بوست عميق شوية ! "بتاع يوم الجمعة الصبح بعد القهوة

بوست عميق شوية ! “بتاع يوم الجمعة الصبح بعد القهوة ده “

1- أى حد بيلعب جيم باستمرار عارف إن بعد مدة معينة .. لازم تغير روتين التمرين بتاعك و طرقه و تفاصيله . يعنى لو دايماً سبت بنش و باى , حد ضهر و تراى , إتنين رجلين , تلات كتاف و بطن … مثلاً يعنى .. بعد شهرين عالأقل .. لازم تغير و تجدد .. 2- أى تمرين فأوله بيبقى صعب جداً جداً .. و بيعقبه ألم شديد .. و بيألمك حتى بعد ما بتخلص تمرين و إنت بتحاول تنام حتى .. 3- التمرين دايماً بياخد منك وقت .. مستحيل تلاقى نفسك فيت و عضلات و نشيط .. و إنت برنس فنفسك عايش جوة التلاجة و مقضيها جوة الكومفورت زون بتاعتك .. 4- إصحابك ممكن جداً يكونوا قاعدين عالقهوة و بيكلموك .. و إنت بتطنش و تنزل تضرب 15 لفة فى التراك فعز التلج (ترو ستورى متكررة من زمااااان) . 5- مش حتاكل اللى بتحبه .. و الدنيا مش حتمشى على مزاجك .. و الأكل السخن الطازة ممكن تضطر تاكله تانى يوم لما تصحى .. لأنه إتعمل قبل معاد نومك بساعتين (ترو ستورى متكررة من زمااااان) . … و لكن بعد فترة : … 1- جسمك حيظبط و حتبقى عضلات و تحس إنك فرحان بنفسك . 2- حتتعود .. آه والله و حتدمن كمان التمرين و النشاط و الحركة و التعب .. 3- إصحابك اللى قاعدين عالقهوة حيحسدوك و حيحاولوا يرتبوا معاك 20 مرة إنهم ييجوا معاك التمرين .. و غالباً حيكسلوا و يكنسلوا . 4- مش حتنهج و إنت بتطلع 9 أدوار عالسلم . 5- حتلبس اللى على مزاجك و هدومك القديمة كلها حترجع على مقاسك . … الفكرة من البوست : … 1- نفس الكلام حرفياً ينطبق على تمرين دماغك و التعلم 2- أى حد (بيلعب جيم = بيتعلم ) باستمرار عارف إن بعد مدة معينة .. لازم تغير روتين ( التمرين = القراية و مجالاتها )بتاعك و طرقه و تفاصيله . 3- أى (تمرين=تعليم ) فأوله بيبقى صعب جداً جداً .. و بيعقبه ألم شديد .. و بيألمك حتى بعد ما بتخلص تمرين و إنت بتحاول تنام حتى .. 4- (التمرين=التعليم ) دايماً بياخد منك وقت .. مستحيل تلاقى نفسك (فيت و عضلات و نشيط= مثقف و ناجح و متعلم و ذكى) .. و إنت برنس فنفسك عايش جوة التلاجة و مقضيها جوة الكومفورت زون بتاعتك .. 5- صحابك ممكن جداً يكونوا قاعدين عالقهوة و بيكلموك .. و إنت بتطنش (و تنزل تضرب 15 لفة فى التراك فعز التلج (ترو ستورى متكررة من زمااااان) = تقعد تذاكر أو تقرا كتاب من 600 صفحة عن الجيم ثيورى أو الألجوريزمز بتاعت الجروب سايكولوجيز ) 6- مش (حتاكل اللى بتحبه=حتعمل اللى بتحبه) .. و الدنيا مش حتمشى على مزاجك .. (و الأكل السخن الطازة ممكن تضطر تاكله تانى يوم لما تصحى .. لأنه إتعمل قبل معاد نومك بساعتين (ترو ستورى متكررة من زمااااان) . = و الفيلم الطازة اللى لسة نازل السينيما حتضطر تشوفه بعدين بلو راى لأنه جه فمعاد مؤتمر إنت كان لازم تحضره ) . … و لكن بعد فترة : … 1- عقلك حيظبط و حتبقى مثقف و ذكى و ناجح و تحس إنك فرحان بنفسك . 2- حتتعود .. آه والله و حتدمن كمان التعليم و المذاكرة و القراية و التفكير .. 3- إصحابك اللى قاعدين عالقهوة حيحسدوك و حيحاولوا يرتبوا معاك 20 مرة إنهم يذاكروا معاك و غالباً حيكسلوا و يكنسلوا . 4- مش حتنهج و إنت بتواجه أى فكرة أو علم أو مشكلة ليها حل فدماغك . 5- حتشتغل اللى على مزاجك و معلوماتك القديمة كلها حيتم إحيائها فدماغك أوتوماتيك لما تتربط بمعلومات جديدة .

و الله أعلم