من فترة بسيطة كنت باشرح قصص مشابهه لإتنين شغالين معايا

من فترة بسيطة كنت باشرح قصص مشابهه لإتنين شغالين معايا .. إن للأسف … و للأسف جداً كمان .. نسبة كبيرة من عقود الشغل في مصر ( و خصوصاً المؤسسي ) .. مش بيكون الهدف منها هو ” تظبيط ” الشغل .. و لكن بيكون الهدف منها ” ربط ” الصنايعي اللي شغال من رقبته .. و التحكم فيه . ( صنايعي هنا مقصود بيها صاحب الحرفة أو الموهبة : مصمم , مهندس , مطور , … ) . .. فخ ضخم بيقع فيه الجناير الموهوبة ( الصنايعية الشباب اللي لسة متخرجين ) .. إنهم يتزغلل عينيهم مبالغ معينة ( أو أحياناً أسامي مشهورة لمؤسسات معينة ) .. و يمضوا عقود .. و بعد ما زهوة الفلوس الأولانية تروح … أو بعد ما يكتشف إن إسم المؤسسة المعينة دي .. مجرد إسم بس .. و إنها مجرد سبوبة بيتم إدارتها بشكل غلط .. بحيث إن شوية رؤوس بس للسبوبة هما اللي يكسبوا . بيبدأ يندم و يحاول يدور علي أى وسيلة يطلع بيها من العقد بتاعه .. بس أحياناً كتير بيكون فعلاً مش ساهل . .. نصيحتي للشابين الجمال دول .. و هي نفس النصيحة اللي باكررها لأى حد بيسألني … هي : 1- إتعلم إنجليزي .. كويس .. 2- إتعلم تناقش و تظبط إتفاقات شغلك .. بنفسك .. بحيث إنك تقدر تخرج برة سوق مصر و ماتكونش محدود بالنوعية دي من العقلية المحلية للأسف .