تفاهتى ... و شوية إعترافات !

تفاهتى … و شوية إعترافات !

بوست فكرته إتكلمت عنها كتير لحد ما زهقت و ماكنتش عايز أكتبه .. بس لعل و عسى

للأسف ممكن البوستات اللى باكتبها أو بعض الحاجات اللى باشيرها تدى إنطباع إنى معظم الوقت حاضن كتاب تحت دراعى و لابس نضارة قعر كباية و قاعد قدام 4 شاشات كمبيوتر منورين بسطور خضرا على خلفية سودا .. و فى موسيقى تصويرية thrilling بتعزف فى الخلفية . .. فى الحقيقة إن ده أبعد ما يكون عن الحقيقة … هما شاشتين بس مش أربع شاشات حالياً . .. إعتراف (1) : أنا فعلاً باتضايق لما حد بيقوللى “إنت ضاغط على نفسك جامد فى الشغل ” .. “إن لبدنك عليك حق ” .. ” إنت لازم تتعلم تأنتخ شوية و تريح ” . .. باتضايق لأنى حاسس إن جزء كبير جداً من وقتى أساساً .. باقضيه فى تفاهات .. من زمان . و لقيت إنى معنديش القدرة اللى موجودة عند ناس (أعرف منهم كتير فعلاً ) .. إنهم يفضلوا شغالين على نفس الشىء تلات أو أربع ساعات متواصلين !! .. أنا لو فضلت قاعد عالمكتب أكتر من 20 دقيقة أساساً يبقى فى حاجة غلط ! .. و هنا .. كان لازم آخد قرار .. من زمان .. كان لازم أقرر .. إذا كان لابد من التفاهة .. إذن فلتكن تفاهة بناءة … .. يعنى إيه ؟! أول ما بدأت أكون واعى لكم الوقت اللى باضيعه (زمان أيام 2005-2006).. قررت إن طيب .. إذن .. لما أحب أبطل مذاكرة مثلاً .. بدل ما أتفرج على فيلم أو مسلسل عربى .. حاتفرج على حلقة من مسلسل (friends ) ..و كنت فعلاً مابطيقهوش فى الوقت ده .. و السبب كان إنى باسمعهم بيضحكوا على حاجات أنا مش فاهم منها أى حاجة !! .. .. كنت لسة طالع من ثانوى عام مصرى بإنجليزى تعليم مصرى .. و مش فاهم أى حاجة .. و الترجمة العربى كانت بتستفزنى أكتر ما بتضحكنى ! .. إعتراف (2) : أنا كنت باكره friends !!! … بس لما قررت إن ده هو حيبقى وقت تفاهتى .. الحاجة اللى حافصل بيها من أياً كان الشىء المفيد اللى المفروض إنى باعمله .. نزلت بدل الترجمة العربى .. ترجمة إنجليزى .. و بدأت أتفرج عليه .. مرة .. و تانية .. و عاشرة .. … و بعدين كان الأنيمى .. (فى بوست كامل كنت كاتبه عن الجزء ده فتكوين عقلى حاعمله شير فأول كونت ) . و تدريجياً .. أصبح الإنجليزي بالنسبالى أسهل ثم أسهل .. ثم أسهل .. لحد ما حالياً أنا باكتب بالإنجليزى الأول و بعدين أترجم لعربى معظم الوقت .. لأنه فعلاً أصبح أسهل بالنسبالى من العربى بعد فترة قصيرة جداً !! … و عندها .. لقيت إن عالم كامل من التفاهة إتفتح ليا !

• ليه أسمع نجوم إف إم .. لما ممكن أسمع NPR ( متابعهم من سنة 2008 تقريباً )
• ليه أتفرج على برامج توك شو مصرى … لما ممكن أتفرج على the daily show , the colbert reprot , the late show , …
• ليه أتفرج على snl بالعربى .. لما ممكن أشوف الأصلى ؟!! .. الكام نقطة دول مافيهومش خاااالص موضوع عقدة الخواجة .. و الأجنبى أم العربى و الكلام الفاضى ده .. ببساطة .. الموضوع فرق إنتاج و جمهور مخاطب . .. يعنى مثلاً برنامج زى last week tonight بتاع john oliver .. عشان فعلاً تضحك على جزء كبير من النكت و السخرية اللى فيه .. لازم يكون عندك ثقافة عالمية محترمة .. و آى كيو شوية كبير .. لأنهم بيحترموا جداً عقل جمهورهم .. لأن جمهورهم بيسعى لأرضاءه عدد ضخم من المؤسسات اللى بتدفع مبالغ طائلة عشان تعمل محتوى ينافس . … لكن البرامج المشابهة بالعربى أو المصرى للأسف .. فهى عبارة عن … آسف .. مش عايز أتكلم عنهم فعلاً .. … نفس الموضوع بالنسبة للأفلام و المسلسلات .. مش بس بقى الأمريكى .. لأ .. أنا باتكلم عن أى ثقافة تانية بتنفذ نفس الشىء .. تحترم عقل المواطن اللى عايز يستمتع بشوية تفاهة .. … نفس الموضوع تقدر تفهمه لو شبهناه بالأكل .. إنت تقدر تدفع 10 جنيه .. و تاكل وجبة دسمة جداً جداً و تحلى كمان .. من عند أى عربية كبدة فى الشارع . أو تدفع 1000 جنيه عشان تتعشى عشوة نضيفة فمطعم نضيف و قاعد جنبك ناس حاطين برفيوم و محترمين المبلغ اللى هما دفعوه و اللى إنت دفعته .. و مصدقين إنك طالما تقدر تدفع 1000 جنيه فوجبة .. يبقى تقدر تدافع عن آدميتك … فمحدش بيحاول يعتدى عليها .. .. لكن على العربية بتاعت الكبدة فى الشارع .. إنت لازم تعبر عن قدرتك على حماية آدميتك بطرق تانية ( صوت عالى , مظاهر بلطجة , جسم عضلات , … ) . … … نفس الشىء بالنسبة لوسائل الترفيه = التفاهة .. تقدر إنك تروح لناس مابتحترمش آدميتك و لا عقلك .. بس حاتشبعك و تخليك تحلى كمان .. أو ناس مجبرة تحترم آدميتك و عقلك … و مجاناً كمان .. .. أيون مجاناً .. فى طبعاً وسائل غير شرعية كتير عشان تنزل أفلام و برامج و مسلسلات .. بس كل الحاجات اللى ذكرتها فوق دى متاحة مجاناً و على اليوتيوب .. … … فى دوشة طبعاً كتير حالياً على الوضع الحالى فى المكان الحالى اللى ناس كتير من اللى عندى عايشين فيه .. .. محدش قالك أقعد إتفرج عليهم .. إرتقى بعقلك .. مش حيعرفوا يوصلو لك . .. و الله أعلم .