شوية ( طلعوا كتير ) عن الإدمان !!

شوية ( طلعوا كتير ) عن الإدمان !! .

بقالي تلات أيام من ساعة ما عملت ( شيفت ديليت ) للعبتين ( league of legends , command and conquer generals ) كانوا بياخدوا من وقتي يومياً ما لا يقل عن 5 ساعات تقريباً !! .

أنا إتكلمت عن الموضوع ده في اللايف ( العزف المنفرد ) اللي عملته إمبارح , بس حبيت أعيده هنا بشكل مكتوب .. لأني أعتقد إنها من أهم الأفكار اللي إدراكها ساعدني بتحقيق حاجات كتير بفضل الله . … و هي كيفية ال ( إحلال ) عند المدمنين أمثالي . … … أنا شخصيتي سهل جداً إنها تدمن .. الإدمان شيء موجود فينا جميعاً بدرجات .. في ناس عندها قدرة عالية جداً علي التحكم فرغباتها و أفكارها و إحتياجتها بشكل غير واعي .. فعمرهم ما بيوصلوا لمرحلة إنهم يحسوا إن شيء ما بيتحكم فيهم .. الناس دي نادرين .. و قليلين جداً … … في ناس تانيين بمجرد ما يجربوا حاجة مرة أو مرتين .. و ” تعجبهم ” .. و خلي بالك من كلمة ” تعجبهم ” دي .. بيتحولوا بسرعة جداً لمدمنين للحاجة دي .. و دماغهم و حياتهم و أفكارهم بتتحول إنها تتمحور حوالين ال ” حاجة ” دي .. و مايقدرش يقضي ساعة واحدة علي الأقل من غير ما يفكر في ” الحاجة ” دي . … … أنا من النوعية التانية دي .. و بشدة .. و أصبحت واعي للحقيقة دي بفضل الله من أيام ما وصلت أولي و تانية كلية تقريباً .. لأن قبل كده .. كان كل الحاجات اللي أنا مدمن لها .. حاجات مفيدة و مش بتضرني أو تبان إنها بتضرني مثلاً .. … كنت مدمن قراءة .. ( مدمن إدمان كامل ) .. يعني ماكنش ينفع مايكونش في كتاب باقراه .. و متطمن إنه لو خلص .. في غيره كتابين تانيين علي الأقل فأوضتي لسة ماتفتحوش . و لما كان بييجي وقت مايكونش عندي أى كتب في الأوضة أو الشقة .. كنت بابقي عامل زي المدمن المجنون اللي بيدور علي أى حاجة يتعاطاها .. والله العظيم .. ورق جرايد قديمة .. مجلات قديمة .. أى كتب فمكتبة جدي قديمة مثلاً .. . و أول فلوس تتكون معايا .. أنزل جري علي المكتبة أشتري أو أستعير كتب . … و بعدين أدمنت الرياضة و الفيزياء فثانوي عام .. فأصبح إني باهرب من المواد التانية .. أو أى حاجة تانية عموماً .. فإني أفتح مسائل رياضة و فيزيا و أقعد أفكر فيها ( مش أحاول أحلها .. لا ) .. أفكر فيها .. يعني أفكر طيب ممكن أخليها أصعب ؟ .. ممكن أغيرها ؟.. ممكن ؟ .. و لهذا قصص و قصص و روايات شاركها معايا أصدقاء عمري في الوقت ده . … كنت مدمن لعب و تكسيرهم .. لحد مرحلة ما قبل الكمبيوتر فحياتي .. كنت دايماً بيبقي عندي لعبة ما .. هي دي اللي دايماً ماسكها ( دايماً .. مهما كنت باعمل ) .. و كانت جملة مشهورة أمي بتقولها عني ربنا يبارك لها لما كنت فتانية ثانوي .. و حد يسألها إسلام بيذاكر ولا لا .. تقول لهم ” داير في البيت بفوريرة ” .. ده لأني في المرحلة دي كنت باتفرج علي ( بي بليد ) علي سبيس تون .. و إشتريت لعبتين فعلاً منهم .. و فكيتهم و ركبتهم فبعض .. و عملت شوية تعديلات زيادة علي ( الفوريرة ) .. و أصبحت فخور جداً بيها و مابسيبهاش من إيدي … ( أبداً ) .. … … بمجرد دخول الكمبيوتر حياتي .. أصبحت و بسرعة مدمن .. مدمن لكل شيء ممكن يقدمه ليا من محفزات لعقلي .. ( فيديو جيمز , أفلام , مسلسلات , أغاني , برامج … ) .. و ساعد فده بشكل كبير بعد كده إني دخلت هندسة .. و أصبح من حقي لما أقعد علي الكمبيوتر أقول ( ده عشان مذاكرتي ) … في حين إن 90% من الوقت ماكنش عشان مذاكرتي 😉 … … عند نهاية تانية كلية .. كنت إتحولت لمدمن