4’33”

عن #اللى_بالي_بالك و أشياء أخرى .. و الله أعلم … ” بوست جينيريك* ” .

سنة 1952 .. على أحد المسارح المشهورة فأمريكا .. كان فى أكتر من موسيقار المفروض حيلعب المقطوعة بتاعته .. لحد ما جه دور القطعة بتاعة موسيقار مشهور إسمه ( john cage ) .. التلميذ بتاعه راح قايم و قاعد عالبيانو .. ظبط الكرسى و إتنحنح … و بعدين راح مشغل الستوب ووتش بتاعته على 30 ثانية .. و … بعدين راح قافل البيانو زى ما إنت شايف فى الفيديو .. و .. هسسسسسسس … لمدة 30 ثانية .. و بعدين راح فاتح البيانو .. و ظابط الستوب ووتش على دقيقتين و 30 ثانية … و بعدين راح قافل البيانو .. و هسسسسسسسسسسسس و بعدين راح مكرر نفس الليلة لمدة دقيقة و 33 ثانية .. و راح قايم عشان الناس تحييه .. 😄 يحضرنى هنا مشهد “محمد صبحى” فوجهة نظر لما ” إنت بتسمعنا سكاتك يا ولا ؟!! ” . … الحقيقى هو إن آه .. القطعة دى مشهورة جداً فى الموسيقى بإسمها ( أربعة .. و تلاتة وتلاتين) . أربع دقايق و تلاتة و تلاتين ثانية من … الصمت التام .. المؤلف (جون كيدج) بيقول إن أحد متع القطعة دى هى إنك ممكن تلعبها بأى آلة .. و فأى مكان :) :) … ” بيصيع حرفياً ” .. طبعاً بعد ما القطعة بتاعته خلصت و الناس فهمت .. فى اللى قاله إنت بتستعبط ولا بتصيع ؟ .. بس فى اللى فهم .. و صقف .. جداً … … جون كيدج .. كان فيلسوف .. و كان دائماً شايف إن أى تسلسل أصوات .. حتى لو كانت أصوات الطبيعة بس .. ينفع يبقى موسيقى .. و تفاصيل المقطوعة دى و قصص عنها أكتر ممكن أشرحها لاحقاً .. لكن أنا حادخل على ” ليه إفتكرت الموضوع ده لما شفت الدوشة اللى حاصله حالياً فى الموضوع الفلانى بتاع اللى بالى بالك ؟ ” . … نفس الدوشة .. و نفس النكت .. و نفس الكلام .. و نفس الكلام المضاد .. و نفس الفتى .. و نفس كل حاجة .. فى الأول كان ليها معنى .. لكن زى التجربة اللى كنا بنعملها و إحنا أطفال فى المدرسة .. و نجيب السبع ألوان الطيف .. و نلون غطا علبة ميلكانا بيها .. و نخرمها من النص و نلفها .. فيطلع اللون أبيض . برضو .. أنا كمان حاسس إنى مابقاش فى حاجة مختلفة حصلت .. دوشة فوق دوشة فوق دوشة … إذن فلنستمتع … إنها الموسيقى الأعظم … الصمت .

جينيريك* = كلمة بيستخدمها مهندسوا الكمبيوتر و الرياضيات .. لما يقصدوا آداة معينة أو معادلة معينة تنفع تتطبق على كل حاجة و أى حاجة . … و الله أعلم .