فى مسألة فلسفية مشهورة بتقول

فى مسألة فلسفية مشهورة بتقول : لو شجرة فوسط غابة كبيرة وقعت و ماكنش فى حد حواليها يسمعها أو يشوفها بتقع .. هل هى وقعت فعلاً ؟ .. .. (2) الساعة دلوقتى 4.10 فجراً .. مش جايلى نوم إطلاقاً .. و شكل دورة نومى حتبوظ تانى و أضطر أعدلها من أول و جديد .. فتحت الفيس .. و شفت نوتيفيكشنز كتيييير و رسايل كتييير “ححاول أرد عليهم كلهم ” إن شاء الله ” .. بس شفت فى النيوز فيد (ما هو غير علمى أو تقنى ) ما ملخصه التالى :

• موضوع هارفى واينستين وصل للوعى المصرى (بعد أسبوع من إنتشار الخبر فأمريكا تقريباً ) .
• بنات كتير بدأت تستعمل هاشتاج #meto عشان تحكى عن اللى حصل لهم .
• ناس كتير فى السجن كاتبين قصص تقطع القلوب .
• ترامب على تويتر بتاعه لو قريته تحس إنه عبقرى عصره و أوانه و هدية الكون لأمريكا
• تويتر بتاع كل الأمريكيين إصحابى التانيين و المشاهير يوضحلك إن ترامب أسوء شيء حصل لأمريكا و إنه معتوه و فاكنج مورون على رأى ريكس تيلرسون .
• نفس النقطتين اللى فاتوا بس هنا :) :)
• و بعدين بوستات شخصية كتير معتادة . … (3) لو طفيت الأجهزة اللى عندى فى الشقة كلها … و أرهفت السمع بشدة … حاسمع دوشة كتير من الشارع . .. هى بالنسبالى دوشة .. بس بالنسبة لحد تانى .. هو ده الصوت اللى هو عايز يسمعه .. و صوت أجهزتى أنا بالنسباله .. دوشة . … (4) و أنا راجع فى الشارع إمبارح .. عربية عطلت قدامى و نزل منها إتنين طلبوا منى أزق العربية معاهم .. بكل سعادة زقيت العربية معاهم لحد ما دارت … يا ترى فى كام عربية فى الشوارع اللى حواليا بتعطل بس مابشوفهاش ؟ .. و يا ترى بيلاقوا حد يزق معاهم ولا لا ؟! … (5) فنزويلا , بويرتوريكو , كوريا الشمالية , الصين , أوكرانيا , اليونان , نيجيريا , الكونغو , مصر , … . يا ترى كام عربية بتعطل و بتحتاج زقة ؟! … و يا ترى بيلاقوا حد يزق ؟ … (6) ماذا لو كانت العربية اللى عطلت و اللى زقتها إمبارح .. مسروقة و اللى راكبنها سارقينها و لو كنت سبتها عطلانة كان صاحبها لحقهم ؟! … (7) الجهاز عندى بيرندر بقاله 6 ساعات و فاضل له 4 تانيين … واضح إنى ححتاج أجيب جهاز كمان . … (8) أنا فعلاً باسأل !!