أربع سكك ل #نتيجة_الثانوية_العامة : (وجهة نظر خاصة جداً بناءاً

أربع سكك ل #نتيجة_الثانوية_العامة : (وجهة نظر خاصة جداً بناءاً على خبرتى الخاصة)

1- لو نتيجتك طلعت أكبر من 99% .. مبروك .. ده معناه إنك إمكانياتك تؤهلك إنك تفهم كويس .. و تحفظ كويس جداً جداً .. و ده مفيد لحاجات كتير .. بس مالوش أى علاقة بعلوم (الطب أو الهندسة أو الصيدلة ) الحقيقيين .. و مابيديش لك أى ميزة جوة الكليات دى إطلاااااقاً .. كل سنة الكليات دى بيدخلها آلاف جايبين زيك و أكتر منك فى الثانوى العام … و بيتخرج منها آلاف برضو .. و نسبة كبيرة منهم ( كبيرة أوى صدقنى ) .. بعد ما بتتخرج .. بتقعد تحسد إصحابها اللى دخلوا تجارة و إتخرجوا و إشتغلوا فبنوك أو فشركات و إتجوزوا.. أو آداب أو تربية و طلعوا إشتغلوا مدرسين خصوصيين و بيجهزوا للجواز … فى حين إنهم (خريجى هندسة ) لسة بيفكروا ياخدوا كورسات تؤهلهم للشغلانة اللى إتوسط لهم صاحبهم بتاع تجارة عشان يجيبها لهم . و (خريجى صيدلة ) بيسألوا عن مرتب مدير صيدلية كام فمصر .. و يتخضوا .. فيبدأوا يدوروا على سفر للخليج .. يلاقوه قفل .. فيبدأوا يفكروا يغيروا كارير و يسألوا على الكورسات اللى بتوع هندسة رايحين ياخدوها . و (خريجى طب ) بيبصوا على دول و على دول .. و يبصوا على أخبار صاحبك برضو بتاع تجارة أو آداب .. على الفيس بوك .. و بعدين يقفلوا موبايلاتهم عشان عندهم مذاكرة لإمتحان بكرة إن شاء الله .. و بيفكروا يقضوا اسبوع الأجازة السنوى اللى بياخدوه فى البلايستيشن السنادى ولا فى البنج بونج .. … 2- لو نتيجتك طلعت من (95 ل 98.5) % .. الله ينور .. مبروك برضو .. ده معناه إن إمكانياتك برضو تؤهلك إنك تفهم كويس .. و تحفظ كويس جداً جداً .. بس لسبب ما حصلك ظرف طارئ أو نسيت معلومة أو إتلخبط فحل سؤال واحد .. خلاك ماتجبش ال99% . بعد ما تعذب نفسك و تشد فشعرك و تعيط و تكره نفسك و حياتك و تبعد عن صحابك اللى جابوا 99% عشان خلاص هما بقوا كليات قمة و إنت آخرك تجيب (علوم) .. خلينى أقولك برضو إن (علوم ) مش معناها مندوب مبيعات أدوية .. أو شغل فمعمل تحاليل .. والله أبداً … إلا لو ناوى على كده يعنى .. فده حلو برضو و حتطلع تشتغل علطول و تتجوز … و فى نسبة برضو حتطلع و تقرر تشتغل مدرسين زى بتوع آداب و تربية .. برضو جميل .. حتشتغل .. و لو صوتك عالى و نفسك طويل .. ممكن تبقى مدرس خصوصى ثانوى عام و البلية تلعب معاك . .. (علوم) أو ما شابهها من كليات ال (95 ل 98.5) % لا تختلف فأى شىء إطلاقاً عن كليات ال 99% غير إن فئة أكبر من المتوهمين و اللى عايشين بين صفحات الجرائد المحلية من الطلبة اللى فسنك قدموا على كليات ال99% .. فأصبح الطلب عليها أكبر .. فسعرها فسوق البهايم .. آسف .. قصدى فسوق الدرجات غلى و بقت ب 99% . … 3- لو إنت بقى تحت ال95% .. لحد ال90% .. ألف مبروك يابنى والله .. فده معناه إنك حاولت بكل الطرق الممكنة بالنسبة لك .. بس ربنا حب يحميك من إنك تعيش فى الوهم بتاع الكليات اللى فوق ده لمده 5 سنين لسة على الأقل .. و ربنا أنعم عليك بنعمة إنك تفوق بدرى .. و إنك تبتدى حياتك بنفسك حر من العبط اللى فوق ده بدرى عن زمايلك 5 سنين . اللى بيفهم النعمة دى .. و يدخل أى كلية تساعده فى المجال اللى هو عايز يشتغل فيه أو تبقى حتى مجرد كافيتريا يروحها الصبح زى النادى كده .. يتعرف على بنات و ولاد و يعيش حياته .. و بعدين يرجع بيتهم يبنى شغله و دراسته الحقيقية