شوية كلام عن شوية كلاب

شوية كلام عن شوية كلاب . … 1- لو رجعت بتاع 12 سنة في بوستاتي 😅 .. لأيام ما كنت في الجيش .. حتلاقيني كاتب عن ( قمر - moon ) .. كلب أبيض بالكامل ناصع البياض .. كان هو و عيلته من كلاب الصحراء البرية .. أصدقائي و ونسي و صٌحبتي .. في ليالي كتير نمتها وسطهم في وسط الصحرا حرفياً .. و كاتب تفصيلياً إزاي إن ( قمر ) ده بالذات .. صحّاني من عز النوم في ليلة و هو بياكل حاجة سمرا من تحت دماغي حرفياً .. و لحد النهاردة ما زلت مش متأكد هي كانت عقرب ولا تعبان ولا حاجة تانية .. لكن اللي فاكره هو إن ديلها كان طالع من بٌقّه بعد ما خطفها من تحت دماغي بالظبط .. و إن أكلي كنت باقتسمه معاه هو و عيلته .. و بعد ما أقرا آية الكرسي .. كنت بامدد جنبهم .. و أنا متطمّن بفضل الله و أنام . … 2- أنا باحب جداً الجري بعد صلاة الفجر .. قبل الشروق بدقائق .. اللي هي الفترة اللي بتكون الكلاب في عز نشاطها الصبح بدري .. و أكيد إنت عارف إنك لو بتجري .. و كلب شارع شافك .. حيقرر إن هدف حياته الأول و الأخير هو إنه يجري وراك 🤣 … حتي لو كنت بتجري ب عجلة أو عربية .. لكن .. عارف إيه اللي المفروض تعمله ساعتها ؟ ( لو إنت مش عايزه يكمّل تمرينة الجري بتاعت الصبح جنبك يعني 🤣 ) ؟ ببساطة .. أقف .. و إتطمّن و إهدي .. بل و قرّب عليه بهدوء لو حابب .. حتلاقيه هو وقف .. و هدي .. و إتطمّن .. و زهق منك لأنك مش عايز تلعب و تجري معاه .. و سابك و مشي .. … 3- أنا من النوعية اللي لما بتشوف تجمّع كلاب في الشارع .. باروح عليهم .. مش باهرب منهم .. و بابقي متطمّن و هما حواليا .. و لو شكلهم نضيف بالعب معاهم و أحسس عليهم عادي جداً .. … 4- تقريباً مافيش كلب حراسة في أى مول رٌحته في مصر .. إلا و نزلت من العربية لاعبته و حضنته .. و الكلاب الإتنين بتوع مول سان ستيفانو دول بالذات .. باحبهم جداً جداً جداً . … 5- أنا شفت متوحشين كتير فعلاً .. و لكن مش كلاب .. لا .. بشر .. و متوحشين أطفال .. تم تدمير فطرتهم الطبيعية السليمة .. و تشجيعهم علي إيذاء حيوانات بريئة .. الجري وارهم .. تخويفهم .. حدفهم بالطوب و العصيان ك وسيلة من وسائل الترفيه !!! .. و بيسابقوا بعض مين اللي حيعرف يؤذي الكلب أكتر . … 6- مشهد متكرر للأسف .. إني كالمعتاد فأغلب الشوارع بامشي علي الجزيرة اللي في النص اللي مزروعة و فيها شجر .. و ألاقي طفلين أو أكثر بيحدّفوا العصافير اللي نايمة !!! و قسماً بالله كذا مرة وقفتهم و بدأت أسألهم : ليه كده يا حبيبي ؟! يرد : بنلعب يا عمو !! أسأله : إيه الهدف يعني ؟! .. حتاكل العصافير اللي ممكن تقع مثلاً ؟! .. يرد : لا .. بنلعب بس يا عمو !! . النوعية دي باشوفها بتمارس نفس العدوانية و الشراسة مع القطط و الكلاب … و بيكبروا .. و يمارسوا نفس العدوانية و الشراسة مع البشر الأضعف منهم .. و زوجاتهم أو بناتهم و أولادهم . … 7- الناس بتخاف من الكلاب ليه ؟! لأن ده عرض واضح جداً جداً جداً ضمن أعراض كتير لأحد الأمراض المتأصلة في الإنسان حالياً .. و هو مرض الإنفصال عن الحياة الطبيعية .. . إنت عايش في مدينة صناعية .. كل حاجة فيها صناعية .. بتخاف من الزرع و الحشرات و الحيوانات .. بتخاف من كل حاجة طبيعية ربنا خلقها لك و سخرها لك .. و عايش حياة وسط أضواء صناعية و فلوس صناعية و أكل صناعي .. ضمن وهم إنك مٌسيطر علي الحاجات دي .. لكن في الحقيقة هي اللي مسيطرة عليك بالكامل . . ف بدل ما تعيش حياة طبيعية حر .. عبد لله وحده .. و ربنا سخّر لك طبيعة و حيوانات و حشرات .. لا .. تعيش حياة صناعية .. عبد لفلوس و وظيفة و سباق وهمي عشان