البوست ده غالباً حامسحه بكرة .. أو بعد 24 ساعة

البوست ده غالباً حامسحه بكرة .. أو بعد 24 ساعة إن شاء الله .. عشان أسهّل علي أى حد بيتابع سلسلة بوستات ( مارتين لوثر ) إنه يلاقيهم ورا بعض .. و لكن .. قبل ما أنام حالياً إن شاء الله .. خليني أشرح إجابة سريعة علي السؤال ده قدر إمكاني . . تعرف ( فوريير و لابلاس ) ؟! 🤣 معلش .. أنا آسف لو إنت مادرستش رياضيات متقدمة شوية .. أنا مش باتنطط عليك والله .. و لكن الإجابة فعقلي فعلاً بتبتدي دايماً بالموضوع ده . و برضو آسف لو إنت درست رياضيات متقدمة .. و الكلمتين دول فكروك بذكريات صعبة 🤣 . . أنا مهندس إتصالات و إلكترونيات ( دي هي دراستي الأكاديمية ) .. و ده معناه إني درست رياضيات متقدمة .. و منها فرع إسمه ( معادلات تفاضلية متقدمة - Advanced Ordinary Differential Equations ) . و دي عبارة عن معادلات رياضية مٌعقدة .. معقدة جداً .. لدرجة إن مالهاش حل 🤣🤣 .. . أو للدقة ( هي بتبقي مالهاش حل .. طول ما إنت باصص لها من وجهة نظر معينة .. أو بالمٌصطلح الرياضي : باصص لها في مجالها - Trying to solve in it’s original domain ) . . فبالتالي .. ناس طيبين ( زي واحد إسمه فوريير - Fourier , و واحد تاني إسمه لابلاس - Laplace ) عملوا حاجة إسمها ( محولات - Transforms ) . وظيفتهم إيه المحولات دي ؟! وظيفتهم إنك بتحول المعادلات المعقربة المٌعقدة اللي مالهاش حل دي .. من مجال .. ل مجال تاني خالص ينفع يتحلوا فيه .. و بعدين تحول الحل ده .. من المجال التاني خالص .. للمجال الأولاني 😅 .. و تستخدمه هناك عشان تطلع حل مناسب 😅 . . شفت الموضوع بسيط إزاي 🤣؟! دي تقريباً جزء أساسي من رياضيات أولي و تانية و تالتة كلية .. … المهم .. أنا عمري ما نسيت الطريقة دي في التفكير .. إن حاجات معينة في الحياة .. لو بصّيت لها من وجهة نظر .. تبدو مالهاش حل .. مالهاش حل إطلاقاً .. تدعو لليأس بكل الوسائل و الطرق .. و تخليك عايز تكتب بوستات مٌلخصها هو : ( مافيش فائدة علي رأي سعد زغلول ) 😅 . لكن .. لو حاولت تبص للموضوع من وجهات نظر مختلفة .. و تاخد المشاكل دي في ( مجال - domain ) مختلف .. قدر تقدر تحلها هناك .. بالظبط زي فوريير و لابلاس . … مثلاً .. مشكلة زي الغباء المٌستشري في السواقة في مصر !! مشكلة .. قد تبدو مستحيلة الحل تماااااااااااماً .. إزاي تقنع سواق ميكروباص إن وقوفه في نص طريق تقاطع .. بحيث إنه حرفياً قفل الشارع علي أربع إتجاهات عموميين النهاردة عند فندق توليب عالكورنيش قٌدامي في إسكندرية .. عشان يركب واحدة شاورت له !!! .. مع إنه كان ممكن يطول أمتار بسيطة لحد ناصية الرصيف المقابل .. و يقف براحته و يعمل كل اللي علي مزاجه .. . إلا إن الغباء المستوطن .. خلّاه شايف إن تصرفه ده طبيعي .. بل إن البنت اللي كانت بتركب كانت متضايقة إني و باقي العربيات من 4 إتجاهات مختلفين بنضرب كلاكسات !!!!! . تحل المشكلة دي إزاي ؟! . مستحيل يكون عن طريق إرشادات مرورية زيادة .. و صعب جداً يكون عن طريق تعيين عسكري مرور في كل شارع و ناصية .. . المشكلة دي مشكلة : وعي بالمصلحة الخاصة للإنسان ضد المصلحة العامة للمجتمع . . مشكلة لها جذور في مجالات ( نفسية , إقتصادية , دينية , إجتماعية , تاريخية , … ) . . و المجالات دي كلها .. فيها حلول للمشكلة دي .. حلول ( قصص و دروس و معلومات ) .. تخلي الإنسان يفهم تدريجياً إنه مش عايش لوحده في الأرض .. يفهم إنه لو دلوقتي طغا أو بغي علي مورد مشاع عشان يرضي مصلحته الفردية علي حساب مصلحة المجتمع الجماعية .. ده بكرة حيؤدي لهلاكه .. . و لو الإنسان فهم ده ( من