أحد أكبر أسباب كراهيتى للمناسبات هو

أحد أكبر أسباب كراهيتى للمناسبات هو :

الكلام الصغير ” small talk ” .

اللى هو ” أخباركم ؟ , أخبار الشغل ؟ , أخبار العيلة ؟ , الجو جميل , الجو حر , الجو برد , … ” . و بعد شوية .. يتعاد نفس الكلام هو هو .. مع إضافة ” إتشرفنا .. آنستونا … ” .. … سؤالى هو : هل فى حد فعلاً بيستمتع بالكلام ده ؟!!! . لوقت طويل جداً فحياتى كنت مفكر إنى إنطوائى .. لحد ما إكتشفت إنى مش إنطوائى ولكنى باكره الكلام اللى مالوش معنى ده .. … فكتاب مش متذكر إسمه للأسف دلوقتى.. فاكر إنه كان بيتكلم عن تجربة إجتماعية رائعة عملوها .. و هى إنهم عملوا حفلة و كان فى قاعدتين أساسيين فى الحفلة دى . 1- الميعاد الساعة 8.30 .. و التجمع من 8 … و الباب حيتقفل الساعة 8.25 . 2- ممنوع ال small talk . … يعنى كان ممنوع تتكلم عن ال( الطقس , اخبارك ؟ .. شغلك … كل الكلام اللى فوق ده ..) .. و الكلام يكون بس فى المواضيع العميقة .. يعنى تبتدى الموضوع مثلاً ب :

• وجهة نظرك أو خبراتك السياسية فى الموضوع الفلانى ؟
• وجهة نظرك أو خبراتك الدينية ؟
• وجهة نظرك أو خبراتك العاطفية .. أو الجنسية :) .. .
• و هكذا .. اللى هو نط فى العلاقة بينك و بين اللى قدامك ساعات من الهرى بتاع الكلام الصغير .. و أدخل فى العميق مباشرة .. و كان اللى بيتمسك بيتكلم كلام صغير .. بيمنعوه و يجبروه يدخل فى العميق .. … نتائج الحفلة دى كانت مبهرة .. و إن الناس إستمتعت فعلاً و قضت وقت ممتاز .. لأنهم أجبروا الجميع على التخلى عن دفاعات الكلام الصغير اللى بتجبر معظمنا على الصمت فى إنتظار شخص معين يبقى محل النظر و مركز الإهتمام . لأن فى الغالب فأى تجمع بشرى .. معظم الناس بتلجأ للصمت و بتخبى نفسها خوفاً من إنها تتكلم الأول فموضوع عميق .. فيبدأ الكل يركز عليها .. فيتحول الموضوع لخطبة .. و معظم الناس عندها خوف من ال public speaking . … شخصياً إتعلمت إنى مايبقاش عندى مشكلة فى إنى أبتدى التفاعلات اللى من النوعية دى .. و لكن للأسف .. فى تجمعات كتير .. بيبقى فيها ناس بتحترف ال small talk .. الناس دى بتقدر بكل مهارة إنها تقاوم أى محاولة منك إنك تدخل فموضوع عميق .. بإنهم يردوا ردود تنهى النقاش على الجميع .. أو إنهم يلجأوا للسخرية و التقليل من أى شخص يحاول يرد عليك برد عميق فموضوع عميق . … بكل جدية بافكر إنى أعتنق منهج جديد فى التعارف على الناس .. و هو إنى لما أتعرف على شخص جديد باقابله لأول مرة .. بدل أى كلام من الكلام الصغير ده .. أبتدى بشىء زى :
• السلام عليكم .. أنا إسلام .. كلمنى عن أول حب فحياتك :) .
• السلام عليكم .. أنا إسلام .. كلمنى عن أحلامك كمان خمس سنين :) .
• السلام عليكم .. أنا إسلام .. لسة قارى مقال عن تزايد كم المخلفات فى الفضاء و تأثير ده على نشاط إطلاق الأقمار الصناعية فى المستقبل .. رأيك نعمل إيه ؟! :) . … و الله أعلم .