عندي أسئلة كتييييير جداً تٌحيط بمهنة طبيب الأسنان .. فمصر

عندي أسئلة كتييييير جداً تٌحيط بمهنة طبيب الأسنان .. فمصر خصوصاً .. و لكن قد يكون أهمّها هو : هل بيقدر يتأقلم أو يعتاد كم الألم اللي بيحس بيه البشر تحت إيديه ؟! .. باكتب البوست ده ب نص بٌق منمّل .. و نٌص بيتألّم .. و صٌدااااااااااااااااع .. بالرغم من إني محقون ب 5 حقن بنج موضعي .. و واخد جٌرعة مٌسكنات ضخمة .. و في المٌعتاد أنا نادراً جداً جداً ما باستخدم المٌسكنات عموماً .. و بفضل الله درجة تحمّلي لآلام من أنواع مٌختلفة كتير جرّبتها علي مدار حياتي .. ( إصابات عضم كتير , جروح بمختلف الأنواع , صٌداع و إرهاق … حتي لما مسكت مكواة اللحام في الكلية زي القلم من الجزء اللي مش معزول .. و كانت النتيجة إن صوابع إيديا اللمين بالكامل إتشووا 🤣 .. برضو ماخدتش مٌسكنات . … و لكن .. و لكن ألم الأسنان .. كابوس من نوع آخر .. النهاردة المٌحيطين بيا بالكامل فعلاً كانوا بدأوا يقلقوا من إني أفقد السيطرة علي نفسي و أبدأ أكسّر حاجة في العيادة مثلاً .. دي مش أول مرّة أضطر ل مٌعاناة حشو العصب .. بل إني إضطرّيت و العياذ بالله إني أقوم بعمليات في ضروسي ( حشو و حشو عصب و خلع ) في الجيش .. بعد ما ( حرفياً ) قرقشت زلط كتير 🤣 . . و لك أن تتخيل شغل أسنان .. في الصحراء .. في الجيش .. لعسكري .. فأيام كان مصر كلها ناقص فيها أساسيات الشغلانة و التخدير و الكلام ده .. … و لكن النهاردة فعلاً .. كان مؤلم جداً .. أنا أساساً باتألّم بقالي فترة طويلة أوي .. و مأجّل إني أعمل شغل في ضروسي .. خوفاً من الألم ده .. لحد ما الأربع جوانب في بٌقّي أصبح في كل جانب فيهم ( فوق و تحت ) ضرس يتطلّب تدخّل طارئ .. و الألم كان بيخليني أتنطط ( حرفياً ) فجأة لو حاجة لمستهم .. … هو أنا قلت لك إني مٌدمن لبان ؟! 🤣🤣 .. العواجيز أمثالي يعرفوا مثلاً سير أليكس فيرجسون ( مدرّب مانشستر يونايتد الأسطوري ) .. أبو لبانة ضخمة جداً .. أهو أنا بقي لبانتي بتكون في المٌعتاد أضخم .. يعني لازم يبقي فبقّي 6 لبانات كلورتس مثلاً .. و أفضل أمضغ فيهم بعنف و غضب و توتّر .. و كل ما ركّزت في شغلانة أو حاجة باعملها أكتر .. كل ما مضغت بعنف أكتر . و النتيجة ؟! الحشو اللي في ضروسي حرفياً طلع من الضرس بسبب اللبان .. أكتر من مرة .. و بعدين يلزق في اللبانة .. و مع سرعة المضغ و أنا مش واخد بالي .. يعمل ضربة مباشرة في ضرس تاني يكون مكشوف و حشوه واقع .. و أقوم أتنطط أنا من الألم . … لكن أكيد في حاجة بتتغير في طبيب الأسنان اللي بيواجه أمثالي .. اللي هو طول الوقت الناس بتصرخ من الألم تحت إيديه .. لكن هو لازم يفضل متزّن .. مترابط الجأش .. مركّز .. .. باقي الأطبّاء كلهم بيتعرّضوا أعتقد لنفس الشيء .. و لكن بقدر أقل بكتير جداً من طبيب الأسنان .. .. ده أكيد بيغيّر حاجة جوّاه .. قد بعد شوية .. و بعد ما القهوة اللي شربتها تعمل مفعول و الصٌداع يخف .. أعمل سيرش علي إحصائيات الكلام ده .. و أشوف تأثير المرضي علي طبيب الأسنان ( نفسياً و عصبياً ) .. لكن دلوقتي .. حرفياً باكتب الكلام ده ك نوع من أنواع تفريغ الضغط للتعامل مع الألم . … فحدود معلوماتي إن في أمريكا بيبقي في تخدير بأوكسيد النايتروس .. اللي هو ( غاز الضحك ) .. و ده بينيّم المريض بالكامل .. النهاردة الدكتورة قالت لي إنه مش مسموح بيه فمصر .. تقريباً قادر أتخيّل و أفهم ليه هو ممنوع .. … لكن .. ما زال السؤال الأساسي هو : إنتوا كويسين ؟! ( ك دكاترة أسنان يعني ) .. لسّة طبيعيين ؟! .. ماتحوّلتوش ل ساديين يعني بتستمعوا لما تشوفوا إنسان بيتألّم ؟ 😅 .. .. ربنا يكون في عونكم .. و آسف لكم علي كمية الزعيق و الصريخ و التوتر اللي بتطلع من أمثالي 😅 . . و الحمد لله علي كل لحظة بتعدّي علي الإنسان بدون ألم . .. و الله أعلم .