فرمضان .. ماتكترش فى الهيروين و الكوكايين .. و لا

أيوا .. يعنى دلوقتى لو أنا عايز أرتكب جريمة يعنى .. فعشان أكون وسطى .. أرتكب نص جريمة ؟!

AR 6 د

فرمضان .. ماتكترش فى الهيروين و الكوكايين .. و لا تمنع خالص .. خير الأمور الوسط !!! ..

من و أنا صغير و أنا عندى مشكلة مع الجملة دى ” خير الأمور الوسط ” .. دايماً كنت باسمع الناس بتقولها بشكل عام .. و بتنهى بيها جدالات كتير .. و دايماً كنت أسأل نفسى .. أيوا .. يعنى دلوقتى لو أنا عايز أرتكب جريمة يعنى .. فعشان أكون وسطى .. أرتكب نص جريمة ؟! .. يعنى بدل ما أقتل إتنين أقتل واحد ؟!! .. لحد ما إكتشفت إن إجابة السؤال ده موجودة فى الكلمة اللولبية دى : ” عايز” .. خلينى أشرح :

كنت ماشى من يومين و شايف إستعدادات مصر المعتادة لرمضان .. و خصوصاً كم الأغذية اللى إنفجر فى المحلات .. و طبعاً ( الكنافة و القطايف و ما شابه ) .. و إفتكرت إنى (بفضل الله سبحانه وتعالى قبل و بعد أى شىء ) .. بقالى أكتر من سنة و نصف تقريباً .. شبه مقاطع السكر الأبيض بالكامل .. بجميع منتجاته زى :

و رمضان بالذات .. كان فطارى بيبتدى بربع كيلو كنافة (عليها عسل نحل ) + عصير (مكثف السكر) … و بعد الفطار كنت باحلى بشىء مشابه .

أى فنجان قهوة أو شاى أو كابتشينو أو … كان على الأقل أربع معالق سكر .

أمى دايماً ربنا يبارك فيها بتقولى إنى مشكلتى إنى معنديش وسط .. و إنى مابعملش حاجة تدريجى .. و إنى يا إما أبيض .. أو أسود .. فجأة . ده مش حقيقى فمعظم الأحيان .. و لكنى فحاجات كتير أعتقد إن ده أفضل أسلوب للتعامل (زى مع التعلم أو .. التخلص من الإدمان )

خلينى أفتكر معاك أول شهر من الإنقطاع عن السكريات بالكامل كان عامل إزاى : 1- أول كام يوم .. إكتئاب كامل .. و غضب شديد لكل شىء و على أتفه الأسباب .. حالة هبوط ضخمة فمستويات نشاطى الذهنى و الجسدى . 2- حتحلم بالسكريات و منتجاتها .. حرفياً .. حتنام و تحلم إنك بتاكل تورتات و شوكولاتة جالاكسى و مربى و حلاوة. 3- كل الأكل بالنسبالك حيبقى طعم واحد .. كل الأكل .. الحادق و المسكر( فواكه ) و الحراق و … كله طعم واحد . 4- صداع .. صداااااااااااااااااااااااع .. 5- من الآخر .. عارف عادل إمام لما كان طالع مدمن و قافلين عليه الباب … نفس الصورة بالظبط . = قوة الإرادة اللى إنت محتاجها عشان ماتاكلش سكر أو تخلص أربع برطمانات عسل نحل فقعدة واحدة .. او إنك تقضى ال 24 ساعة نايم … كبييييرة جداً .. = ماتقدمش على خطوة مشابهة ( إنك تبطل فجأة ) .. لو فى ناس حواليك معتمدين على حالتك المزاجية عشان يقرروا حالتهم ( شريك حياة , أطفال , موظفين تحت منك ) . = ماتعملش كده و إنت فدراسة … صعب … جداً جداً .

بعد الشهر ده وصلت للتالى : 1- حالة صفاء ذهنى مستمرة مستقلة عن السكر . 2- وزنك حينزل على الأقل 10 كيلو . 3- كل وظائفك الحيوية حتتحسن ( تنفس , دورة دموية , نوم … ) . 4- و الأهم … حتستطعم بكل طعم السكر كان بيغطى عليه ( قهوة , شاى , شاى أخضر , ينسون , لبن …) حتحس بطعم كل حاجة من دول كامل و تستمتع بيه .. بدون الإحتياج لسكر . 5- جسمك حيبدأ يرجع لطبيعته تانى ..

شوية ملاحظات : 1- بعد الشهر الأول نزلت التراك جرى يومياً .. و بعد كده جيم .. و نزلت من 120 ل 93 خلال 8 شهور . 2- طبعاً خلال الفترة دى كان فى عزومات إضطرارية .. و خرطة تورتة هنا .. مع شوب عصير هناك .. المهم مش إنك تندم على الحاجات دى .. أكتر من إنك تتعامل مع نفسك زى المدمن بالظبط .. و تبدأ تعد العداد من جديد .. تتعلم تعاقب نفسك بتمرينة زيادة مثلاً .. 3- قراية رواية ( ربع جرام ) حتفيدك فإنك تفهم الجزء المدمن اللى جواك و تتعامل معاه . 4- إتعلم تقول لا لطنط .. لما تعزم عليك .. 5- إتعلم تقول لا لعمو جوز طنط .. لما يفتى و يقولك واحدة مش حتعمل حاجة .. 6- إتعلم ماتتكسفش من بنات و ولاد طنط و عمو لو لقيتهم بيبصوا عليك و مستغربين … 7- إتعلم تقول لا لصاحبك لما يعزم عليك بكانزاية ..

================= لو سمعت واحد صاحبك أو واحدة صاحبتك بتقولك عن جدها اللى بيفطر كل يوم بكيلو فطير بالسمن البلدى و العسل الأسود .. و بيكون حاشى الفطيرة تبغ أسوانى .. و بيتغدى بنص خروف محشى فياجرا .. و بيشرب صودا بدل المياه .. و عنده فاتورة مفتوحة شهرياً فماكدونالدز و كنتاكى .. و أحياناً بيتوضى بمية نار .. و عايش بصحته كلها و عنده 98 سنة و السكس باكس بتوعه مرسومين و فورمة الساحل عنده طول السنة .. بلغ عنه و عنها .. و إقبض مكافأة إنك أول واحد تكتشف فضائيين عايشين فوسطنا .. … و الله أعلم .