بما إن الشياطين بتتسلسل في رمضان .. البلاوي اللي بتحصل

بما إن الشياطين بتتسلسل في رمضان .. البلاوي اللي بتحصل دي كلها بتحصل ليه ؟! .. و إزاي ؟! … جهازك إتفيرس قبل كده ؟! اللي هو تيجي تفتح حاجة فيه .. تلاقي حاجة تانية خالص إتفتحت !! تضغط علي حاجة .. ماتفتحش !! .. و يطلع لك رسالة مثلاً تقول لك إنت متفيرس و إدفع فدية … أو اللي هو كل ما تفتح صفحة جديدة مثلاً في متصفح .. تلاقي 5 أو 6 صفحات إعلانات فجأة إتفتحوا لوحدهم .. .. عانيت من كل ده علي موبايلك أو الكمبيوتر بتاعك ؟! و أكيد فهمت بشكل مباشر إن ( ده فيروس ) .. و دلوقتي بيتحكم في جزء كبير من تصرّفات جهازك … صح ؟ … السؤال بقي : الهاكر اللي صمم الفيروس ده .. و برمجه .. قاعد جنبك ؟! كل ما تفتح جهازك مثلاً .. يروح مكتفّك و لازق لك بلاستر علي بٌقّك .. و يبدأ هو يتحكم في جهازك ؟! .. بكل تأكيد لا .. .. بل إن غالباً إنت أساساً عمرك ما قابلت الهاكر ده ولا شٌفته .. و لكن إتعديت من جهاز صاحب لك بعت لك فايل متفيرس برضو .. و صاحبك هو كمان ممكن يكون إتعدي من حد تاني .. و هكذا . … سؤال كمان بقي : لو جيت أنا و قلت لك إني حبست الهاكر ده .. و حطّيته في زنزانة مافيش فيها أجهزة إطلاقاً .. هل جهازك حاله إتصلح ؟! . منطقياً لا .. جهازك ما زال مريض .. و بيتصرّف بنفس الطريقة المريضة .. بغض النظر الهاكر ده محبوس ولا لا .. … اللي فات ده .. هو أسهل طريقة أقدر أشرح بيها فهمي الخاص ل ( كيد الشيطان ) . … في القرآن الكريم : سورة النساء : الآية 76 : إن كيد الشيطان كان ضعيفا . و في سورة يوسف : الآية 53 : إن النفس لأمّارة بالسوء .
… الفرق هنا واضح جداً .. النفس ( أمّارة ) .. مش ( ناصحة ) .. مش ( موسوسة ) … لا … (أمّارة ) .. يعني بتأمر من مكان ( قوة ) .. إنت مابتقولش ( الأوفيس بوي أمّار ب نظافة المكان ) .. و لكن ( المدير أمّار ب نظافة المكان ) .. الأمر ( بل المبالغة في الأمر = أمّار ) .. معناه القوة .. … الشيطان مش محتاج إنه يلازمك كل ثانية في يومك عشان يتحكّم في أفعالك و ( يضلّك ) .. إطلاقاً .. بل بالعكس .. كم ضخم من الأذكار و العبادات بتقيك من الشياطين و أفعالهم و وساوسهم . . لكن .. كل اللي هو بيحتاجه .. لحظة ضعف منّك .. يحقن فيها فيروس في نفسك .. لحظة نسيان .. لحظة تغافل أو غفلة .. و بس خلاص .. نفسك هي القوية .. هي اللي بتعمل كل حاجة بعد كده . … رمضان بقي .. فٌرصة .. إنك لو قدرت تفعّل ال( أنتيفايروس ) .. و تنضّف الجهاز .. تبقي متطمّن إنك حتريح شوية قبل ما يحاول معاك الشيطان بفيروس متحدّث جديد . . يعني : الأنتيفايروس بيشتغل إزاي ؟! بإنه بيبقي عنده القدرة يتعرّف علي كل الملفات المريضة .. و يعرف نوع المرض بالظبط .. و يتعامل معاه .. أو يمسح الملفات المريضة دي .. أو يقفل عليها تماماً . . ف مثلاً : إنت مرضك ( الفايروس اللي معذّبك ) مثلاً .. هي ذنوب الخلوات .. اللي هي كل ما تبقي لوحدك مع نفسك و ماحدش شايفك .. دايماً بتعمل ذنوب مٌعينة . ف نفترض هنا إنك في رمضان ده .. قدرت فعلاً بفضل الله تتعامل مع المشكلة دي .. و عرفت إزاي تسيطر عليها .. إما بإنك تقلل وقت خلوتك قدر المستطاع .. أو إنك تقفل أبواب الذنوب دي أساساً . . تمام كده ؟! … زي الفل ؟! .. خلاص بقي مافيش أبواب للفتنة حتتعرّض لها تاني ؟! . إطلاقاً .. إنت طول حياتك في الدنيا مٌعرّض للفتنة .. و لكن حتلاقي الشيطان داخل لك بعد رمضان .. ب فايروس جديد ماتعرضش علي جهاز المناعة بتاعك قبل كده .. زي مثلاً : الغرور بالطاعات , التكبّر , الشك و التوهان , … أو حاجات كتيييييييييييييييييييييييييير تانية .. كلها مؤذية جداً زي ذنوب الخلوات دي .. . و عشان كده … في رمضان بالأخص .. و في غير رمضان عموماً .. فٌرصتك في إنك مش بس تنضّف جهازك مما أصابه .. و لكن .. تستعد و تتحضّر و تحدّث و تجهّز جهاز مناعتك بكل ما يٌمكن من أدوات .. ضد الأمراض اللي إنت حتي لسة ماتصابتش بيها .. . عشان لا قدّر الله .. بعد رمضان .. و بعد ما الشيطان يحاول يعديك ب كيد ضعيف مرّة تانية .. يلاقي أغلب السٌبل لجهازك .. مقفولة . … و الله أعلم … . ** الفكرة دي كنت كتبتها بنفس الصورة في بوست قديم من 7 سنين تقريباً .. و لمّا دورت عليه عشان أرسله ل شخص سأل السؤال اللي في العنوان .. مالقيتهوش .. فكتبته مرّة أخري الآن .