أنيمي درجة أولي .. ( أوتاكو مخضرم ) .. اللي هو ماينفعش مايبقاش في أنيمي أول ما أرجع البيت أفتح الجهاز و أقعد أتفرج عليه .. و الموضوع إتحول معايا لفكرة إن مش لازم الأنيمي اللي باتفرج عليه يكون حلو .. او قصته جميلة مثلاً .. أو فكرته ذكية .. لا .. أنا أدمنت فكرة إني أسمع ياباني .. و أدخل فحلقة بعد حلقة .. و ألاقي إن 6 أو 7 ساعات عدو بكل بساطة و أنا قاعد باتفرج علي أنيمي قدام الكمبيوتر .. و بقيت باحسب الوقت مش بالساعات .. لا .. بعدد حلقات الأنيمي اللي ممكن أتفرج عليها .. يعني مش قدامي 5 ساعات علي النوم .. لا .. قدامي 15 حلقة أنيمي ( حلقة الأنيمي = 20 دقيقة ) … … إتفرجت علي كم ضخم جداً من المسلسلات .. الإدمان ده بكل تأكيد أثر بكل الأشكال السلبية علي دراستي في الكلية .. و أصبحت المذاكرة ( و أى حاجة تانية في الحياة عموماً ) .. هي آخر شيء خااااااالص أفكر فيه .. و لو كانت أولوياتي 20 حاجة مثلاً … من 1 ل19 فيهم كان : أنيمي . … … عند المرحلة دي .. بدأت ألاحظ إني حتي لما باحاول أبطل شوية .. ألاقيني مش قادر !! .. كل مرة آخد القرار .. أرجع يومها بالليل و أقول .. حكافيء نفسي بحلقة واحدة .. و بعدين الحلقة يبقوا إتنين .. و بعدين 5 .. و بعدين ألاقي نفسي نايم الفجر .. و محتاج أصحي بعد ساعتين عشان أروح الكلية … و أروح هناك أنام في المحاضرات و السكاشن .. و أحلم ب ( أنيمي ) ! . … أبص علي كشاكيل محاضراتي و ورق الكورسات اللي كنا بنصوره .. و ألاقيني راسم فكل مكان فيها ( عينين جون و شعره , شعر ساكوراجي هاناميتشي , سيفه , هيسوكا , … ) .. … … فضلت فترة طويلة باساوم نفسي .. مئات المرات أقول آخر حلقة .. مئات المرات أمسح كل الأنيمي اللي عندي علي الهارد .. و أرجع السايبر بعدها بيومين أنزل أنيمي تاني .. … … لحد ما وصلت من الفشل للمرحلة اللي كنت شرحتها قبل كده .. إني قررت إني أدرس اللي عايز أدرسه و أطنش كل ما له علاقة بالكلية .. عند المرحلة دي .. القرار ده إداني راحة نفسية شوية .. بس كنت مازلت بمجرد ما أحس إني عندي شوية وقت .. أتفرج علي أنيمي .. … … فقررت إني أسيرش و أدور علي مساعدة .. أنا كنت تصالحت مع فكرة إني ( مدمن ) .. و بطلت أنكر ده قدام نفسي حتي .. فبدأت أدور علي إني أفهم .. عقلي بيشتغل إزاي ؟ بادمن ليه ؟ و ليه بالرغم من غروري بقدراتي المختلفة.. مش قادر أتخلص من الإدمان ده ؟ ! .. … و بدأت أفهم بالتدريج قد إيه عقل الإنسان ممكن يتحول لألد أعداءه و أشدهم فتكاً .. و قد إيه إني كل مرة كنت باحاول أقاوم الإدمان ده بدون ما أفهم أبعاد العقل المدمن .. كنت بدون إدراك مني .. باقويه أكتر .. بالظبط زي الرمال المتحركة .. اللي كل ما تقاومها .. تغرق فيها أكتر .. أو زي المية للي مايعرفش يسبح .. كل ما يقاوم بغشومية … يغرق .. أسرع . … … أول خطوة عملتها .. كان إني قريت عن ال ( برنامج ال12 خطوة) .. بكل تفاصيله .. و بدأت أبحث كتير عن أنواع الأدمان المختلفة .. و لقيت فعلاً كتير غير مدمنين للأنيمي و الفيديو جيمز .. و شرحا تجربتهم مع إدمانهم ده .. … … و فهمت إني دي طبيعة عقلي .. أنا مدمن .. أدمنت ال ( قراءة , اللعب , الفيديو جيمز , الأنيمي , السكر , … ) .. أى شيء .. عقلي بيبدأ يستمتع بيه و يحس إنه بيحفزه .. بيبدأ ي ( abuse ) فيه .. و يسيء إستخدامه .. حتي القراءة .. فهمت إني كل مرة باستسلم فيها لإدماني القراءة … بابدأ أستهلك كتب كتير بدون ما أدي لنفسي فرصة إني أفكر فيها .. أستسيغها … كأني باكل بدون ما أمضغ .. و بعد فترة .. أشوف الكتاب هو هو .. و أكون نسيت بالكامل إني قريته .. و أشتريه .. و أبدأ أقراه .. أكتشف إني قريته بالكامل من سنة مثلاً .. بس قريته بسرعة و بنهم و جنون .. بدون ما أهضم أى كلمة فيه .. … … … الحل : … لما تبحث عن الإدمان .. ( و علي حسب نوع إدمانك ) .. في طرق كتير إنك تتعامل معاه .. الطريقة اللي ناسبتني هي ال ( إحلال ) . … الإحلال هنا معناه هو : إني بالتدريج .. أجبر عقلي إنه يبدل إدمانه بشيء ما … لشيء تاني .. … و كل مرة مارست فيها الطريقة دي .. حسيت بنفس التفاصيل .. و بفضل الله نجحت معايا . … بشكل عام مثلاً … كنت مدمن للأنيمي .. لحد ما عملت لده إحلال بالمسلسلات الأجنبي .. و بعدين عملت لده إحلال بالأفلام الوثائقية .. و بعدين عملت لده إحلال بالكورسات . و بعدين عملت لده إحلال بالتطبيق العملي علي برامج مختلفة . و بعدين عملت لده إحلال بالجيم و التراك . و بعدين عملت لده إحلال بمجالات بيزنس مختلفة .. و هكذا و هكذا .. … كل مرة باحس إني أصبحت مدمن لشيء ما بشكل أصبح أضراره أكبر من فائدته ليا .. كنت باعمل له إحلال بشيء تاني .. و أصبحت ماهر جداً فده .. و باعمله بشكل واعي .. … فمثلاً .. من فترة أربع شهور تقريباً .. كنت بعد توقف لمدة 3 سنين عنها … نزلت لعبة ( league of legends ) تاني .. عشان كنت محتاج أعمل ريسيرش عن عالم ال ( esports ) عشان شوية شغل فيه .. و رجعت ألعبها .. بس حطيت علي نفسي قاعدة و هي إني مش حالعبها تنافسي ( رانكد ) و إني حالعبها ( آرام ) بس . .. لحد ما لقيت نفسي من أسبوعين تلاتة .. باصحي من النوم عشان ألعب جيم .. و أرجع أكمل نوم تاني .. لا لشيء غير إني حسيت إني عايز ألعب . ده كان علامة خطر بالنسبة ليا .. … عندها رحت منزل لعبة ( command and conquer ) تاني ( بعد 10 سنين من آخرة مرة لعبتها فيها ) .. و بدأت أجبر نفسي إني ألعبها تاني .. لحد ما بعد يومين بس .. وصلت إني مدمن .. حرفياً كنت باشرب قهوة عشان أدخل جيم و أستمتع بإني أعيد تفاصيل و أحسب حسابات جوة اللعبة .. كنت بطلت أعملها من سنييييين كتير .. … … من كام يوم .. وصلت إن شكراً .. لقيت نفسي أينعم عملت إحلال ل ( ليج أوف ليجيندز ) ب ( كوماند أند كونكر ) .. و بعدين أصبحت مدمن للإتنين مع بعض .. فقررت إني أعمل شيفت ديليت للإتنين .. … و للمرة التامنة فخلال 3 سنين .. قررت أبتدي أحاول أدمن الفيولين = الكامانجا يعني .. و بدأت .. أول يوم قاومت بكل شدة إني أعيد تنزيل و تسطيب اللعب علي الجهاز .. كنت كل دقيقة أفكر فيهم .. و كل ما كنت أفكر فيهم .. أروح ماسك الكامنجا .. و أحاول أعمل عليها أى شيء .. الموضوع ماكنش سهل .. إطلاقاً … عقلي كان بيدور علي أى لعب .. لدرجة إني فتحت لعب كنت قفلتها من فترة طويلة ( SOTR, batman, mortal kompat , … ) .. و كلهم مش قادرين يدوني نفس الإحساس ( الدوبامين هيت ) بتاعت اللعب اللي عقلي بيطلبها .. … … كنت حرفياً باقوم من علي اللاب .. و أروح ألعب عقلة .. أنضف في الشقة .. أعمل أى شيء يطفي رغبة عقلي في اللعب .. و أمسك الفايولين .. و أحاول أ ( gamify ) اللعب عليه .. … و النهاردة بعد يومين تانيين فيها .. بفضل الله مش حاسس إني عايز ألعب ( ليج أو كوماند ) .. و بدأت أستمتع باللعب علي الفايولين .. وبدأت أشوف إنجازات بسيطة جداً فيه .. أول مرة أشوفها علي مدار ال3 سنين اللي حاولت فيهم و فشلت 8 مرات … … … كفاية كتابة لحد كده :) .. جات مكالمة نساتني كنت بافكر فإيه .. و بعدين لقيتني كتبت كتير أوي !!