في المعتاد طريقة كتابتي للبوستات .. بتكون متأثرة بشكل ضخم

في المعتاد طريقة كتابتي للبوستات .. بتكون متأثرة بشكل ضخم بطريقة تفكيري اللي معتمدة بشكل كبير جداً جداً جداً علي ال : ( برهان ) . .. الكلمة الأيقونية دي .. أول مرة شفتها كنت في أولي إعدادي .. كانت في لوحة مدرسية مُعلقة جنب فصلي في مدرسة الإعدادي .. و تحتها كان ( بُرهان ) حل مسئلة رياضية .. .. ال( بُرهان ) عبارة عن تسلسل من ال ( حقائق ) اللي بتقود ل ( نتيجة ) بشكل منطقي و غير قابل للضحد .. بيبتدي ب ( بما أن ) اللي هي علي شكل تلات نقاط .. نقطتين و تحتهم نقطة .. و بينتهي ب ( إذن ) .. اللي هي علي شكل تلات نقاط .. نقطتين و فوقهم نقطة . .. وقعت فغرام الطريقة دي في التفكير .. و إعتنقتها .. و لحد النهاردة .. دي هي طريقة تفكيري .. و طريقة كتابتي برضو .. و لما باكتب أو بافكر في أى شيء .. بانقله بالظبط بالطريقة دي .. و لكن : … نتيجة لكدة .. بوستاتي بتكون طويلة جداً جداً … جداً .. لأني مش باكتبها لحد غيري أنا في المُعتاد .. باعتبر إني أنا ال ( قارئ ) .. و باكتب لنفسي .. بالطريقة اللي أحب أقرأ بيها .. … و دي مشكلة .. و تعالي أشرح ( إيه هي المشكلة ) .. … أغلب الأحداث الأخيرة علي مدار الشهور اللي فاتت في مجالات ال (بيزنس , تكنولوجي , تربية و تعليم ) .. كلها في ذهني بتؤدي لنتيجة واحدة و واضحة جداً بالنسبة ليا و هي : ( الحلول الفردية) . … و عشان أشرح ده .. علي مدار الأيام اللي فاتت .. كتبت بوستات كتير فعلاً .. و كل بوست كان عن شيء ( مهم ) في المجالات السابق ذكرها .. و لكني إطلاقاً مابحاولش أكون مجرد ( ناقل ) للمعلومات .. أنا فعلاً لما باكتب عن شيء باحاول قدر المُستطاع إني أحاول أحل جزء من مشكلة .. .. فبلاقي نفسي باشرح كتير عن طبيعة النفس البشرية و تكوين المجتمعات .. في سطور كتير جداً .. قبل ما باوصل إني أشرح النتيجة اللي عايز أشرحها عن ( حلول تعليمية أو بيزنس أو تكنولوجي ) مثلاً . و البوست بيطول بشكل أكبر من اللي يتحمله حتي أشد متابعيني إعجاب بأسلوبي .. فباسيب ال ( تاب ) اللي كتبت فيه البوست و أنشغل بشيء آخر علي أمل إني أعود له في وقت لاحق للتلخيص بشكل أفضل …و طبعاً بانسي أو بانشغل بشيء آخر بالكامل . .. و دي هي المشكلة . … … و آخر ال ( مُثيرات - Triggers ) لعقلي اللي حصلت في العوالم دي .. كان موضوع شهادة ال ( بكالوريا ) بتاع إمبارح .. و شوية أخبار جديدة عن التكنولوجيا و الذكاء الإصطناعي من ( CES ) .. … … فبالتالي .. و عشان أكسر ال ( Mental Block - الحاجز العقلي ) اللي بيتكون في عقلي كل فترة أتوقف فيها عن النشر .. .. حابدأ شوية أكتب نتائج بدون برهنة ( بدون بوستات طويلة ) .. و حاكتفي بإن في نسبة كبيرة جداً من البشر بتدور علي ده .. و بتمشي وراه .. بدون السعي ورا براهين و طرق تفكير .. .. يعني … حابدأ أحاول أوزع سمك حرفياً .. بدون ما أبذل مجهود في شرح الصيد .. … … مش حاتوقف نهائي عن الشرح و البرهنة بأسلوبي المعتاد ( الممل ) لناس كتير .. و لكن ححاول أكون أكثر مراعاة لمتابعين بيقرأوا اللي باكتبه .. غيري أنا شخصياً .. … … … خلاصة البوست ده هو : .. 1- توقف عن البحث عن أى حلول غير فردية .. يعني ماتنتظرش أى مؤسسة أو كيان إنه يعلم أطفالك صح , يعلمك صح , يوفر لك شغل , يوفر لك بيئة مناسبة للشغل , أو أى شيء .. وجه أغلب تفكيرك و مجهودك للبحث عن الحلول الفردية .. .. 2- أى حل فردي في مجالات ( البيزنس , التكنولوجي , التعليم ) .. بيعتمد بشكل محوري و أساسي علي ال ( بيع ) .. لا تخجل من ال ( بيع ) .. .. 3- ال ( بيع ) مهارة و عضلة .. بتنمو و تقوي بالتمرين .. و مهما كنت محترف فيها .. لو بطلتها شوية .. حتضعف تاني .. .. 4- ال ( بيع ) لا يتطلب إطلاقاً إنك تكون مالك للمنتج أو الخدمة اللي بتبيعها .. و فأحيان كتير .. أمهر البائعين هو ال ( وسيط ) . .. 5- ( أى آداة تكنولوجية حديثة .. أى آداة ذكاء إصطناعي .. أى لغة .. أى إمكانيات ) .. مش حيكون لها أى قيمة أو أهمية في عالمك .. ما لم يكون في ( بائع ) محترف في عالمك .. عالمك هنا معناه ( إنت ) .. أو ( إنت و شركائك ) لو كان في شركاء معاك . .. 6- و أخيراً و ليس آخراً .. السبب الوحيد إن ( عالمك ) يكبر .. و يتوسع عن مجرد ( فرديتك ) .. هو إنك تكون قادر علي بيع شيء غيرك مايقدرش يبيعه .. أو .. تكون بتبيع أحسن من باقي أفراد عالمك . … … و الله أعلم .. … … اللي عايز براهين أو إثباتات علي ما سبق بقي .. يبقي يفكرني في التعليقات أشرح في بوستات طويلة منفصلة بإذن الله .. … ححاول ألتزم ببوست واحد يومياً علي الأقل بداية من النهاردة إن شاء الله .. بنفس الأسلوب اللي إتبعته من سنين .. ( معلومة واحدة يومياً علي الأقل ) .. إن شاء الله .