تشتري بلاستيكات .. و تخاف من الطبيعة و كل ما فيها . و تطلّع عليها القهر اللي بتحس بيه ك عبد . … 8- يعني أنا بافضل أتسائل كتير والله .. الطفل اللي يؤذي هرّة وليدة لسة بتنونو بصوت يدوّب قلب أعتي جبارين الأرض .. ( مشهد لسة شايفه إمبارح والله العظيم ) .. الطفل ده .. بيعمل كده إزاي ؟! .. و ليه ؟! .. التفسير المنطقي الوحيد .. إن الطفل ده بينضرب في بيته .. و بيتفرج علي برامج سادية ( رامز و أمثاله ) في رمضان .. و بيشوف أهله عايشين حياة مٌختلة تماماً .. ف بالتالي .. بيحس إن طبيعي إنه يمارس سطوة و قوة و تجبّر علي مخلوق برئ زي الهريرة دي . … 9- الخوف المُفرط من الحيوانات المنتشر علي الفيسبوك ده .. بيخليني أتسائل .. هل الناس المرعوبة دي .. عندها قدرة تامة في التحكّم في باقي جوانب حياتهم ؟! . . يعني .. إنت خايف إن الكلب البرئ اللي ماشي جنبك في الشارع يقرر يعضّك من #$^ فجأة مثلاً .. و إنت مش فاهمه .. و مش فاهم إحتياجاته ولا هوهوته ولا قادر تتوقع أهدافه و … . طيب .. هل إنت مش خايف من سواق التوكتوك اللي جاي من بعيد ده إنه يخبطك فجأة ؟! .. هل مش خايف من الطفل اللي عنده 13 سنة و سايق تروسيكل .. و حاطط سيجارة في بٌقة و سيجارة تانية ورا ودنه .. و شكله مٌسجل و سوابق أساساً .. مش خايف منه يخبط فيك ؟! … يسرقك ؟! .. يتحرش بيك ؟! . هل مش خايف من شخص ذو سٌلطة أو ذو قوة بلطجة إنه يعتدي عليك فجأة لأنك ضد مصلحته ؟! . هل مش خايف إنك تروح الشغل .. تلاقي مديرك بيخصم منك ؟! .. تلاقي شغلانتك نفسها أصبحت ملهاش معني ؟.. أو تلاقي إن مرتبك بعد ما إترقيت بعد سنين و سنين تعب .. أصبح أقل من قدرتك علي شراء تانك ممتلئ بالبنزين لعربيتك اللي حكّها تروسيكل و خبطها توكتوك و إتاخدت فيها مخالفة عشان مش لابس الحزام ؟! … 10- الخوف المٌفرط المنتشر علي السوشيال ميديا من الحيوانات .. ده فوجهة نظري مٌكافئ بشكل مباشر لنفس الدوافع النفسية اللي تخلّي طفل عنده 6 أو 7 سنين يؤذي قطة وليدة .. و بعدين يطلع يجري و يعيط لما يلاقي القطة الأم بتبخ فوشه أو تحاول تخربشه . … 11 - الكلاب في الأغلب عشان تفهم دماغها .. تخيل طفل مهايبر عنده سنتين أو 3 بالكتير أوي .. هو مايفهمش عواقب إنه يطلع يجري بسرعة علي بنت في إبتدائي أو إعدادي مثلاً .. هو بيكون شايف إنه رايح فرحان يلعب معاها .. هي لما تتصرّف بخوف لأنها إتربّت في مجتمع علمها تخاف منهم .. هو كمان حيتصرّف بخوف زيها .. و الإتنين في حالة الخوف دي بيكونوا في خطر علي نفسهم و علي اللي حواليهم . … 12- و طبعاً .. لازم حتلاقي ناس من نفس نوعية ال ( ترولز - trolls ) اللي إتكلمت عنهم من كام يوم .. الناس اللي يحبّوا الدوشة و الخناقات و التريندات .. و يحبّوا يعملوا تحزّبات و فرق و فرق مٌضادة .. و يطلعوا أسامي علي أى حد بيتكلّم كلام مختلف عنهم إنه ( كلبجي أو كلبجية ) .. ده أسلوب قميء .. نفس الأسلوب اللي بيستخدمه الراجل البرتقاني العب#ط اللي ماسك أشهر جيش في العالم .. إنه يطلّع أسامي علي الناس اللي هو مختلف معاهم .. و يعمل دوشة و هيصة و زيطة .. نفس شغل الأطفال اللي في إبتدائي اللي بتجري تؤذي حيوانات بريئة .. النوعيات دي كلها .. أقول لهم نفس الكلام اللي قلته في نهاية بوست ال (ترولز ). .. و هو : إتقي الله . … 13- الخوف مرض عقل يٌغتفر لو فهمته .. و فهمت حدوده .. و بيتعالج بسهولة جداً .. لكن التلذذ بالأذي .. و تفريغ طاقة القهر اللي جواك ضد مخلوق برئ .. ده مرض نفس لا يٌغتفر .. و علاجه صعب جداً جداً جداً .. مش مستحيل .. و أول و أهم خطوة فيه هو : إدراكك إنك علي خطأ . … و الله أعلم .