خلال مجال ديني مثلاً ) .. عقله لوحده حيعرف يترجم ده لمجال ( زي المرور و السواقة ) . … فبالتالي .. كل ما شرحته و كتبت عنه علي مدار 15 سنة أو أزيد تقريباً من وجودي علي الإنترنت .. فوجهة نظري .. هو كله عبارة عن محاولة لحل بعض المعادلات الأساسية .. و لكن من خلال ( مجالات ) مختلفة . . لما شرحت عن بزنس و شغل و فلوس من 7 سنين مثلاً ( من خلال معلوماتي المتواضعة ) .. ده كان فوجهة نظري .. محاولة لمساعدة الناس تحصل علي حرية مادية .. و إن ده لو حصل .. حيساعدهم يشوفوا حاجات كتير في العالم بشكل أوضح .. . لما شرحت عن علم نفس ( من خلال معلوماتي البسيطة جداً ) .. ده كان فوجهة نظري .. محاولة لمساعدة الناس تفهم إزاي إن الحرية المادية مش شرط عشان يبدأوا يشوفوا حاجات معينة في العالم بشكل أوضح . . لما شرحت تكنولوجيا .. ذكاء إصطناعي .. و حتي الجيمينج ( و كتبت عن ده تفصيلياً أيامها ) . . هو برضو نفس السبب اللي باشرح عشانه بعض المراحل التاريخية حالياً .. … و فعقلي شخصياً .. كل الحاجات دي .. طول الوقت .. متصلة ببعضها تماااااااااااااماً .. بل إن .. لو فأى لحظة لقيت إن تسلسل أحداث تاريخي مثلاً .. غير منطقي من وجهة نظر علم نفس .. بابدأ أراجع الجزء ده ب دقة أكبر .. و أقرأ عنه من مصادر أكتر بكتير .. أو مثلاُ ( زي تسلسل الأحداث بعد إختراع الطباعة .. و إزاي ده أدّي لثورة صناعية في أوروبا .. أدّت لإحتلال أفريقيا بالكامل بعد كده ) .. *** ( و بالمناسبة .. غالباً سلسلة بوستات كاملة عن تاريخ أفريقيا حابدأ أكتبه قريباً .. لأن قوة أوروبا الحربية و العسكرية .. و الإقتصادية حتي يومنا هذا .. مٌعتمدة بالكامل علي أفريقيا ) و تاريخ أمريكا بالكامل ( بما فيه قصة مارتين لوثر كينج ) .. معتمد بالكامل علي تاريخ أوروبا .. و تاريخ إستعباد شعوبها ( خصوصاً المسلمين ) . .. كل الحاجات دي .. في عقلي .. طول الوقت بيتم التساؤل فيها من خلال وجهات نظر ( هندسية , فيزيائية , إقتصادية , فلسفية , علم نفس , … ) قبل حتي ما أدور علي القصص التاريخية . . يعني مثلاً .. إمبراطوريات أفريقيا بالكامل ( و كان في كتير بالمناسبة ) .. حصل فيهم إيه ؟! .. فين تاريخهم ؟! .. ده سؤال ماتعرفش تجاوب عليه إجابة كاملة إطلااااااااااقاً .. من خلال بحث تاريخي فقط .. . و فعقلي .. ده مرتبط مباشرة ب ذكريات من أول معرض تكنولوجيا زرته في حياتي سنة 2008 .. و فضلت واقف قٌدام جناح كامل ل شركة كنت أول مرة أقرا إسمها ( lockheed martin ) .. و دي أحد أكبر شركات تكنولوجيا الأسلحة في العالم . … أما السبب إن دماغي عندها القدرة إنها تشوف كل الحاجات دي متصلة مع بعضها طول الوقت بسهولة .. ف ده .. لأني عندي ( ADHD ) .. الحاجة اللي شرحت و إتكلمت عنها في بوستات كتيييييييييييييييييير جداً .. و إنها ( ميزة و قوة ضخمة جداً ) قبل ما تكون ( سبب معاناة ) . . ف الناس اللي زيي .. مش بيبذلوا مجهود تقريباً في إن عقلهم يشوف علاقات بين كل حاجة و أى حاجة .. و ده لأن عقلهم دائم التشتت بين كل شيء حواليهم منذ أول لحظة في طفولتهم . . و لو إتعلم الإنسان ال ( ADHD ) بدري .. إزاي يحول التشتت ده .. لأسئلة .. و أهله كانوا رائعين زي أهلي ربنا يبارك فيهم .. و شجعوه يسأل أكتر .. و يقرأ أكتر .. عند مرحلة معينة .. بيتعلم مبادئ البحث العلمي التجريبي المنطقي .. اللي تساعده يفرق في عقله بين العلاقات الحقيقية .. و بين الأوهام ( اللي بيعيش فيها ناس كتير نتيجة لجهلهم بمبادئ العلوم عموماً ) . … و كفاية كده دلوقتي .. و تصبح علي خير .. و الله أعلم 😊 . ** لينك صراحة كالمعتاد في أول تعليق .