(خلي بالك من زيزي ) .. لسة مخلصه حالاً ..

(خلي بالك من زيزي ) .. لسة مخلصه حالاً .. إتفرجت عليه بالكامل في 5 أيام تقريباً .. أول مسلسل عربي أو مصري أتفرج عليه من أيام ما كنت في أولي ثانوي .. سنة 2003 تقريباً .. و فعلاً .. يستحق . … 1- في بوستات كتير عن ال ( ADHD ) كتبتها علي مدار التلات سنين اللي فاتوا بعد ما إكتشفت تشخيصي بيه .. و فعلاً فرحان و سعيد و مبسوط إن في حاجة نضيفة إتعملت بالشكل ده عنه .. لأنها حتساعد بشكل كبير جداً في تقريب المسافات بين الناس و بين فهمهم عنه . … 2- المثالين اللي إستخدمهم المسلسل في تقديم ال(ADHD) بنات ( طفلة , و شابة كبيرة ) .. الموضوع ليه أبعاد كتير تانية مع الذكور .. أنصح بشدة إنك لو مهتم .. إنك تقرا اكتر و بعمق عنه . … 3- ال(ADHD) مش مرض .. أو مجموعة أعراض لو إجتمعوا في شخص .. يبقي أوتوماتيك بيتشخص بيه .. إطلاقاً .. هو عبارة عن خلل في ميكانيزم إفراز العقل لهرمونين أساسيين ( دوبامين و سيروتونين ) .. و نتيجة لكدة بيحصل عدد معين من الأعراض الأساسية الواضحة .. و عدد تاني كتير جداً من الأعراض الثانوية مترتبة علي تفاعل الأعراض الاولي دي .. مع المجتمع و البيئة و التنشئة اللي الإنسان عاش فيها . … بمعني : … بشكل أساسي الإنسان اللي بيكون عنده الخلل الوظيفي ده .. بيكون غير قادر إطلاقاً علي التحكم في تركيزه بشكل إرادي .. فبالتالي طول الوقت عقله مشتت بين كل المتغيرات اللي حواليه .

فلو المتغيرات اللي حواليه دي كتير منها سلبي ( زعيق مثلاً , خناق كتير , … بيئة عنيفة يعني ) .. حيفضل طول الوقت مركز مع الحاجات دي بشكل أكبر بكتير من اللي حواليه .. و يتربي عنده تدريجياً مشاكل في التصرف و التأقلم مع عدم وجود ده .. و يبدأ دايماً يسعي إن يكون في حواليه البيئة اللي عقله إتعود يركز فيها ( من زعيق و خناق و عنف ) .. إما عن طريق إنه يخلق الزعيق و العنف ده بنفسه .. و يتخانق طول الوقت مع اللي حواليه بسبب أو بدون . أو عن طريق إنه يسعي بشكل مستمر للتواجد في البيئات دي ..

لكن لو المتغيرات اللي حواليه دي كتير منها كان إيجابي ( كتب مختلفة , لعب تنمية مهارات , أو ناس تجاوبه علي أسئلته الكتييييير جداً و فضوله اللا نهائي .. ) النتيجة حتكون بوادر ذكاء أعلي بكتير جداً من اللي حواليه .. لأنه طول الوقت مش مركز في حاجة واحدة إطلاقاً .. و قاعد بيدور علي أى شيء حواليه يدي عقله الدوبامين و السيروتونين دول .. مثلاً : فبيركز مع الساعة اللي بتدق طول الوقت .. و غيره ممكن مايكونش أساساً سامع صوتها .. لكن عقل اللي عنده ( ADHD) بنسبة كبيرة دايماً سامع صوت عقارب الساعات اللي حواليه .. و بيسأل طيب .. هي شغالة إزاي ؟ .. ليه ؟ .. طيب أنواع الساعات التانية إيه ؟ و هكذا .. و لما بيلاقي اللي يجاوبه .. و يشجعه علي أسئلته دي .. بيبقي طفل عنده 6 سنين .. بس ممكن يشرح لك بكل حب و إهتمام التروس اللي جوة الساعة شغالة إزاي 😂😂

المثال التاني ده .. كان أنا .. و أمي و أبويا ربنا يبارك لهم .. أنا مدين ليهم بكل الفضل إنهم إستحملوا كل ده مني .. بدون ما يكونوا عارفين يعني إيه (ADHD) .. هما فقط وفروا ليا بيئة مليانة هدوء و إستقرار … و كانوا بيشجعوني أسأل و يجاوبوني و يحسسوني إني شاطر لما أسأل أكتر و أقرا أكتر .. فكانت النتيجة إن عقلي قرن بين كل ما ليه علاقة بالكتب و المعلومات .. و بين إفراز الدوبامين و السيروتونين .. … … 4- الهيبرة الجسدية ( Hyper activity ) .. مش شرط من شروط المتلازمة دي .. إطلاقاً .. أنا كنت أهدي طفل في الفصل في إبتدائي .. و تخين .. و نادراً لما باجري في الفسحة .. و مابدأتش أنشط جسدياً و ( أهيبر جسدياً ) غير لما بقيت باتمرن بشكل مستمر أيام ثانوي و الكلية .. .. و السبب في ده مرة تانية هي الطريقة اللي العقل إتعود يخرج بيها الطاقة و النشاط الزائد اللي بيحصل لما فجأة يتفرز كم ضخم من الدوبامين و السيروتونين بدون داعي في عقل اللي عنده المتلازمة دي ..

بالنسبة ليا .. المخرج للطاقة دي كان : ال day dreaming و very VERY active imagination

لأني من صغري في المدرسة اللي كنت فيها .. تم الإطراء عليا إني قاعد هادي أيام حضانة مثلاً .. و حبيت إني يتقال ليا شاطر عشان قاعد مربع إيديا .. فبقيت باعمل ده كتير ..

بس عقلي فجأة كان بيظرب كمية ضخمة من الهرمونات المسئولة عن السعادة و النشاط و الهيبرة .. فماكنتش بفك تربيعة إيدي عشان الميس تقول ليا شاطر ..

بس عقلي كان بيسرح طول الوقت .. و يركز في كل حاجة حواليه و يتخيلهم بيتحركوا و يعمل أفلام و قصص و حكايات .. و النتيجة إني لحد دلوقتي فاكر شكل و ألوان توك البنات اللي كانوا معانا في الفصل و تسريحات شعرهم .. فاكر شكل التخت بكل تفصيلة من تفصيلات الخشب .. فاكر اللوح اللي كانت متعلقة لوحة لوحة .. شكل أكر الشبابيك .. و شنط زمايلي .. و جزمهم .. و لبسهم …

كل تفصيلة صغيرة و تافهة من دول .. عقلي إداهم كم ضخم من التركيز .. لأن كان عندي ( إفراط في الإنتاج من هرمونات التركيز … في غير وقته و مكانه ) ..

و دي نقطة مهمة جداً … الخلل مش إن الناس دول مش بيركزوا … لا .. الناس دي عندها خلل في الإنتاج .. يعني أحياناً .. تركيز ضخم جداً في غير مكانه و غير وقته .. و أحيان تانية .. صفر … إنعدام تركيز كامل فأى شيء . … … حابب فعلاً أشرح أكتر و أتكلم عن الموضوع أكتر .. بس غالباً حاعمل ده علي هيئة فيديو النهاردة أو بكرة إن شاء الله ..