ) . .. حاولت أفتكر آخر مرة مدرس فأى مادة .. رشح كتب لنا نقراها مثلاً !! اللهم إلا فئة نادرة من المدرسين اللى حافضل أدين لهم بالفضل طول حياتى إن ربنا جعلهم سبب فتعليمى زى : ( محمد بدوى فى الرياضة فثانوى , دمين منصور فى الرياضة فإعدادى ,هانئ الجندى فى الفيزيا فثانوى عام … ) .. أتذكر إنهم كتير كانوا بيذكروا كتب كتير و قراءات كتير ليهم خارج المنهج .. و إن لم تكن خارج مجال تخصصهم .. إلا إنى حافضل أعتز جداً بكونهم شجعونى أكسر قفص المنهج ( اللى غالباً بيكون مصدى ) . … النهاردة الصبح و أنا شغال إتفرجت على الحلقة الأولى من برنامج david letterman الجديد .. (my next guest needs no introduction) .. و كانت مع البرنس الكبير أوى : أوباما .. … أثناء الحلقة لقيته بيتكلم على كتابه ( dreams from my father ) .. و لقيت نفسى باكتشف إنى ماعرفش إلا أقل القليل عن الشخصية دى .. إختلفت أو إتفقت معاها .. إلا إنه بالتأكيد من أكثر الناس اللى الواحد محتاج يسمع أفكارهم و يزودها لأفكاره .. … بشكل تلقائى .. طلعت onenote و كتبت note أفكر نفسى أنزل الكتاب لما أرجع أوديو بوك كالمعتاد .. لسة منزله من 10 دقايق .. و ضفته هو و ( on writing : stephen king ) … و لقيت إن الصورة دى ممكن تكون مفيدة لأى حد عايز ترشيحات لحاجات حتساعدك جداً فى إنك تشوف العالم بشكل أروع . … الفولدر ده فيه تقريباً 60% من الكتب اللى قريتها على مدار سنتين .. ححاول لما أرجع إن شاء الله أبقى أعمل بوست تانى و أجدوله ينزل بعدين فيه تجميعات أقدم من عندى .. … معرض الكتاب شىء حلو مش وحش .. بغض النظر عن أفكارى الخاصة عن الكتب المطبوعة و أهمية الإنتقال للكتب الرقمية .. إلا إن السنة كلها معرض كتاب كاااامل .. قدام عينيك .. على الإنترنت .. فمتحددش أفقك .. … و الله أعلم .