بنفسه .. دول بس .. هما اللى بينجحو النجاح اللى إنت بتقرا عنه على الفيسبوك و تشوفه فى الأفلام .. بتاع مصيف مراسى و السخنة و الكلام ده . اللى مابيفهمش النعمة دى .. و يفضل باصص على الوهم اللى فوق .. حيفوق برضو .. بس بعد ما زمايله اللى حيعيشوا الوهم اللى فوق ده 5 سنين و يخرجوا منه على الحقيقة و يقولوا له إنهم بيحسدوه . بس حيبقى ضيع 5 سنين على الأقل من عمره باصص على وهم . … 4- لو إنت بقى تحت ال90% .. ألف ألف مبروك يابنى .. لا .. إبنى إيه ؟ … إنت برنس كبير .. إنت واحد فاهم الدنيا من بدرى و دماغه توزن بلد … و مش محتاج كمان تقرا كلامى ده . .. ده معناه إنك فهمت إن قصة ثانوى عام و الكلية و العبط ده كله مجرد مسرحية كبيرة أهدافها كتير جداً .. بس مافيش فيهم أى شىء ليه علاقة بالتعليم أو بناء المستقبل أو أى بتنجان . .. ده معناه إنك قررت إنك ماتتعبش نفسك فوهم فاضى .. و دماغك مادخلش عليها إنك تقضى أهم سنين عمرك فمذاكرة (عنتر حب عبلة قد إيه ؟ .. و طه حسين كان بيدخل الحمام كام يوم ؟! ) . .. ده معناه إنك دماغك صاحية .. و جاهز إنك تبتدى حياتك مباشرة و تسبق الكل فعلاً .. لو كملت و لعبتها صح .. و بدأت تدرس بنفسك و تشتغل على نفسك بدرى بدرى كده .. حتنجح أكتر من بتاع مصيف مراسى مرة كل سنة .. و دماغك حتكبر عن الكل .. و حترستأ نفسك و شغلك صح .. و حتاخدلك حتة فدهب أو شرم .. أو يمكن تسافر برا مصر بالكامل .. و تعيش برنس كبير فوق الوهم ده كله . .. لو لعبتها غلط .. و ماستغلتش إمكانيات عقلك الجبارة دى بدرى .. عقلك حيدور على أى حاجة يشغل بيها نفسه .. و مش بعيد تلاقى نفسك مدمن أو مجرم .. إنت عامل زى اللى معاه عربية بموتور طيارة .. يا تستغله صح و تطير .. يا تستغله غلط و ينفجر فيك . … 5- لو إنت أكاديمى و عايز تكمل أكاديمى .. مع نفسك بقى .. إنت واحد ليه سكة خاصة جداً جداً جداً .. و حياتك و قواعدها إنت أدرى بيها .. فى جملة بتوصف العالم ده من وجهة نظرى قالتها العبقرية ويندى فى المسلسل العبقرى (بيليونز) للبرنس الكبير أكسل رود .. و هى بتوصف الأكاديميا .. دور عليها إنت أنا مش حاكتبها هنا . … الخلاصة . من و إحنا صغننين .. إتربينا فعالم بيوهمنا إننا فى حد تانى فاهم مستقبلنا و حياتنا أكتر مننا .. و إننا المفروض نسمع الكلام و إحنا ساكتين و ننفذ بدون ما نفكر .. و بنوا لنا نظام يحاسبنا على ده إسمه بالدرجات .. و الثانوى العام جزء ضخم منه . بص حواليك يابنى .. شايف إنهم فعلاً فاهمين مستقبلك و حياتك ؟ .. شايف إن حد بيدور على مصلحتك ؟.. و لو بيدور عليها فعلاً .. شايف عايز يحطلك فيها إيه ؟!!! … إنت ماحدش فاهم حياتك أكتر منك .. و ماحدش حيدور على مصلحتك (أو يحافظ عليها) أكتر منك .. و زمان هما ماكنش عندهم الإمكانيات اللى عندك دلوقتى من إنترنت و معلومات تساعدك تعمل أياً كان اللى إنت عايزه فأى وقت .. فكانوا مضطرين يصدقوا .. ماتبقاش إنت بقى عندك كل اللى عندك من إمكانيات دى .. و لسة عايز تعيش زى ما هما عاشوا … دماغك بحكم سنك و حكم الزمن اللى إنت فيه .. كبيييييرة … إستغلها .. … و لو حيحصل فبيتكم شوية خناقات و زعل و حاجات من دى عالنتيجة .. كبر دماغك و طنش و عدى … أهلك حينسوا بعد شوية والله .. أهم حاجة إنت ماتبوظش نفسيتك و دماغك .. إنت فرصتك فى إنك تبتدى حياتك بنفسك و تعمل اللى إنت عايزه ماتوجدتش لأى حد فى التاريخ قبلك .. … فعلاً … يا بختك .. .. و الله أعلم .