ممكن نتكلم بصراحة ؟ .. آخر مرة فكرت .. كانت

ممكن نتكلم بصراحة ؟ .. آخر مرة فكرت .. كانت إمتى ؟! … أحد الأنشطة الذهنية اللى باحب أمارسها جداً .. هى إنى أتخيل إني عايش فعصر مختلف .. بالكامل .. و باستمتع لما أتخيل مثلاً لو أنا عايش فعصر إنسان الكهف .. حابقي عايش إزاى ؟! يومي بالكامل .. ال24 ساعة … حاعمل فيهم إيه ؟ … إتخيل معايا .. بكل تفصيل قدر الإمكان .. بتصحي من النوم .. و ما لم تكون محضر مية من الليلة اللى قبلها .. و ما لم تكون عايش علي ضفاف نهر .. فإنت لازم تحل مشكلة المية .. حتشرب منين ؟ و بعدين الحمام … برضو لأنك عايش فمكان بدون صرف صحي .. فإنت مضطر تمشي مسافة محترمة عشان بس تدخل الحمام .. و ترجع تاني .. عشان عواقب الحمام بتاعك دي متضايقكش و تطلع ريحة عليك فمكان عيشتك . كده إنت بتتكلم فتقضية بتاع ساعة مستريح مثلاً .. فقط لمجرد الشرب و دخول الحمام الصبح .. و بعدين الفطار .. إنت جعان .. ما لم تكون برضو محضر حاجة من ليلة إمبارح .. و عامل حسابك إنك تحفظها بشكل بعيد عن الحشرات و انها ماتفسدش مثلاً .. فإنت ملزم تروح تقطف ثمر .. تصطاد .. تتصرف عشان .. تفطر . … و بعدين خلينا نفترض إنك مكمل نص دينك .. و متجوز شريكة كهف .. عشان ماتحسش بالوحدة جوة الكهف يعني .. روتين الحفاظ على حياتكم اليومي لوحده .. حيستهلك كام فى المية من يومك و مجهودك ؟ .. هنا أنا بافترض سيناريو مثالي كمان .. بعيد عن إن جارك ممكن يعجب بكهفك و يطلع مزاجه يقتلك و يعيش هو .. أو إنه يعجب بشريكة كهفك ذاتها .. أو إن فى أسد أو حيوان مفترس عينه من فخدتك ولامؤاخذة .. أو أو أو .. كتييييير من السيناريوهات المختلفة اللى تعكنن صفو الكهف عليكم .. … سؤالي بقي … أما بعد .. بعد ما تستهلك تقريباً 90% من وقتك اليومي و مجهودك .. فقط عشان تحفظ روتين حياتك .. حياة إنسان الكهف .. حتعمل إيه بال 10% الباقيين ؟ أو بمعني أصح … حتدرك أساساً إنك عندك 10% وقت و مجهود متوفرين ؟!! … خليني أشرح .. إنت عايش حياتك دلوقتي برنس فنفسك … بتصحي تفتح التلاجة تشرب و تاكل و تدخل حمام إيديال ستاندارد مجهز بسخن و ساقع .. و تدخل تحت لحاف فايبر أو تكييف جنب مراتك على سرير بمرتبة 30 سم . و بتنسي تفكر في اللى فكر لك فكل ده .. اللى إستغل ال10% الزيادة اللى كانوا عنده .. و فكر .. فكر فحاجة ماحدش طلبها منه .. ماحدش إداله تاسك بيها … فكرلك فكل وسائل الترفيه و الحياة اللى إنت عايش بيها و معتبرها أساسيات الحياة دلوقتي .. … باتخيل كتير بقي حياتنا فى المستقبل .. مش 1000 سنة مثلاً … لا .. كفاية بس 10 سنين .. و أسأل نفسي .. هل خلال ال 10 سنين دول .. أنا كنت عايش فقط لمجرد الحفاظ على روتين حياتي و إستقرارها .. عايش باشرب و أدخل الحمام و أعمل اللى بيتقال ليا فى القبيلة اللى أنا عايش فيها .. بالظبط زي الحيوانات اللى بياكلوا و يشربوا و يعملوا اللى بيتقال ليهم ؟ … … من أكتر الحاجات اللى باستغرب لها .. إن ناس كتير فعلاً متخيلة إن هي دي الحياة .. إنك تصحي .. تشرب .. تدخل الحمام .. تعمل اللي يتقال لك .. فقط عشان تحافظ علي روتين حياتك العادي و تأمن حياة أطفالك فأنهم يصحوا يشربوا يدخلوا الحمام . .. بل و كتيييير من البوستات اللى على السوشيال ميديا بتمجد الحياة دي .. و جروبات كتير بتتعبد فمحراب انك تفسيها و تفضي دماغك و تفكك منها .. و إن يادوب شوية الوقت اللى فاضيين فى اليوم يكفوا إنك تتفرج على ماتش كورة .. … … حياة الناس ( المحافظين على روتينهم دول ) هشة جداً .. و معرضة فأى لحظة إنها تقلب عليهم بغم .. لو أى ثابت من ثوابت حياتهم إتغير .. و ده لأنهم متوهمين إنهم متحكمين فحياتهم .. بالظبط زي أى حيوان ماشي فممر ممهد ليه .. و لكن عليه حواجز … تمنعه من إنه يبص برة الممر حتي . … بمجرد ما بتزيد أسعار البنزين .. بيبدأوا يكتشفوا حياتهم قد إيه هشة .. قد إيه وهم التحكم ده … فقط .. وهم .. و إنهم دلوقتي مضطرين يتأقلموا على وضع جديد .. أقل بكتير من وضعهم الأول .. فقط عشان برضو يفضلوا محافظين على الروتين … وهم الروتين .. … … الإنسان فوجهة نظري عمره ما كان المفروض يعيش عشان يحافظ علي روتين حياته اليومي و بس .. ببساطة لأن منطقياً قدرتك عشان تعمل بكرة .. نفس اللى بتعمله النهاردة .. بتقل .. الإنسان فوجهة نظري ربنا كرمه بعقل عشان يفكر فى كسر الروتين .. بكل الطرق .. و الجيل الرائع بتاعنا حالياً بيتعلم ده غصب عنه .. و ده كويس فوجهة نظري .. شايف إزاى إن اللى كان حاطط ثروة مليون جنيه فى البنك سنة 2010 .. دلوقتى بقوا بيساووا تقريباً مية ألف بس .. إن لم يكن أقل .. يدوب يجيبوا شقة نص تشطيب فمكان كويس .. و اللى كان معاه حرفة فإيديه .. و بيطورها .. فكرة فعقله .. و بيطورها .. إبداع فقلبه .. و بيطوره .. هما اللى قادرين يركبوا الموجة “حرفياً ” … بدل ما الموجة تشقلب فيهم فكل إتجاه .. … الجيل ده شايف اللى بيحصل كويس .. و من حقه يخاف .. بس ياخد أكشن صح بناءاً على الخوف ده .. … فكر .. دور على مشكلة حواليك .. و فكر فحلها .. مش لازم يكون حل معقول .. كل ما كان أجن .. كل ما كان أحلي .. فكر .. عقلك لسنين كان عبء على صاحب المصنع .. لأنه كان محتاج جسمك بس عشان تشغل المكنة .. دلوقتى المكنة بقت بتشتغل لوحدها .. و جسمك كمان أصبح عبء .. و أصبح العالم محتاج عقلك تاني .. أكتر من الأول .. عشان تحل مشاكل كتيييييييييييير … مشاكل كتييييير كلها فرص ليك … حل اللى تحب تفكر فيه :) . … و الله أعلم .

.. همممم .. و إيه كمان . https://korionx.sarahah.com/